ប្អូនស្រីលោក គីម ជុងអ៊ុន បង្ហាញខ្លួនជាសាធារណៈវិញហើយ ក្រោយមានពាក្យចចាមអារ៉ាម

2019-06-04 04:10:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកស្រី គីម យ៉ូជុង (Kim Yo-jong) ដែលជាប្អូនស្រីមេដឹកនាំកូរ៉េខាងជើង លោក គីម ជុងអ៊ុន បានបង្ហាញខ្លួនជាសាធារណៈលើកដំបូង នៅក្នុងរយៈពេល ៥២ថ្ងៃមកនេះ។ ការណ៍នេះ បានបន្សាបនូវពាក្យចចាមអារ៉ាមដែលថា លោកស្រីត្រូវរងការពិន័យដាក់ទោសដោយសារការបរាជ័យជុំវិញជំនួបកំពូលលើកទី២ រវាងប្រធានាធិបតីអាមេរិក លោក ដូណាល់ ត្រាំ និងលោក គីម ជុងអ៊ុន កាលពីចុងខែកុម្ភៈកន្លងទៅ។

ការបង្ហាញខ្លួននេះ ធ្វើឡើងក្នុងពេលដែលលោកស្រី គីម យ៉ូជុង បានចូលរួមក្នុងពិធីសម្តែងសិល្បៈមួយហៅថា «The Land of the People» នៅកីឡដ្ឋាន May Day ក្នុងក្រុងព្យុងយ៉ាង កាលពីថ្ងៃទី៣ ខែមិថុនា ឆ្នាំ២០១៩ ជាមួយលោក គីម ជុងអ៊ុន។ នេះបើតាមការចុះផ្សាយរបស់ភ្នាក់ងារព័ត៌មានកូរ៉ខាងជើង KCNA។

រូបថត៖ KCNA

ក្រៅពីនោះ លោកស្រី ក៏ត្រូវបានគេសង្ស័យថា ខកខានមិនបានរួមដំណើរជាមួយលោក គីម ជុងអ៊ុន ទៅកាន់ប្រទេសរុស្ស៊ី កាលពីខែមេសា សម្រាប់ជំនួបជាមួយលោកប្រធានាធិបតី វ្លាឌីមៀ ពូទីនផងដែរ ព្រោះជារឿយៗ លោកស្រីតែងទៅជាមួយលោក គីម ជុងអ៊ុន ជានិច្ច នៅពេលមានដំណើរទៅក្រៅប្រទេស ក្នុងនាមជាជំនួយការម្នាក់។

យ៉ាងណាមិញ ក៏មានការសន្និដ្ឋានផងដែរអំពីការមិនបង្ហាញខ្លួនរបស់លោកស្រី គីម យ៉ូជុង ដោយសារតែបញ្ហាសុខភាពរបស់លោកស្រី។

បើតាមប្រព័ន្ធផ្សព្វផ្សាយកូរ៉េខាងជើង កាលពីថ្ងៃទី៣ ខែមិថុនា លោក គីម យ៉ុងឆុល (Kim Yong-chol) ដែលមានពាក្យចចាមអារ៉ាមថា លោកបានទទួលរងទណ្ឌកម្មបង្ខំឱ្យធ្វើការយ៉ាងលំបាកនៅក្នុងតំបន់ដាច់ស្រយាលមួយ ដោយសារការបរាជ័យក្នុងជំនួបត្រាំ-គីម ដែរនោះ គឺបានបង្ហាញខ្លួនជាសាធារណៈផងដែរ ជាមួយលោក គីម ជុងអ៊ុន ក្នុងអំឡុងពេលចូលរួមក្នុងពិធីសម្តែងសិល្បៈមួយ កាលពីថ្ងៃទី២ ខែមិថុនា៕

អត្ថបទទាក់ទង៖ កូរ៉េខាងជើង ប្រហារជីវិតមន្រ្តីដែលធ្វើការងារបរាជ័យ ក្នុងជំនួប ដូណាល់ ត្រាំ-គីម ជុងអ៊ុន

ប្រភព៖ Yonhapnews ប្រែសម្រួល៖ សំភី