ONE សហការជាមួយសមាគមកីឡាយុទ្ធគុនចម្រុះពិភពលោក ដើម្បីជួយឲ្យ MMA ក្លាយជាប្រភេទកីឡាអូឡាំពិក

2019-04-16 12:22:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ONE Championship ដែលជាស្ថាប័នកីឡាយុទ្ធគុនចម្រុះធំបំផុតនៅអាស៊ី បានប្រកាសពីការសហការជាមួយសមាគមកីឡាយុទ្ធគុនចម្រុះពិភពលោក (MAMMA) ដែលជាស្ថាប័នឯករាជ្យមួយសម្រាប់កីឡា MMA នៅទូទាំងពិភពលោក។

ក្រោយកិច្ចសហការនេះ ONE Championship នឹងជួយគាំទ្រកិច្ចខិតខំប្រឹងប្រែងរបស់ GAMMA ដើម្បីធ្វើឲ្យអូឡាំពិក ទទួលស្គាល់ប្រភេទកីឡា MMA។ បន្ថែមលើនេះ ONE ក៏នឹងធ្វើការជាមួយ GAMMA ដើម្បីអភិវឌ្ឍ និងផ្សព្វផ្សាយពីស្ដង់ដាសុវត្ថិភាពរបស់ MMA ច្បាប់ប្រឆាំងសារធាតុញៀនក្នុងកីឡា ក៏ដូចជាច្បាប់នៃការប្រកួត MMA ដើម្បីឲ្យកីឡាករ MMA មិនទាន់អាជីព អាចអនុវត្តជាប្រចាំថ្ងៃបាន។

លោក Chatri Sityodtong ប្រធាន និងជានាយកប្រតិបត្តិ ONE Champoinship (រូបភាពផ្ដល់សិទ្ធិដោយ Reuters)

លោក Chatri Sityodtong ប្រធាន និងជានាយកប្រតិបត្តិ ONE Champoinship បានបញ្ជាក់ថា៖ "ONE Championship មានកិត្តិយសសូមប្រកាសពីការសហការជាមួយ GAMMA ដែលជាស្ថាប័នឯករាជ្យសម្រាប់ MMA។ ក្នុងនាមជាអ្នកហាត់ក្បាច់គុនតាំងពីដើមរៀងមកនោះ ខ្លួនខ្ញុំផ្ទាល់បានវិនិយោគក្នុងការអភិវឌ្ឍកីឡាយុទ្ធគុនចម្រុះមិនទាន់អាជីព ដើម្បីធ្វើឲ្យប្រាកដថាពួកគេ មូលដ្ឋានគ្រឹះត្រឹមត្រូវ នឹងដើម្បីជួយឲ្យពួកគេក្លាយជាកីឡាករអាជីព"។

ចំណែកលោក Alexander Engelhardt ប្រធាន GAMMA ក៏បានបង្ហាញចំណាប់អារម្មណ៍ដែរថា៖ "ក្នុងនាម GAMMA ខ្ញុំសូមអរគុណ ONE Championship ដែលបានគាំទ្រ និងប្ដេជ្ញាជួយកីឡា MMA។ ទាំង GAMMA និង ONE Championship សុទ្ធតែមានគោលបំណង នាំយកកីឡា MMA ដាក់ចូលក្នុងប្រភេទកីឡាអូឡាំពិក"។

មានទីតាំងនៅក្រុងអាំស្ទើដាំ ប្រទេសហូឡង់ GAMMA គឺជាអង្គការមិនគិតប្រាក់ចំណេញ បង្កើតឡើងកាលពីឆ្នា២០១៨ ដែលមានសមាជិកជាសហព័ន្ធកីឡា MMA ពីជាង ៦០ប្រទេសក្នុងលោក។

GAMMA មានគោលបំណងធ្វើឲ្យកីឡា MMA ត្រូវបានទទួលស្គាល់ថាជាប្រភេទកីឡារបស់អូឡាំពិក ដើម្បីផ្ដល់ឱកាសឲ្យកីឡាករ MMA ស្ម័គ្រចិត្ត (មិនអាជីព) អាចមានឱកាសសម្រេចក្ដីស្រមៃ ប្រកួតនៅលើឆាកអូឡាំពិក។

សូមបញ្ជាក់ថា ដោយមានការគាំទ្រពី ONE Championship, GAMMA នឹងរៀបចំការប្រកួតពានរង្វាន់ MMA ស្ម័គ្រចិត្ត ( Amateur MMA World Championships) នៅសិង្ហបុរី នាខែវិច្ឆិកា ចុងឆ្នាំនេះ ដោយមានកីឡាករក្មេងៗជាច្រើនចូលរួមប្រកួតប្រជែង៕

អត្ថបទ៖ សុខ សុវត្ថិ