កម្ពុជា-សហគមន៍អឺរ៉ុប ចង់រក្សាស្ថានភាព EBA ឱ្យនៅដដែល

2019-03-21 02:20:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភាគីកម្ពុជា និងសហគមន៍អឺរ៉ុប បានសម្តែងនូវការប្តេជ្ញាដូចគ្នា គឺធ្វើការរួមគ្នា បន្តការសន្ទនាប្រកបដោយការស្ថាបនារួមគ្នា ដើម្បីស្វែងយល់ជាមួយគ្នាឲ្យបានកាន់តែប្រសើរនូវអ្វីដែលជាការខុសគ្នាកន្លងមក ធ្វើយ៉ាងណារក្សាស្ថានភាព EBA នៅដដែល។ នេះបើតាមការបញ្ជាក់របស់លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ក្រោយជំនួបរវាងលោកឧបបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបបរទេស ជាមួយលោកស្រី Poala Pampaloni នាយករងផ្នែកគ្រប់គ្រងប្រចាំការតំបន់អាស៊ីប៉ាស៊ីហ្វិច និងជាប្រធានគណៈប្រតិភូសហគមន៍អឺរ៉ុប កាលពីរសៀលថ្ងៃទី២០ ខែមីនា ឆ្នាំ២០១៩។

លោក កេត សោផាន់ បញ្ជាក់ថា ជំនួបនេះ គឺជាការបន្តកិច្ចសន្ទនារវាងរាជរដ្ឋាភិបាលកម្ពុជា ជាមួយគណៈកម្មការអឺរ៉ុប ពាក់ព័ន្ធនឹងការចាប់ផ្តើមនីតិវិធីក្នុងការព្យួរ EBA ដែលគណៈកម្មការអឺរ៉ុប បានសម្រេចចាប់យកថ្ងៃទី១១ ខែកុម្ភៈ កន្លងមកនេះ។ លោកថា ភាគីទាំងពីរសុទ្ធតែបានប្តេជ្ញាថា នឹងរក្សាស្ថានភាព EBA មិនឲ្យបាត់បង់ទេ។

លោក ប្រាក់ សុខុន បានបញ្ជាក់ជូនគណៈប្រតិភូគណៈកម្មការអឺរ៉ុបពីសារៈសំខាន់ EBA ចំពោះកម្ពុជា ជាពិសេសចំពោះកម្មករកម្ពុជា ហើយក៏បានថ្លែងអំណរគុណសហភាពអឺរ៉ុប ដែលបានផ្តល់ជំនួយជូនចំពោះកម្ពុជា ក្នុងរយៈពេល ២៥ឆ្នាំកន្លងមកនេះ បានរួមចំណែកដ៏ធំធេងក្នុងការអភិវឌ្ឍសេដ្ឋកិច្ច សង្គមកម្ពុជា។

លោកឧបនាយករដ្ឋមន្ត្រីក៏បានសង្កត់ធ្ងន់ផងដែរលើទិដ្ឋភាពពីរផ្សេងគ្នា នៃការសន្ទនារឿង EBA និងការបន្តរក្សានូវទំនាក់ទំនងជាមិត្តភាពដ៏ល្អរវាងកម្ពុជា និងសហភាពអឺរ៉ុប។

អ្នកនាំពាក្យបានបន្ថែមថា នៅក្នុងក្របខណ្ឌនៃដំណើរការ នៃការត្រួតពិនិត្យក៏ដូចជាកិច្ចសន្ទនាជាមួយរាជរដ្ឋាភិបាល គឺនឹងមានគណៈប្រតិភូតំណាងសហគមន៍អឺរ៉ុបដែលនឹងមកកម្ពុជានៅក្នុងខែឧសភា ឬខែមិថុនា ខាងមុខនេះ ដោយខាងសហគមន៍អឺរ៉ុប លើកឡើងថា កិច្ចសន្ទនានេះ គឺដើម្បីកំណត់ពីពេលនេះ រហូតទៅដល់ដំណើរការនៃនីតិវិធី EBA ទាំងមូលថា «តើយើងនឹងអាចយល់ដឹងជាមួយគ្នាបានកាន់តែច្បាស់នៅលើចំណុចណាខ្លះ»៕