បទ "ថ្ងៃដែលអូនចុកឈាម" ឬ "ភូមិភ្នំធំ" របស់កវី គង្គ ប៊ុនឈឿន ត្រូវក្រសួងប្រគល់សិទ្ធិជូនភរិយាលោក

2019-04-10 04:36:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងវប្បធម៌ និងវិចិត្រសិល្បៈ នឹងប្រគល់សិទ្ធិគ្រប់គ្រងមរតកសាសន៍ជូនអ្នកស្រី គាត គឹមលន ភរិយាលោក គង្គ ប៊ុនឈឿន នូវបទចម្រៀងមួយបទ ដែលមានចំណងជើងដើមថា "ថ្ងៃដែលអូនចុកឈាម" ឬដែលគេហៅខុសថា "ភូមិភ្នំធំ"។ នេះបើតាមសេចក្តីជូនដំណឹងរបស់ក្រសួងវប្បធម៌ កាលពីថ្ងៃទី៩ ខែមេសា ឆ្នាំ២០១៩។

លោក គង្គ ប៊ុនឈឿន កាលនៅរស់ (រូបថត៖ ហ្វេសប៊ុក)

ការប្រគល់សិទ្ធិគ្រប់គ្រងមរតកសាសន៍នេះ បន្ទាប់ពីក្រសួងបានទទួលសំណើសុំពីអ្នកស្រី គាត គឹមលន ហើយក្រសួងបានសិក្សាស្រាវជ្រាវឃើញថា បទចម្រៀងនេះ ជាស្នាដៃនិពន្ធបទភ្លេង និងទំនុកច្រៀងដោយលោក គង្គ ប៊ុនឈឿន។

ជាមួយគ្នានេះ ក្រសួងក៏បានប្រកាសដែរថា រាល់ភាគីពាក់ព័ន្ធទាំងអស់ដែលមានបំណងចង់ប្តឹងជំទាស់នឹងការស្នើសុំសិទ្ធិគ្រប់គ្រងមរតកសាសន៍បទចម្រៀងខាងលើនេះ គឺអាចដាក់ពាក្យបណ្តឹងទៅនាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល។ រយៈពេលនៃការដាក់ពាក្យប្តឹងជំទាស់មានរយៈពេល ១ខែ គិតចាប់ពីថ្ងៃជូនដំណឹងនេះតទៅ។

សំណើសុំសិទ្ធិគ្រប់គ្រងខាងលើនេះ បន្ទាប់ពីផលិតកម្មសាន់ដេ បានបញ្ចេញចម្រៀងមួយបទមានចំណងជើងថា «អូនជាអ្នកមាន សមនឹងអ្នកមានដូចគ្នា» ច្រៀងដោយ នាយចឺម ដោយបទនេះ មានបទភ្លេងស្រដៀងទៅនឹងបទ "ថ្ងៃដែលអូនចុកឈាម" របស់លោក គង្គ ប៊ុនឈឿន។

គួររលឹកថា កាលពីឆ្នាំ២០១៧កន្លងទៅ ក្រសួងវប្បធម៌ក៏បានសម្រេចប្រគល់សិទ្ធិគ្រប់គ្រងមរតកសាសន៍នៃបទចម្រៀងស្នាដៃរបស់លោក គង្គ ប៊ុនឈឿន ចំនួន ៤១បទ ទៅឱ្យអ្នកស្រី គាត គឹមលន ផងដែរ៕