ទង់តៃវ៉ាន់ ត្រូវបានដាក់ស្មើភាពគ្នាជាមួយទង់ប្រទេសដទៃ ក្នុងសន្និសីទយោធាមួយនៅអាមេរិក

2019-06-11 04:01:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កងម៉ារីនប្រចាំតំបន់ប៉ាស៊ីហ្វិករបស់សហរដ្ឋអាមេរិក ទើបតែបញ្ចេញរូបថតមេបញ្ជាការ និងទង់តៃវ៉ាន់ ក្នុងសន្និសីទតំបន់ឥណ្ឌូ-ប៉ាស៊ីហ្វិកប្រចាំឆ្នាំមួយហៅថា Pacific Amphibious Leaders Symposium (PALS-19) ដែលធ្វើឡើងពីថ្ងៃទី៣ ដល់ ៦ ខែមិថុនា ឆ្នាំ២០១៩ នៅរដ្ឋ Honolulu កោះហាវ៉ៃ សហរដ្ឋអាមេរិក។

ចំពោះរូបទង់តៃវ៉ាន់ គឺត្រូវបានគេសង្កេតឃើញក្នុងពេលដែលលោកឧត្តមនាវីឯក Phil Davidson មេបញ្ជាការអាមេរិកប្រចាំតំបន់ឥណ្ឌូ-ប៉ាស៊ីហ្វិក ឡើងថ្លែងក្នុងសន្និសីទ PALS-19។

ចំណែករូបមួយទៀត គឺមេបញ្ជាការតៃវ៉ាន់ លោកឧត្តមសេនីយ៍ទោ Liu Erh-jung និងលោកឧត្តមសេនីយ៍ឯក H. Stacy Clardy III មេបញ្ជាការកងម៉ារីនប្រចាំតំបន់ប៉ាស៊ីហ្វិករបស់សហរដ្ឋអាមេរិក ផ្លាស់ប្តូរអំណោយគ្នាទៅវិញទៅមកក្នុងអំឡុងពេលលោក Liu ចូលរួមក្នុងសន្និសីទនេះ។

គួររំលឹកដែរថា កាលពីថ្ងៃទី៨ ខែមិថុនាកន្លងទៅ ក្រសួងការពារជាតិអាមេរិក ក៏បានបញ្ចេញរបាយការណ៍កម្រាស់ ៥៥ទំព័រផងដែរ ដែលបង្ហាញអំពីយុទ្ធសាស្រ្តអាមេរិកក្នុងតំបន់ឥណ្ឌូ-ប៉ាស៊ីហ្វិក។ ក្នុងរបាយការណ៍នោះ ត្រូវគេកត់សម្គាល់ឃើញថា តៃវ៉ាន់ត្រូវបានដាក់បញ្ចូលក្នុងបញ្ជីប្រទេសដែលសហរដ្ឋអាមេរិក ត្រូវពង្រឹងភាពជាដៃគូស្របជាមួយសិង្ហបុរី ណូវែលហ្សេឡង់ និងម៉ុងហ្គោលី។

ក្នុងរបាយការណ៍នេះ បានសរសេរយ៉ាងដូច្នេះថា៖ «ប្រទេសទាំង៤នេះ បានចូលរួមចំណែកក្នុងបេសកកម្មរបស់អាមេរិកនៅជុំវិញពិភពលោក និងចូលរួមយ៉ាងសកម្មក្នុងការរក្សាសេរីភាព និងបើកចំហសណ្តាប់ធ្នាប់អន្តរជាតិ»។

របាយការណ៍នេះបន្តថា ប្រទេសទាំង៤ គឺជាដៃគូធម្មជាតិ ជឿជាក់ និងមានសមត្ថភាព។ ក្រុងប៉េកាំង មិនបានទទួលស្គាល់តៃវ៉ាន់ ថាជារដ្ឋឯករាជ្យឡើយ ដោយគ្រាន់តែចាត់ទុកជាខេត្តមួយរបស់ខ្លួនប៉ុណ្ណោះ។

សូមជម្រាបថា សន្និសីទ PALS គឺជាការប្រមូលផ្តុំនូវមេបញ្ជាការយោធាមកពីបណ្តាប្រទេសសម្ព័ន្ធមិត្តអាមេរិកចំនួន២០ នៅក្នុងតំបន់ឥណ្ឌូ-ប៉ាស៊ីហ្វិក ដើម្បីពិភាក្សាអំពីប្រតិបត្តិការយោធាទាំងផ្លូវទឹក គោក និងអាកាស ជាមួយនឹងគោលបំណងរក្សា និងការបង្កើតទំនាក់ទំនងក្នុងតំបន់ ព្រមទាំងកិច្ចពិភាក្សាអំពីទិដ្ឋភាពសំខាន់ៗលើការអភិវឌ្ឍសមត្ថភាព ការឆ្លើយតបនឹងវិបត្តិ និងអន្តរប្រតិបត្តិការជាដើម៕

ប្រភព៖ Sputnik News ប្រែសម្រួល៖ សំភី