កម្ពុជា រំពឹងថានឹងអាចផលិតចេកអំបូងលឿង បានដល់ ១លានតោននៅឆ្នាំ២០៣០

2019-05-09 06:41:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានថ្លែងថា នៅឆ្នាំ២០៣០ កម្ពុជា នឹងអាចផលិតចេកអំបូងលឿង បានប្រមាណជាង ១លានតោន។ ការថ្លែងនេះ ធ្វើឡើងក្នុងពិធីសម្ពោធការនាំចេញផ្លែចេកអំបូងលឿងស្រស់កម្ពុជា ទៅកាន់ទីផ្សារប្រទេសចិន នាព្រឹកថ្ងៃទី៩ ខែឧសភា ឆ្នាំ២០១៩ នៅទីស្នាក់ការក្រុមហ៊ុន ហ៊ុន ទី ស្ថិតក្នុងខណ្ឌសែនសុខ រាជធានីភ្នំពេញ។

លោក វេង សាខុន បានបញ្ជាក់ថា ក្នុងរយៈពេល៤ខែនៃឆ្នាំ២០១៩នេះ ការនាំចេកអំបូងលឿងរបស់កម្ពុជា ចេញទៅក្រៅប្រទេសបានប្រមាណ ៣៨ពាន់តោនហើយ។ លោកអះអាងថា ត្រឹមដំណាច់ឆ្នាំ២០១៩នេះ កម្ពុជា នឹងអាចនាំចេញចេកអំបូងលឿង ទៅកាន់ប្រទេសចិន មិនតិចជាង ១៣០ពាន់តោនឡើយ។

យោងតាមរបាយការណ៍របស់អគ្គនាយកដ្ឋានកសិកម្ម បានឱ្យដឹងថា ក្រោយពីបានចុះពិនិត្យ និងវាយតម្លៃរបស់ក្រុមការងារបច្ចេកទេសវាយតម្លៃរបស់អគ្គរដ្ឋបាលគយរបស់ចិននាចុងខែកុម្ភៈ បានចុះពិនិត្យ ១០ ក្រុមហ៊ុន ដែលបានដាក់ពាក្យស្នើសុំគោលការណ៍អនុញ្ញាតនាំចេញផ្លែចេកអំបូងលឿងស្រស់។ ក្រោយការបញ្ចប់ធ្វើការវាយតម្លៃ គឺមានតែក្រុមហ៊ុនចំនួន០៥ ប៉ុណ្ណោះ ដែលគោរពបានតាមលក្ខខណ្ឌច្បាប់ និងបច្ចេកទេស ហើយអាចធ្វើការនាំចេញចេកស្រស់ទៅកាន់ទីផ្សារចិនលើកទី១ បានចំនួនជាង ១០០តោននាថ្ងៃទី៩ឧសភានេះ។

ក្រុមហ៊ុនទាំងនោះរួមមាន៖ ១. Longmate Agriculture, ២. Long Sreng Hua Jian Agriculture, ៣. Green Island Agriculture, ៤. Sovann Reachsey និង ៥. Grand Land Agriculture។

លោក ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម ក៏បានឡើងរាយការណ៍ជូនអង្គពិធីជ្រាបអំពីផលិតកម្មចេកអំបូងលឿងដែលកំពុងមានទីផ្សារខ្ពស់នៅអន្តរជាតិ ហើយកំពុងត្រៀមរៀបចំធ្វើការនាំចេញជាបន្តបន្ទាប់ចាប់ពីពេលនេះតទៅ។

ក្រៅពីនេះ លោកក៏បានបញ្ជាក់ដោយសង្ខេបពីដំណើរការនៃការចរចាជាមួយភាគីចិន អំពីនីតិវិធី បែបបទ ឯកសារចាំបាច់សំខាន់ៗទាំងច្បាប់ និងបច្ចេកទេស ជាពិសេសឯកសារអនាម័យ និងភូតគាមអនាម័យ មុនឈានទៅចុះហត្ថលេខាលើអនុស្សរណ:នៃការយោគយល់គ្នា កាលពីថ្ងៃទី០២ ខែសីហា ឆ្នាំ២០១៨ ស្តីពីការនាំចេកស្រស់ចេញទៅកាន់ទីផ្សារចិន៕