IMF៖ ហានិភ័យសម្រាប់សេដ្ឋកិច្ចកម្ពុជា កាន់តែធំជាងមុន ដោយសារកត្តា៣

2019-04-04 02:19:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមបេសកកម្មការងារនៃមូលនិធិរូបិយវត្ថុអន្តរជាតិ (IMF) បានលើកឡើងថា បើទោះបីជាសេដ្ឋកិច្ចកម្ពុជា នៅបន្តកំណើនរឹងមាំជាមធ្យមប្រមាណ ៦,៥%-៧% ក្នុង១ឆ្នាំ សម្រាប់រយៈពេលខ្លី និងមធ្យមខាងមុខ ដែលស្របទៅនឹងស្ថានភាពល្អប្រសើរនៃលទ្ធផលអនុវត្តផ្នែកសារពើពន្ធក៏ដោយ ក៏ហានិភ័យសម្រាប់កម្ពុជា កាន់តែមានទំហំធំជាងមុនផងដែរ ដែលរួមមាន៖ លទ្ធភាពនៃការដក EBA ដោយសហភាពអឺរ៉ុប, សង្គ្រាមពាណិជ្ជកម្មរវាងសហរដ្ឋអាមេរិក និងចិន និងការចាកចេញរបស់ប្រទេសអង់គ្លេស ពីសហភាពអឺរ៉ុបជាដើម។

ការលើកឡើងខាងលើនេះ ធ្វើឡើងក្នុងកិច្ចប្រជុំវាយតម្លៃបឋមអំពីស្ថានភាពម៉ាក្រូសេដ្ឋកិច្ចកម្ពុជា ដឹកនាំដោយលោក ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងរៀបចំដោយក្រុមបេសកកម្មការងារនៃមូលនិធិរូបិយវត្ថុអន្តរជាតិ ដោយមានការចូលរួមពីសំណាក់ថ្នាក់ដឹកនាំក្រសួង-ស្ថាប័នពាក់ព័ន្ធផ្សេងទៀត កាលពីរសៀលថ្ងៃទី២ ខែមេសា ឆ្នាំ២០១៩ នៅទីស្តីការក្រសួង។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចស្តីពីកិច្ចប្រជុំនេះ ឱ្យដឹងថា ក្រុមការងារ IMF ក៏បានធ្វើការវាយតម្លៃខ្ពស់ចំពោះកិច្ចប្រឹងប្រែងរបស់រាជរដ្ឋាភិបាល ក្នុងការដោះស្រាយបញ្ហាជារចនាសម្ព័ន្ធ ដែលបានដាក់ចេញក្នុងវិធានការកន្លងមក ដូចជា៖ ការបន្តកាត់បន្ថយថ្លៃអគ្គិសនី, ការកែសម្រួលនូវបៀវត្សអប្បបរមា, ការកាត់បន្ថយថ្ងៃឈប់សម្រាក ។ល។ យ៉ាងណាមិញ ក្រុមការងារនេះ ក៏បានបង្ហាញនូវក្តីបារម្ភចំពោះការកើនឡើងនៃចំណាយមូលធន ដែលប្រសិទ្ធភាពរបស់វាអាស្រ័យទាំងស្រុង ទៅនឹងការធ្វើវិចារណកម្មចំណាយ និងសមត្ថភាពអនុវត្តគម្រោង ព្រមទាំងការបន្តកើនឡើងនូវឥណទានឱ្យទៅវិស័យសំណង់ និងអចលនទ្រព្យ ដែលអាចនាំដល់ហានិភ័យជាប្រព័ន្ធក្នុងវិស័យហិរញ្ញវត្ថុ។

ក្នុងកិច្ចប្រជុំនេះ លោក អូន ព័ន្ធមុន្នីរ័ត្ន ក៏បានលើកឡើងពីភាពខុសគ្នានៃលទ្ធផលព្យាករណ៍កំណើនសេដ្ឋកិច្ចឆ្នាំ២០២០ របស់រាជរដ្ឋាភិបាល និងលទ្ធផលព្យាករណ៍របស់ក្រុមការងារ IMF ដោយសារកម្ពុជា បានដាក់បញ្ចូលផលប៉ះពាល់អវិជ្ជមាននៃការដក EBA ដោយសហភាពអឺរ៉ុប ទៅក្នុងការព្យាករសេដ្ឋកិច្ចតែម្តង ដោយរួមទាំងមានរៀបចំជាកញ្ចប់អន្តរាគមន៍ដើម្បីបង្កើតការងារជូនប្រជាពលរដ្ឋ និងជំរុញសេដ្ឋកិច្ចកម្ពុជា ឱ្យកើនមកអត្រា ៦,៥% វិញ ខណៈ IMF ចាត់ទុកការដក EBA ត្រឹមជាហានិភ័យប៉ុណ្ណោះ ពោលគឺមិនបានដាក់បញ្ចូលផ្ទាល់ក្នុងលទ្ធផលព្យាករណ៍នោះទេ៕