ចាន់ រតនា៖ "ខ្ញុំនឹងវ៉ៃផ្ដាច់ មិនរង់ចាំដល់ចប់ទឹក៣ទេ បើមិនខ្ញុំ គឺគេ"

2019-05-02 11:39:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រតនា បានបង្ហាញជំនឿចិត្ត ១០០% ថានឹងយកឈ្នះកីឡាករ Rudy Agustian នាការប្រកួតក្នុងព្រឹត្តិការណ៍ ONE: FOR HONOR របស់ ONE Championship នៅឥណ្ឌូណេស៊ី នាថ្ងៃទី៣ ខែឧសភាស្អែកនេះ។ រតនា បានអះអាងយ៉ាងដូច្នេះ អំឡុងពេលផ្ដល់បទសម្ភាសន៍ជាមួយ [ខ្លីៗ] និងក្រុមអ្នកសារព័ត៌មានខ្មែរ ដែលបានទៅយកព័ត៌មានដោយផ្ទាល់ដល់ទីក្រុងហ្សាការតា នាថ្ងៃទី២ ខែឧសភានេះ។

រតនា បញ្ជាក់ថា ជំនឿ ១០០% នេះ មិនមែនមានន័យថាខ្លួនមើលងាយគូប្រកួតនោះទេ តែជាការបង្កើនកម្លាំងចិត្តដល់ខ្លួនឯង ក្រោយពីបានប្រឹងប្រែងហ្វឹកហាត់យ៉ាងខ្លាំងក្លា និងស្វែងយល់ពីគូប្រកួតរួចអស់ហើយ ដើម្បីត្រៀមការប្រកួតនេះ។

រតនា បន្ថែមថា៖ "ភាគច្រើនខ្ញុំវ៉ៃ គឺខ្ញុំមិនចង់អូសបន្លាយដល់ចប់ទឹកទី៣ នោះទេ បើមានឱកាសខ្ញុំនឹងវ៉ៃផ្ដាច់ បើមិនខ្ញុំ គឺគេ។ តែយើងមិនអាចមើលឃើញមុនទេ បើមិនមានឱកាសវ៉ៃផ្ដាច់ ខ្ញុំអាចវ៉ៃសន្សំពិន្ទុ តាមកាលៈទេសៈជាក់ស្ដែង គ្រាន់តែថាអ្វីដែលខ្ញុំគិតទុក គឺខ្ញុំនឹងវ៉ៃផ្ដាច់ បើអាចទៅរួច"។

កីឡាករគុនខ្មែរ វ័យ ៣៣ឆ្នាំ បន្ថែមថា ការប៉ះកីឡាករម្ចាស់ផ្ទះ ក្រោមសំឡេងស្រែកហ៊ោរបស់អ្នកគាំទ្ររបស់គេជាច្រើន នឹងមិនធ្វើឲ្យខ្លួនចាញ់ច្រាប ឬប៉ះពាល់ដល់ស្មារតីប្រកួតនោះទេ ដោយសារនេះមិនមែនជាលើកទី១ ដែលរតនាប្រកួតប៉ះកីឡាករម្ចាស់ផ្ទះនោះទេ។ "ខ្ញុំធ្លាប់ប៉ះកីឡាករចិន Ma Hao Bin នៅទឹកដីម៉ាកាវពីមុនមកដែរ មិនមែនជាលើកទី១ របស់ខ្ញុំនោះទេ ដែលត្រូវប៉ះម្ចាស់ផ្ទះបែបនេះ"។

ជាចុងក្រោយ រតនា បានប្ដេជ្ញាថានឹងនាំជ័យជម្នះជូនមាតុភូមិឲ្យទាល់តែបាន ដើម្បីថ្លែងអំណរគុណចំពោះអ្នកគាំទ្រ ដែលតែងតែលើកទឹកចិត្តតាំងពីដើមរៀងមក។

សូមបញ្ជាក់ថា ព្រឹត្តិការណ៍ ONE: FOR HONOR ធ្វើឡើងចាប់ពីម៉ោង ៦ល្ងាចតទៅ។ រតនា នឹងវ៉ៃគូទី៤ ចំណែកកីឡាការិនី នៅ ស្រីពៅ នឹងប៉ះកីឡាការិនីម្ចាស់ផ្ទះ Priscilla ក្នុងគូទី ១០៕

គូប្រកួតទាំងអស់ មានដូចខាងក្រោម៖