សម្តេច ហ៊ុន សែន អរគុណលោកស្រី អ៊ុង សានស៊ូជី ដែលអនុញ្ញាតឱ្យកម្ពុជា សង់ព្រះវិហារនៅមីយ៉ាន់ម៉ា
- 2019-04-30 06:24:05
- ចំនួនមតិ 0 | ចំនួនចែករំលែក 0
សម្តេច ហ៊ុន សែន អរគុណលោកស្រី អ៊ុង សានស៊ូជី ដែលអនុញ្ញាតឱ្យកម្ពុជា សង់ព្រះវិហារនៅមីយ៉ាន់ម៉ា
ចន្លោះមិនឃើញ
សម្ដេចនាយករដ្ឋមន្រ្តី ហ៊ុន សែន បានថ្លែងអំណរគុណដល់លោកស្រី អ៊ុង សានស៊ូជី ទីប្រឹក្សារដ្ឋនៃសហភាពមីយ៉ាន់ម៉ា ដែលអនុញ្ញាតឱ្យកម្ពុជាសាងសង់ព្រះវិហារក្នុងខេត្តនៅប្រទេសមីយ៉ាន់ម៉ា។ ការថ្លែងនេះ ធ្វើឡើងក្នុងជំនួបពិភាក្សារវាងមេដឹកនាំទាំង២ នាព្រឹកថ្ងៃទី៣០ ខែមេសា ឆ្នាំ២០១៩ នៅវិមានសន្តិភាព។
ជាមួយគ្នានេះ សម្តេចក៏បានអរគុណផងដែរ ដល់ប្រទេសមីយ៉ាន់ម៉ា ដែលបានបណ្តុះបណ្តាល សមណសង្ឃ ឲ្យទទួលបានការអប់រំនៅទីនោះ ដោយរហូតមកដល់បច្ចុប្បន្ននេះ គឺមានសមណសង្ឃចំនួន ៩៤អង្គហើយ ដែលបានបញ្ចប់ការសិក្សា ពីប្រទេសមីយ៉ាន់ម៉ា ហើយនៅមានចំនួន៤អង្គទៀត ដែលកំពុងបន្តការសិក្សានៅទីនោះ។
លោកស្រី អ៊ុង សានស៊ូជី បានលើកឡើងក្នុងជំនួបនេះថា នេះគឺជាលើកទី១ហើយ ដែលលោកស្រី បានបំពេញទស្សនកិច្ចមកកាន់កម្ពុជា ក្នុងការមកជួបចរចាជាមួយនឹងសម្ដេច ហ៊ុន សែន ហើយជាពិសេសគឺដើម្បីពង្រឹង និងពង្រីកទំនាក់ទំនងទ្វេភាគី រវាងប្រទេសទាំងពីរ ឲ្យកាន់តែរីកចម្រើនខ្លាំងឡើង ហើយកាន់តែសកម្មឡើងថែមទៀត។ ក្នុងន័យនេះ លោកស្រីបានលើកឡើង ពីកិច្ចសហប្រតិបត្តិការ លើវិស័យវប្បធម៌ វិស័យសាសនា វិស័យអប់រំ ដូចជាវិស័យសេដ្ឋកិច្ចផងដែរ។
ទាក់ទងទៅនឹងបញ្ហាវប្បធម៌ នៅឆ្នាំ២០២០ខាងមុខនេះ គឺជាខួប៦៥ឆ្នាំ នៃការបង្កើតទំនាក់ទំនងរវាងប្រទេសទាំងពីរ ដូច្នេះសម្តេច ហ៊ុន សែន បានស្នើឱ្យមានការរៀបចំរួមគ្នានូវសកម្មភាព ឲ្យមានភាពអធិកអធមផង និងជំរុញវិស័យទេសចរណ៍ រវាងប្រទេសទាំងពីរផង ជាពិសេសខេត្តសៀមរាប និងខេត្តបាហ្គាន ដែលជាខេត្តពោរពេញទៅដោយប្រាសាទបេតិកភណ្ឌ៕