PSG នឹងចាត់វិធានការលើ Neymar ដែលមិនបានបង្ហាញខ្លួនក្នុងថ្ងៃហ្វឹកហាត់ដំបូង
- 2019-07-09 01:52:20
- ចំនួនមតិ 0 | ចំនួនចែករំលែក 0
PSG នឹងចាត់វិធានការលើ Neymar ដែលមិនបានបង្ហាញខ្លួនក្នុងថ្ងៃហ្វឹកហាត់ដំបូង
ចន្លោះមិនឃើញ
Paris St-Germain បានអះអាងថាក្លឹបនឹងចាត់វិធានការដ៏សមស្របមួយ ក្រោយខ្សែប្រយុទ្ធប្រេស៊ីល Neymar មិនបង្ហាញខ្លួនក្នុងថ្ងៃដំបូងនៃការហ្វឹកហាត់ Pre-season។
PSG បានឲ្យដឹងក្នុងសេចក្ដីថ្លែងការណ៍របស់ខ្លួនថា៖ "Neymar Jr មិនបានបង្ហាញខ្លួនពេលហ្វឹកហាត់ តាមពេលវេលា និងទីកន្លែង ដែលបានព្រមព្រៀងនោះទេ។ នេះជាអវត្តមាន ដែលក្លឹបមិនបានដឹងមុន។ ក្លឹបមានការសោកស្ដាយណាស់ ចំពោះហេតុការណ៍នេះ"។
យ៉ាងណាក្ដី កាសែត Fox Sports Brazil បានដកស្រង់សម្ដីលោក Neymar Sr ដែលជាឪពុករបស់ Neymar ថា ខ្សែប្រយុទ្ធវ័យ ២៧ឆ្នាំរូបនេះ កំពុងជាប់ភារកិច្ចសប្បុរសធម៌ ហើយក្លឹប PSG ក៏បានដឹងរឿងនេះដែរ។ លោកថា កូនរបស់លោក បានរៀបចំផែនការសប្បុរសធម៌នៅវិទ្យាស្ថាន Neymar Institute មួយឆ្នាំមកហើយ ហើយក្លឹបក៏បានដឹងដែរ។ លោកបញ្ជាក់ថា កម្មវិធីសប្បុរសធម៌នោះ មិនអាចលុបចោលបានទេ ហើយ Neymar នឹងទៅ PSG នាថ្ងៃទី១៥ ខែកក្កដា។
សូមបញ្ជាក់ថា Neymar ត្រូវបានគេរំពឹងថា នឹងវិលទៅកាន់ទ្រនំចាស់ Barcelona វិញ ក្រោយចូល PSG កាលពីខែសីហា ឆ្នាំ២០១៧។ កីឡាកររូបនេះ ស៊ុតចូល ៣៤គ្រាប់ ក្នុងការបង្ហាញខ្លួន ៣៧ប្រកួតនៅលីគកំពូលបារាំង៕