នាយករដ្ឋមន្រ្តី៖ ជាលើកដំបូងដែលវារីអគ្គិសនីរបស់កម្ពុជា ផលិតបានជាង ៦០០មេហ្គាវាត់

2019-05-08 06:55:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានថ្លែងនាព្រឹកថ្ងៃទី៨ ខែឧសភា ឆ្នាំ២០១៩ថា សម្តេចបានទទួលរបាយការណ៍ជាលើកដំបូងក្នុងរយៈពេលប៉ុន្មានខែចុងក្រោយនេះ ដែលវារីអគ្គិសនីរបស់កម្ពុជា បានបញ្ចេញថាមពលបានដល់ជាង ៦០០មេហ្គាវាត់ ក្នុងចំណោមថាមពលជិត ១៤០០មេហ្គាវាត់ ខណៈដែលកម្ពុជាបានទទួលភ្លៀងធ្លាក់ជាបន្តបន្ទាប់។ ការថ្លែងនេះ ធ្វើឡើងក្នុងពិធីអបអរសាទរខួបលើកទី១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដែលធ្វើឡើងនៅទីស្នាក់ការកណ្តាលកាកបាទក្រហមកម្ពុជា ក្នុងរាជធានីភ្នំពេញ។

សម្តេច ហ៊ុន សែន ថ្លែងនាពេលកន្លងមក

សម្តេចបានបញ្ជាក់ដូច្នេះថា៖ «**ប៉ុន្មានអាទិត្យមុននោះ ពេលខ្លះ (វារីអគ្គិសនី) ចេញបានតែ១០០មេហ្គាវាត់, ២០០មេហ្គាវាត់, ៣០០មេហ្គាវាត់, ៤០០មេហ្គាវាត់។ ប៉ុន្តែដោយសារភ្លៀងធ្លាក់ក្នុងប៉ុន្មានថ្ងៃនេះ អគ្គិសនីដែលបញ្ចេញយប់មិញនេះ បានរហូតដល់ជាង ៦០០មេហ្គាវ៉ាត់។ សង្ឃឹមថា ភ្លៀងនឹងបន្តធ្លាក់តទៅទៀត**»។

បើតាមប្រសាសន៍របស់ប្រមុខរាជរដ្ឋាភិបាល ឱ្យដឹងថា លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម បានព្យាករថា រដូវវស្សានឹងអាចចាប់ផ្តើមលឿនជាងការព្យាករពីលើកមុន ដែលថា រដូវវស្សានឹងចាប់ផ្តើមនៅដើមសប្តាហ៍ទី៣ នៃខែឧសភានេះ៕

អត្ថបទ៖ សំភី