វៀតណាម អាចនឹងផ្តួលអង់គ្លេស ក្នុងការនាំទំនិញទៅអាមេរិក

2019-05-29 03:56:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វៀតណាម បាននឹងកំពុងក្លាយជាប្រភពនៃការនាំទំនិញចូលទីផ្សារអាមេរិកដ៏លឿនបំផុត នៅក្នុងរយៈកាលចុងក្រោយនេះ ពិសេសគឺអាចនឹងវ៉ាដាច់អង់គ្លេសទៀតផង។ នេះបើតាមការចុះផ្សាយរបស់ Bloomberg កាលពីថ្ងៃទី២៨ ខែឧសភា ឆ្នាំ២០១៩។

មេដឹកនាំអាមេរិក និងវៀតណាម ក្នុងអំឡុងធ្វើជាអធិបតីក្នុងពិធីចុះហត្ថលេខាមួយ កាលពីខែកុម្ភៈ ឆ្នាំ២០១៩ នៅក្រុងហាណូយ។ រូបថត៖ AFP

យោងតាមទិន្នន័យរបស់ការិយាល័យជំរឿនអាមេរិក បង្ហាញថា ក្នុងត្រីមាសទី១ នៃឆ្នាំ២០១៩ វៀតណាម នាំទំនិញចូលអាមេរិក គិតជាទឹកប្រាក់ប្រមាណ ជាង ៦៨,៩៩ពាន់លានដុល្លារ កើនឡើង ៤០,២ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ ចំនួននេះ ធ្វើឱ្យវៀតណាមស្ថិតនៅចំណាត់ថ្នាក់ទី៧ នៃការផ្គត់ផ្គង់ទំនិញឱ្យអាមេរិក។ ចំណែកអង់គ្លេស នាំទំនិញចូលអាមេរិកបានជាង ៦២ពាន់លានដុល្លារ កើនឡើងត្រឹម ២,២ភាគរយប៉ុណ្ណោះ និងស្ថិតនៅចំណាត់ថ្នាក់ទី៩។

ក្នុងឆ្នាំ២០១៨ វៀតណាម នាំទំនិញចូលអាមេរិក គិតជាទឹកប្រាក់ប្រមាណជាង ៤៩ពាន់លានដុល្លារ ស្ថិតនៅលំដាប់លេខ១២ ខណៈអង់គ្លេស ស្ថិតនៅលេខ៧ នាំទំនិញចូលអាមេរិក បានជាង ៦០ពាន់លានដុល្លារ។

យ៉ាងណាមិញ ប្រទេសចិន នៅតែនាំមុខគេក្នុងការផ្គត់ផ្គង់ទំនិញឱ្យអាមេរិក ពោលគឺបានប្រមាណជាង ៤៦៤ពាន់លានដុល្លារ ក្នុងរយៈពេល៣ខែឆ្នាំនេះ ប៉ុន្តែចំនួននេះបានធ្លាក់ចុះខ្លាំងជាងគេ គឺ ១៣,៩% បើប្រៀបធៀបនឹងឆ្នាំមុន។ នេះក៏ដោយសារតែប្រទេសទាំង២ កំពុងមានភាពតានតឹងខ្លាំងលើសង្គ្រាមពាណិជ្ជកម្ម តាមរយៈការដំឡើងពន្ធដាក់គ្នាទៅវិញទៅមក។

រដ្ឋបាលដូណាល់ ត្រាំ ធ្លាប់បានលើកឡើងថា ការកើនឡើងភាពតានតឹងពាណិជ្ជកម្មរវាងក្រុងប៉េកាំង និងវ៉ាស៊ីងតោន នឹងបង្ខំឱ្យក្រុមហ៊ុនជាច្រើនដែលស្ថិតក្នុងប្រទេសចិន រើរោងចក្រទៅទីតាំងថ្មីនៅប្រទេសជិតខាង ក្នុងនោះវៀតណាម គឺជាប្រទេសដែលមានសក្តានុពលជាងគេ៕

ប្រភព៖ Bloomberg ប្រែសម្រួល៖ សំភី