មេដឹកនាំអ៊ីរ៉ង់ ប្រាប់នាយករដ្ឋមន្រ្តីជប៉ុន ថាប្រទេសលោកគ្មានបំណងផលិតអាវុធនុយក្លេអ៊ែរទេ

2019-06-14 04:37:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មេដឹកនាំកំពូលអ៊ីរ៉ង់ លោក Ayatollah Ali Khamenei បានបញ្ជាក់ប្រាប់នាយករដ្ឋមន្រ្តីជប៉ុន លោក ស៊ីនហ្សូ អាបេ ថាអ៊ីរ៉ង់គ្មានបំណងបង្កើត ឬប្រើប្រាស់អាវុធនុយក្លេអ៊ែរឡើយ។ នេះបើតាមការថ្លែងរបស់លោក អាបេ ទៅកាន់អ្នកកាសែត ក្រោយជំនួបពិភាក្សានេះ កាលពីថ្ងៃទី១៣ ខែមិថុនា ឆ្នាំ២០១៩ នៅក្រុងតេហេរ៉ង់។

រូបថត៖ AP

លោក អាបេ ជានាយករដ្ឋមន្រ្តីជប៉ុនទី១ ដែលបានធ្វើទស្សនកិច្ចនៅអ៊ីរ៉ង់ ក្នុងរយៈពេល ៤១ឆ្នាំមកនេះ។ ដំណើរទស្សនកិច្ចលើកនេះ គឺលោកមានគោលបំណងបន្ថយភាពតានតឹងរវាងអ៊ីរ៉ង់ និងអាមេរិក។

លោក អាបេ បានលើកយកសម្តីលោកប្រធានាធិបតីអាមេរិក ដូណាល់ ត្រាំ ប្រាប់មេដឹកនាំកំពូលអ៊ីរ៉ង់ថា គាត់ (ដូណាល់ត្រាំ) មិនចង់ឱ្យមានការកើនឡើងនៃស្ថានភាពនេះទេ។

យ៉ាងណាមិញក្រោយជំនួបនេះ លោក Ayatollah Ali Khamenei បានចេញសេចក្តីថ្លែងការណ៍មួយបញ្ជាក់ថា លោកនឹងមិនឆ្លើយតបទៅលោក ដូណាល់ ត្រាំ ឡើយ ដោយថាលោកពុំមែនជាអ្នកដែលឆ្លើយឆ្លងសារជាមួយលោកត្រាំឡើយ។ នាយករដ្ឋមន្រ្តីជប៉ុន បានប្រាប់រូបលោកថា អាមេរិក ត្រៀមចរចាយ៉ាងសម្ងាត់ជាមួយអ៊ីរ៉ង់ ប៉ុន្តែរូបលោក (Ayatollah Ali Khamenei) មិនអាចជឿជាក់លើអាមេរិកបានឡើយ។

សូមជម្រាបដែរថា កាលពីថ្ងៃទី១២ ខែមិថុនា លោក អាបេ ក៏បានជួបជាមួយនាយករដ្ឋមន្រ្តីអ៊ីរ៉ង់ លោក Hassan Rouhani ផងដែរ។ លោកអាបេ បានថ្លែងក្នុងសន្និសីទស្តីពីជំនួបនេះថា អ៊ីរ៉ង់ មានតួនាទីសំខាន់ណាស់ក្នុងការកសាងសន្តិភាព និងស្ថិរភាពក្នុងតំបន់មជ្ឈិមបូព៌ា។

«បច្ចុប្បន្ន ភាពតានតឹងកំពុងកើនឡើងខ្លាំងនៅមជ្ឈិមបូព៌ា។ អ្នកជំនាញព្រមានថា ការប៉ះទង្គិចគ្នាអាចនឹងបង្កឱ្យមានគ្រោះថ្នាក់ធ្ងន់ធ្ងរ។ ការប៉ះទង្គិចគ្នាដោយអាវុធ ត្រូវតែជៀសវាងដោយគ្រប់វិធីដាច់ខាត»។ នេះជាការថ្លែងរបស់នាយករដ្ឋមន្រ្តីជប៉ុន៕

ប្រភព៖ Japantimes ប្រែសម្រួល៖ សំភី