ប្រមុខការទូតកម្ពុជា ត្រៀមខ្លួនជួបជាមួយតំណាងសហភាពអឺរ៉ុបរឿង EBA

2019-03-12 02:35:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧបនាយករដ្ឋមន្ត្រី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថា ១០ថ្ងៃទៀតបេសកកម្មរបស់សហភាពអឺរ៉ុប នឹងមកដល់ប្រទេសកម្ពុជា នៅក្នុងក្របខណ្ឌនៃការត្រួតពិនិត្យមើលឡើងវិញ អំពីការអនុវត្តនូវកិច្ចការទាំងឡាយ ទាក់ទងទៅនឹងការបំពេញឲ្យលក្ខខណ្ឌប្រព័ន្ធអនុគ្រោះពន្ធ (EBA) ហើយលោកក៏បានត្រៀមខ្លួនដើម្បីជួបជាមួយតំណាងសហភាពអឺរ៉ុបផងដែរ។ ការថ្លែងនេះ ធ្វើឡើងនៅក្នុងឱកាសអបអរសាទរទិវា «ASEM DAY» ក្រោមប្រធានបទ «កម្ពុជាឆ្ពោះទៅកិច្ចប្រជុំកំពូលអាស៊ី-អឺរ៉ុប លើកទី១៣ ឆ្នាំ២០២០ និងគោលនយោបាយការបរទេសកម្ពុជា ក្នុងបរិបទសកលបច្ចុប្បន្ន» នៅវិទ្យាស្ថានជាតិអប់រំ កាលពីព្រឹកថ្ងៃទី១១ ខែមីនា ឆ្នាំ២០១៩។

លោក ប្រាក់ សុខុន ថ្លែងនាពេលកន្លងមក

លោកអះអាងថា ពាក់ព័ន្ធនឹងបញ្ហាប្រព័ន្ធអនុគ្រោះពន្ធនេះ កម្ពុជានៅតែប្ដេជ្ញាអនុវត្តឲ្យបានល្អ ហើយ EBA គង់តែនឹងបាត់ដោយស្វ័យប្រវត្តិ នៅពេលកម្ពុជា ក្លាយទៅជាប្រទេសមួយដែលមានចំណូលខ្ពស់។ លោកបញ្ជាក់ថា កម្ពុជា គឺម៉ឺងម៉ាត់ មិនដោះដូរ មិនលក់អធិបតេយ្យភាពជាតិ ទោះស្ថិតក្នុងតម្លៃណាក៏ដោយ។

«អរគុណចំពោះរបបអនុគ្រោះពន្ធរបស់សហភាពអឺរ៉ុប ដែលធ្វើឱ្យកម្ពុជា មានកំណើនសេដ្ឋកិច្ច ហើយក្នុងនោះ ក៏បានធ្វើឲ្យប្រជាពលរដ្ឋកម្ពុជាមានការងារធ្វើច្រើនផងដែរ ពីព្រោះគ្រាន់តែអ្នកធ្វើការនៅក្នុងវិស័យស្បែកជើងមានប្រមាណ ៨សែននាក់ ដែលភាគច្រើនជាស្ត្រី។ ប៉ុន្តែអ្វីដែលជាបញ្ហានោះ តើប្រព័ន្ធអនុគ្រោះពន្ធនេះមានតម្លៃអ្វី? ប្រសិនបើយើងបាត់បង់ឯករាជ្យភាព របស់ប្រទេស ពីព្រោះលក្ខខណ្ឌផ្សារភ្ជាប់ជាមួយ EBA នេះ មានលក្ខខណ្ឌការងារ ហើយក៏មានលក្ខខណ្ឌអធិបតេយ្យ និងការគោរពសិទ្ធិមនុស្សផងដែរ។ ដូច្នេះមានន័យថា ការចាត់ការរបស់រាជរដ្ឋាភិបាល ដើម្បីរក្សាអធិបតេយ្យភាព និងឯករាជ្យភាពរបស់ខ្លួន សហភាពអឺរ៉ុបមិនទទួលយក គឺគាត់មិនទទួលយកការអនុវត្តច្បាប់នៅក្នុងស្រុករបស់យើង»។ នេះជាការពន្យល់របស់លោក ប្រាក់ សុខុន។

សូមជម្រាបថា ដំណើរការនីតិវិធីរបស់សហភាពអឺរ៉ុប ក្នុងការឈានដល់ការព្យួរជាបណ្តោះអាសន្ននូវប្រព័ន្ធអនុគ្រោះពន្ធក្រោមកម្មវិធី «គ្រប់មុខទំនិញលើកលែងតែសព្វាវុធ (EBA)» គឺមានរយៈពេល ១៨ខែ គិតចាប់ពីថ្ងៃទី១២ ខែកុម្ភៈ ឆ្នាំ២០១៩។ ក្នុងនោះរយៈពេលនៃការព្យួរ EBA ត្រូវបានកំណត់ជា ២ដំណាក់កាល៖

ដំណាក់កាលទី១ មានរយៈពេល ៦ខែ៖ ជាដំណាក់កាលដំបូង ដែលគណៈកម្មការអឺរ៉ុប ធ្វើការពិភាក្សាជាមួយរាជរដ្ឋាភិបាលកម្ពុជា និងភាគីពាក់ព័ន្ធ ដើម្បីស្វែងយល់បន្ថែមពីវឌ្ឍនភាពនៃការអនុវត្តកាតព្វកិច្ចតាមបទបញ្ញត្តិលេខ 978/2012។

ដំណាក់កាលទី២ មានរយៈពេល ៦ខែ៖

-ក្នុងរយៈពេលនេះ ប្រសិនបើគណៈកម្មការអឺរ៉ុបពិនិត្យឃើញថា កម្ពុជាបានបង្ហាញពីវឌ្ឍនភាពនៃការងារទាក់ទងនឹងការព្រួយបារម្ភរបស់សហភាពអឺរ៉ុបនោះហើយ គណៈកម្មការអឺរ៉ុប យល់ថារបាយការណ៍នោះពិតជាមានវឌ្ឍនភាពគ្រប់គ្រាន់ នោះគណៈកម្មការនឹងទម្លាក់ចោលនូវចេតនាព្យួរជាបណ្តោះអាសន្ននូវប្រព័ន្ធអនុគ្រោះពន្ធ ហើយចេញសេចក្តីសម្រេចចិត្តបញ្ចប់នីតិវិធីនៅពេលនោះតែម្តង។

-ក្នុងករណីដែលគណៈកម្មការអឺរ៉ុប មិនពេញចិត្តនឹងវឌ្ឍនភាពដែលកម្ពុជា បានបង្ហាញនោះ ក្រុមការងាររបស់គណៈកម្មការអឺរ៉ុប នឹងប្រើប្រាស់រយៈពេល ៦ខែនេះ ដើម្បីរៀបចំរបាយការណ៍ដែលអមជាមួយនឹងអនុសាសន៍របស់ខ្លួន សម្រាប់ជូនទៅគណៈកម្មការអឺរ៉ុបទាំងអស់ និងប្រធានគណៈកម្មការដើម្បីពិនិត្យ និងសម្រេចថាតើត្រូវព្យួរជាបណ្តោះអាសន្ននូវប្រព័ន្ធអនុគ្រោះពន្ធពីកម្ពុជា ឬយ៉ាងណា។ ប្រសិនបើ គណៈកម្មការទាំងអស់សម្រេចថាព្យួរប្រព័ន្ធអនុគ្រោះពន្ធពីកម្ពុជា នោះគឺត្រូវការរយៈពេល ៦ខែទៀត ទើបសេចក្តីសម្រេចចុងក្រោយចូលជាធរមាន៕

អត្ថបទ៖ សំភី