លោក គួច ចំរើន ប្រាប់វិនិយោគិនចិន ពីការងារដំបូងដែលត្រូវធ្វើក្នុងនាមជាអភិបាលខេត្តព្រះសីហនុថ្មី
- 2019-06-30 07:28:14
- ចំនួនមតិ 0 | ចំនួនចែករំលែក 0
លោក គួច ចំរើន ប្រាប់វិនិយោគិនចិន ពីការងារដំបូងដែលត្រូវធ្វើក្នុងនាមជាអភិបាលខេត្តព្រះសីហនុថ្មី
ចន្លោះមិនឃើញ
លោក គួច ចំរើន អភិបាលខេត្តព្រះសីហនុ បានបញ្ជាក់ថា ក្នុងអាណត្តិថ្មីរបស់លោកមកកាន់ជាអភិបាលខេត្តព្រះសីហនុ ការងារដំបូង គឺចាប់ផ្តើមពិនិត្យការងារសន្តិសុខ សុវត្ថិភាពសាធារណៈ និងគម្រោងសាងសង់ផ្លូវមួយខ្សែ ចាប់ពីព្រលានយន្តហោះអន្តរជាតិកងកេង ទៅក្រុងព្រះសីហនុ ដើម្បីជួយរំដោះ និងសម្រួលការកកស្ទះចរាចរណ៍ររបស់ប្រជាពលរដ្ឋ និងភ្ញៀវទេសចរតាមផ្លូវជាតិលេខ៤ ខណៈដែលខេត្តនេះ មានការអភិវឌ្ឍយ៉ាងគំហុក រួមទាំងបញ្ហាកំណើនយានយន្តដឹកជញ្ជូន មានការកើនឡើង។ កំណើនចរាចរណ៍នេះ ក៏បានធ្វើឱ្យខូចខាតផ្លូវមួយចំនួនក្នុងក្រុងព្រះសីហនុផងដែរ។
ការថ្លែងខាងលើនេះ ធ្វើឡើងក្នុងជំនួបរវាងលោក គួច ចំរើន និងសមាគមអ្នកសារព័ត៌មានកម្ពុជា-ចិន និងគណៈប្រតិភូវិនិយោគចិន ដឹកនាំដោយគឺលោក សយ សុភាព និងលោក LIUXIAO GUANG ដែលសហប្រធានសមាគម នាព្រឹកថ្ងៃទី៣០ ខែមិថុនា ឆ្នាំ២០១៩។
លោកអភិបាលខេត្តព្រះសីហនុ បានសំណូមពរឱ្យគណៈប្រតិភូវិនិយោគិនចិន ក្នុងខេត្តព្រះសីហនុ ធ្វើយ៉ាងណាជួយសហការគាំទ្រការអភិវឌ្ឍខេត្ត និងរៀបចំសណ្ដាប់ធ្នាប់ របៀបរៀបរយឱ្យកាន់តែល្អប្រសើរឡើងវិញ ។
ក្នុងឱកាសជំនួបនេះ គណៈប្រតិភូវិនិយោគិនចិន ក្នុងខេត្តព្រះសីហនុ បានគាំទ្រនូវគម្រោងផែនការរបស់លោកអភិបាលខេត្ត ក្នុងការស្ថាបនាកែលម្អសោភ័ណភាព ហេដ្ឋារចនាសម្ព័ន្ធ និងបរិស្ថានខេត្តព្រះសីហនុ ព្រមទាំងនាំយកនូវថវិកាមួយចំនួនជូនរដ្ឋបាលខេត្តព្រះសីហនុ ដើម្បីបន្តដោះស្រាយបញ្ហាករណីដួលរលំបាក់អគារកណ្ដាលក្រុងព្រះសីហនុ កាលពីកន្លងមកថ្មីៗនេះផងដែរ។
ជាការឆ្លើយតបភ្លាមៗ គណៈប្រតិភូវិនិយោគិនចិន បានប្តេជ្ញាជួយរួមចំណែកជាមួយរដ្ឋបាលខេត្ត ដើម្បីសាងសង់ផ្លូវមួយខ្សែនេះផងដែរ ដើម្បីជួយសម្រួល និងកាត់បន្ថយការកកស្ទះចរាចរណ៍តាមផ្លូវជាតិលេខ៤៕
អត្ថបទ និងរូបថត៖ រដ្ឋបាលខេត្តព្រះសីហនុ