កម្ពុជា-ជប៉ុន គ្រោងសិក្សាកំណត់ផ្លូវសម្រាប់រថយន្តក្រុងសាធារណៈធ្វើដំណើរដោយគ្មានការរំខាន
- 2019-06-19 07:18:52
- ចំនួនមតិ 0 | ចំនួនចែករំលែក 0
កម្ពុជា-ជប៉ុន គ្រោងសិក្សាកំណត់ផ្លូវសម្រាប់រថយន្តក្រុងសាធារណៈធ្វើដំណើរដោយគ្មានការរំខាន
ចន្លោះមិនឃើញ
លោក ឃួង ស្រេង អភិបាលរាជធានីភ្នំពេញ បានបញ្ជាក់ថា រដ្ឋបាលរាជធានីភ្នំពេញ នឹងចាត់ក្រុមអ្នកជំនាញចុះសិក្សាជាមួយភាគីជប៉ុន ដើម្បីកំណត់បណ្តាញផ្លូវមួយចំនួនជាផ្លូវឯកទិស និងផ្លូវ អាទិភាពសម្រាប់រថយន្តក្រុងសាធារណៈធ្វើដំណើរដោយគ្មានការរំខាន និងឧបសគ្គអ្វីមួយកើតឡើងឡើយ។ នេះបើតាមការចុះផ្សាយរបស់ក្រសួងព័ត៌មាន។
ថ្លែងក្នុងពិធីសម្ពោធដាក់ឲ្យប្រើប្រាស់ស្ថានីយចំណតរថយន្តក្រុង និងទទួលរថយន្តក្រុង ៨០គ្រឿងពីរដ្ឋាភិបាលជប៉ុននៅព្រឹកថ្ងៃទី១៩ ខែមិថុនា ឆ្នាំ២០១៩ លោក ឃួង ស្រេង បានអះអាងថា ការកំណត់ផ្លូវអាទិភាពសម្រាប់រថយន្តក្រុងសាធារណៈនេះ គឺដើម្បីកែលម្អប្រព័ន្ធដឹកជញ្ជូនតាមរយៈមធ្យោបាយសាធារណៈរួមមួយនេះ ឱ្យកាន់តែទទួលបានប្រជាប្រិយភាព ពោលគឺទាក់ទាញអ្នកជិះឱ្យបានកាន់តែច្រើន ដែលជួយកាត់បន្ថយការប្រើប្រាស់មធ្យោបាយផ្ទាល់ខ្លួនសំដៅរំដោះការកកស្ទះចរាចរណ៍យ៉ាងមានប្រសិទ្ធិភាព។
លោកអភិបាលបន្ថែមថា រដ្ឋបាលរាជធានីភ្នំពេញនឹងពន្លឿនការធ្វើកិច្ចការនេះ ឱ្យបានឆាប់ជាទីបំផុតដើម្បីដោះស្រាយបញ្ហាកកស្ទះចរាចរណ៍ ដែលកំពុងកើតឡើងជាញឹកញាប់នៅក្នុងរាជធានីភ្នំពេញ ហើយកាត់បន្ថយការរំខានដល់ការធ្វើដំណើររបស់ប្រជាពលរដ្ឋប្រកដោយភាពងាយ ស្រួល និងធានាសុវត្ថិភាព។
លោក ហូរីណូអ៊ូជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជាបានមានប្រសាសន៍ក្នុងពិធីនេះថា មធ្យោបាយដឹកជញ្ជូនតាមរយៈរថយន្តក្រុង គឺមានផលប្រយោជន៍ច្រើនសម្រាប់ទីក្រុង និងមានសុវត្ថិភាព សម្រាប់អ្នកដំណើរ។ ដូច្នេះការគាំទ្ររបស់ប្រជាពលរដ្ឋនឹងជួយជំរុញឱ្យរាជធានីភ្នំពេញ ដោះស្រាយបានបញ្ហាកកស្ទះចរាចរណ៍។
សូមជម្រាបថា មកដល់ពេលនេះរដ្ឋបាលរាជធានីភ្នំពេញ បានដាក់ឱ្យដំណើរការសេវារថយន្តក្រុងសាធារណៈបានចំនួន ១៣ខ្សែនៅតាមបណ្តាផ្លូវសំខាន់ៗក្នុងរាជធានីភ្នំពេញ ហើយជាមធ្យមក្នុងមួយថ្ងៃៗមានប្រជាពលរដ្ឋធ្វើដំណើរតាមរយៈសេវាមួយនេះ ចន្លោះពី ២ម៉ឺន៦ពាន់នាក់ ទៅ៣ម៉ឺននាក់៕