គ្មានឡើយកិច្ចព្រមព្រៀងសាងសង់ស្ពានស្វាយជ្រំ ក្នុងដំណើរទស្សនកិច្ចរបស់លោក មូន ចេអ៊ីន
- 2019-03-13 02:46:46
- ចំនួនមតិ 0 | ចំនួនចែករំលែក 0
គ្មានឡើយកិច្ចព្រមព្រៀងសាងសង់ស្ពានស្វាយជ្រំ ក្នុងដំណើរទស្សនកិច្ចរបស់លោក មូន ចេអ៊ីន
ចន្លោះមិនឃើញ
អ្នកនាំពាក្យក្រសួងការបរទេស និងសហប្រតិបត្តិការអន្ដរជាតិ បានអះអាងថា គ្មានឡើយការចុះកិច្ចព្រមព្រៀងរវាងកម្ពុជា និងកូរ៉េខាងត្បូង លើគម្រោងសាងសង់ស្ពានឆ្លងកាត់ទន្លេមេគង្គ ពីតំបន់ជ្រោយចង្វារ ទៅកាន់តំបន់ស្វាយជ្រំ ក្នុងដំណើរទស្សនកិច្ចប្រធានាធិបតីនៃសាធារណរដ្ឋកូរ៉េ មកកម្ពុជា។
ថ្លែងប្រាប់ទីភ្នាក់ងារសារព័ត៌មានកម្ពុជា AKP កាលពីរសៀលថ្ងៃទី១២ ខែមីនា ឆ្នាំ២០១៩ លោក កេត សោផាន់ អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា បានមាន ប្រសាសន៍ថា មេដឹកនាំនៃប្រទេសទាំងពីរនឹងធ្វើជាសាក្សីនៅក្នុងការចុះកិច្ចព្រមព្រៀងចំនួនពីរ និងអនុស្សារណៈចំនួន៥។ លោកបញ្ជាក់ថា ក្នុងកិច្ចព្រមព្រៀង និងអនុស្សរណៈទាំងនោះ គឺគ្មានគម្រោងនៃការសាងសង់ស្ពានស្វាយជ្រំនោះទេ។
កិច្ចព្រមព្រៀង និងអនុស្សារណៈទាំង៥នោះរួមមាន៖
-កិច្ចព្រមព្រៀងឥណទានជួយដល់វិស័យសុខាភិបាល និងកិច្ចព្រមព្រៀងឥណទានកែលម្អផ្លូវជនបទ។
-អនុស្សារណៈស្តីពីកិច្ចសហប្រតិបត្តិការជាមួយវិទ្យាស្ថានការទូតកម្ពុជា
-អនុស្សារណៈស្តីពីកិច្ចសហប្រតិបត្តិការជាមួយរាជបណ្ឌិត្យសភាកម្ពុជា
-អនុស្សារណៈស្តីពីវិស័យថាមពល
-អនុស្សារណៈស្តីពីការសម្រួលការវិនិយោគ
-និងអនុស្សារណៈស្តីពីការជំរុញពាណិជ្ជកម្មរវាងប្រទេសទាំងពីរ ដោយផ្តោតលើឧបករណ៍ និងសម្ភារសំណង់។
សូមជម្រាបថា ប្រធានាធិបតីនៃសាធារណរដ្ឋកូរ៉េ លោក មួន ចេអ៊ីន នឹងមកបំពេញទស្សនកិច្ចជាផ្លូវរដ្ឋ នៅកម្ពុជាពីថ្ងៃទី១៤ ដល់ថ្ងៃទី១៦ ខែមីនា ឆ្នាំ២០១៩។
គម្រោងសាងសង់ស្ពានជ្រោយចង្វា-ស្វាយជ្រំនេះ ត្រូវបានភាគីចិន សិក្សាចប់ម្តងរួចហើយ ប៉ុន្តែបច្ចុប្បន្នគម្រោងនេះ គឺស្ថិតក្រោមការសិក្សាគម្រោងរបស់ភាគីកូរ៉េវិញម្តង។
កន្លងមកសម្តេចតេជោ ហ៊ុន សែន ធ្លាប់បានមានប្រសាសន៍ថា គម្រោងសាងសង់ស្ពានមួយនេះ ភ្ជាប់រវាងតំបន់ក្តីតាកុយ ភ្ជាប់ទៅកាន់តំបន់អរិយក្សត្រ និងពីផ្លូវកែវចិន្តា នាតំបន់ជ្រោយចង្វារ ភ្ជាប់ទៅកាន់តំបន់ស្វាយជ្រំ ស្ថិតក្នុងឃុំស្វាយជ្រំ ស្រុកល្វាឯម ខេត្តកណ្តាល ដែលនឹងធ្វើឡើងក្នុងអំឡុងឆ្នាំ២០១៩នេះ៕