លោក ស៊ុន ចាន់ថុល៖ ក្រុមហ៊ុនចិន កំពុងសិក្សាសង់ស្ពាន២ឆ្លងកាត់ទន្លេមេគង្គ

2019-06-26 02:00:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានបង្ហើបឱ្យដឹងថា ក្រុមហ៊ុនចិន២ កំពុងសិក្សាសាងសង់ស្ពានចំនួន២ទៀតឆ្លងកាត់ទន្លេមេគង្គ ប៉ុន្តែលោកមិនបានបញ្ជាក់លម្អិតអំពីទីតាំងនៃការសាងសង់ស្ពាននេះទេ។

ថ្លែងទៅកាន់អ្នកកាសែតក្រោយពិធីចុះហត្ថលេខាលើកិច្ចសន្យាសាងសង់គម្រោងធ្វើឱ្យប្រសើរឡើងវិញផ្លូវជាតិលេខ២ និងលេខ២២ រវាងក្រសួងសាធារណការ និងក្រុមហ៊ុនកូរ៉េ កាលពីថ្ងៃទី២៥ ខែមិថុនា ឆ្នាំ២០១៩ លោក ស៊ុន ចាន់ថុល បានលើកឡើងយ៉ាងដូច្នេះថា៖ «យើងសិក្សាស្ពាន២ឆ្លងកាត់ទន្លេមេគង្គ ដោយក្រុមហ៊ុនចិន។ ក៏ប៉ុន្តែមិត្តកូរ៉េលោកថា នៅភ្នំពេញនេះ មានស្ពានមិត្តភាពចិនផង មានស្ពានមិត្តភាពកម្ពុជា-ជប៉ុនផង ដូចចង់ឱ្យមួយដែរ ស្ពានមិត្តភាពកម្ពុជា-កូរ៉េ។ ប៉ុន្តែមកដល់ម៉ោងនេះ មិនទាន់មានការចរចាឈានទៅរកថវិកា ជំនួយឥតសំណងនៅឡើយទេ»។

សូមជម្រាបថា គិតមកដល់ពេលនេះ ស្ពានដែលចិនបានសាងសង់រួចនៅកម្ពុជា មានចំនួន៧ រួមមាន៖ ស្ពានកោះធំ (ខេត្តកណ្តាល), ស្ពានជ្រោយចង្វារទី២, ស្ពានសេកុង (ខេត្តស្ទឹងត្រែង), ស្ពានព្រែកក្តាម, ស្ពានព្រែកតាម៉ាក់, ស្ពានមេគង្គស្ទឹងត្រែង និងស្ពានព្រែកសំរោង (ក្រុងតាខ្មៅ)។ បច្ចុប្បន្នចិនក៏កំពុងជួយសាងសង់ស្ពាន ស្ទឹងត្រង់-ក្រូចឆ្មារផងដែរ។

ស្ពានមេគង្គស្ទឹងត្រែង

កាលពីខែមេសា ឆ្នាំ២០១៨ សម្តេចនាយករដ្ឋមន្រ្តី ហ៊ុន សែន បានប្រកាសឱ្យមានការសាងសង់ស្ពានឆ្លងកាត់ទន្លេមេគង្គភ្ជាប់ពីទីរួមខេត្តក្រចេះ ទៅកាន់ខេត្តកំពង់ធំ និងសៀមរាប ដើម្បីកាត់បន្ថយការចំណាយ និងចំណេញពេលវេលាក្នុងការធ្វើដំណើរទៅមករវាងខេត្តទាំងនេះ៕

អត្ថបទ៖ សំភី