វិសាខា ឈ្នះបឹងកេត ខណៈទ័ព វាយបកយកឈ្នះយុវជនបាទីចុងម៉ោង
- 2019-05-12 04:37:26
- ចំនួនមតិ 0 | ចំនួនចែករំលែក 0
វិសាខា ឈ្នះបឹងកេត ខណៈទ័ព វាយបកយកឈ្នះយុវជនបាទីចុងម៉ោង
ចន្លោះមិនឃើញ
ក្រុមវិសាខា បានយកឈ្នះក្រុមបឹងកេត ដោយលទ្ធផល ៣-២ ក្នុងសប្ដាហ៍ទី ៧ នៃលីគកំពូលកម្ពុជា Metfone Cambodian League 2019 នាថ្ងៃសៅរ៍ ទី១១ ខែឧសភា នៅកីឡដ្ឋានវិសាខា។
គ្រាប់បាល់ទាំង ៥ ក្នុងការប្រកួតនេះ សុទ្ធតែកើតឡើងនាតង់ទី២ ពោលគឺក្រុមភ្ញៀវបានស៊ុតនាំមុខមុន ដោយកីឡាករ Eduardo នៅនាទី ៦៣ (ប៉េណាល់ទី) ប៉ុន្តែត្រូវក្រុមម្ចាសផ្ទះវិសាខា ដាក់ ៣គ្រាប់វិញ ដោយកីឡាករ Guardiano នាទី ៦៧, ៧៩ (ប៉េណាល់ទី) និង សាន គឹមហេង នាទី ៩០+២។ មុនចប់ការប្រកួត បឹងកេតសង១គ្រាប់វិញដែរ ដោយខ្សែប្រយុទ្ធជើងចាស់ ឃួន ឡាបូរ៉ាវី នាទី ៩០+៥ ប៉ុន្តែមិនអាចតាមស្មើវិសាខាបានឡើយ។
ចំណែកក្រសួងការពារជាតិ (ទ័ព) បានឈ្នះក្រុមយុវជនសាលាបាល់ទាត់ជាតិបាទី ទាំងលំបាក ដោយលទ្ធផល ៤-៣។
នៅនាទី ៤២ អ៊ាន ពិសី បានរកគ្រាប់បាល់ឲ្យក្រុមភ្ញៀវបាទី នាំមុខមុន ប៉ុន្តែចុងតង់ទី១ Bisan George បានជួយឲ្យក្រសួងការពារជាតិតាមស្មើវិញ។ ឈានចូលតង់ទី២ នាទី ៥៨ Dzama Bata បានរកគ្រាប់បាល់ឲ្យក្រុមម្ចាស់ផ្ទះក្រសួងការពារជាតិនាំមុខវិញម្ដង ប៉ុន្តែត្រូវយុវជនបាទី ដាក់២គ្រាប់វិញ ដោយប៊ុនធឿន ប៊ុនណារ៉ុង នាទី ៧៥ និង សៀង ចន្ធា នាទី ៨៣។ យ៉ាងណាក្ដី នៅនាទី ៨៦ Dzama Bata បានរកគ្រាប់បាល់ឲ្យទ័ព តាមស្មើ ៣-៣ មុនពេល Bisan George ស៊ុតគ្រាប់ទី៤ ឲ្យទ័ព ឈ្នះ យុវជនបាទី ទាំងប្រផុតប្រផើយ ៤-៣។
ក្រោយជ័យជម្នះនេះ ការពារជាតិ កើនដល់ ១៤ពិន្ទុ ឡើងឈរលេខ ៤ ក្នុងតារាង ខណៈបាទី នៅតែមាន ៣ពិន្ទុ ឈរលេខរៀងទី ១៣។
លទ្ធផល១គូទៀត គឺណាហ្គាខប ឈ្នះក្រុមម្ចាស់ផ្ទះអគ្គិសនីកម្ពុជា ៣-០។ ជ័យជម្នះនេះ ជួយឲ្យណាហ្គាឡើងឈរកំពូលតារាងបណ្ដោះអាសន្ន ដោយមាន ១៨ពិន្ទុ ក្នុង ៧ប្រកួត៕