បែកធ្លាយរូបភាពទាហានអាមេរិក ស្វែងយល់ពីរបៀបរត់គេចរបស់ក្រុមអ្នកសម្រុកចូល Area 51

2019-07-22 04:38:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រូបភាពទាហានអាមេរិក ដែលកំពុងស្វែងយល់ពីរបៀបរត់គេចរបស់ក្រុមអ្នកចូលរួមដែលគ្រោងសម្រុកចូលតំបន់សម្ងាត់៥១ «Area 51» ក្នុងរដ្ឋ Nevadaត្រូវបានបែកធ្លាយនៅលើបណ្តាញសង្គម ខណៈដែលមានអ្នកចុះឈ្មោះចូលរួមតាមបណ្តាញអនឡាញកើនឡើងដល់ប្រមាណ ១,៨លាននាក់។

ក្នុងរូបភាពនេះបង្ហាញថា ទាហានអាមេរិកម្នាក់ បានចង្អុលទៅលើស្លាយ ដោយក្នុងស្លាយនោះគឺមានរូបភាព២សងខាង។ រូបខាងឆ្វេងជារូបដែលមនុស្ស១ក្រុមរត់ដាក់សំកាងដៃទៅខាងក្រោយ ដូចនឹងរូបតុក្កតាជប៉ុន Naruto ដែលនៅខាងស្តាំនៃស្លាយនេះ។ បន្ទាប់មកទាហានរូបនោះ ក៏ធ្វើត្រាប់តាមឱ្យអ្នកផ្សេងទៀតមើល។

យោងតាមអ្នករៀបចំព្រឹត្តិការណ៍សម្រុកចូលតំបន់៥១ អះអាងថា វិធីតែមួយគត់ដើម្បីជោគជ័យក្នុងការដោះលែងមនុស្សក្រៅភព ដែលត្រូវបានគេសង្ស័យថាលាក់ទុកក្នុងតំបន់៥១នេះ គឺប្រើប្រាស់របៀបរត់បែប Naruto។ «ប្រសិនបើយើងរត់បែប Naruto យើងអាចរត់លឿនជាងគ្រាប់កាំភ្លើងរបស់ពួកគេ (ទាហាន)។ ចាំជួបមនុស្សក្រៅភពទាំងអស់គ្នា

សូមជម្រាបថា ព្រឹត្តិការណ៍ចូលទៅកាន់តំបន់៥១ ឬ Storm Area 51 គ្រោងនឹងធ្វើឡើងនៅម៉ោង ៣ព្រឹកទាបភ្លឺថ្ងៃទី២០ ខែកញ្ញា ឆ្នាំ២០១៩។ សណ្ឋាគារនៅតំបន់នោះ ត្រូវបានគេរាយការណ៍ថា កក់ពេញអស់ទៅហើយ ដោយបង្ខំឱ្យអ្នកចូលរួមជាច្រើនត្រូវបោះតង់។

យ៉ាងណាមិញ ចំពោះគម្រោងនេះ ត្រូវបានអ្នកនាំពាក្យកងទ័ពអាកាសអាមេរិកព្រមានថា នឹងចាត់វិធានការទប់ស្កាត់មិនឱ្យពួកគេចូលតំបន់សម្ងាត់នេះបានឡើយ។ «ការប៉ុនប៉ងណាមួយ ចូលតំបន់ហ្វឹកហ្វឺនយោធាដោយខុសច្បាប់ គឺជាគ្រោះថ្នាក់»។

រូបថត៖ today.com

តំបន់៥១ ត្រូវបានគេជឿជាក់ថា ជាកន្លែងផ្ទុកឯកសារដែលផ្តល់នូវភស្តុតាងពីមនុស្សក្រៅភព។ មូលដ្ឋាននេះ ត្រូវបានប្រើប្រាស់ដោយកងទ័ពអាកាសអាមេរិក ក្នុងនោះក៏ធ្លាប់ត្រូវគេរាយការណ៍ថា យន្តហោះទម្លាក់គ្រាប់បែក B-2 បានធ្វើតេស្តនៅតំបន់នេះផងដែរ៕

ប្រភព៖ Sputnik News ប្រែសម្រួល៖ សំភី