អ្នកស្រាវជ្រាវជប៉ុនចំណាយពេលជាង២០ឆ្នាំ រកឃើញថា ប្រាសាទខ្មែរមានលក្ខណៈអស្ចារ្យច្រើន
- 2019-08-22 07:44:12
- ចំនួនមតិ 0 | ចំនួនចែករំលែក 0
អ្នកស្រាវជ្រាវជប៉ុនចំណាយពេលជាង២០ឆ្នាំ រកឃើញថា ប្រាសាទខ្មែរមានលក្ខណៈអស្ចារ្យច្រើន
ចន្លោះមិនឃើញ
អ្នកស្រាវជ្រាវជនជាតិជប៉ុនបានចូលរួមជួយជួសជុល និងស្ដារឡើងវិញ នៅប្រាសាទជាច្រើនមួយចំនួននៅក្នុងប្រទេសកម្ពុជា ចាប់តាំងពីឆ្នាំ ១៩៩៤ មកដល់ពេលបច្ចុប្បន្ននេះ។ អំឡុងពេល នៃការមកស្រាវជ្រាវ និងជួសជុល ២៥ឆ្នាំមកនេះ អ្នកស្រាវជ្រាវជប៉ុនរកឃើញភាពអស្ចារ្យជាច្រើនរបស់ប្រាសាទខ្មែរ? ភាពអស្ចារ្យទាំងនោះមានអ្វីខ្លះ?
លោកបណ្ឌិត តាកេស៊ី ណាកាហ្គាវ៉ា សហប្រធាន នៃគម្រោងជប៉ុន-អប្សរាការពារប្រាសាទអង្គរ និងជាសាស្ត្រាចារ្យកិត្តិយសនៃ សាកលវិទ្យាល័យវ៉ាសេដា នៃប្រទេសជប៉ុន បានធ្វើបទបង្ហាញមួយនៅចំពោះមុខអ្នកសារព័ត៌មានខ្មែរ នៅស្ថានទូតជប៉ុនកាលពីព្រឹកថ្ងៃទី ២២ សីហា ២០១៩ថា ប្រាសាទខ្មែរភាគច្រើនបានកសាងប្រាសាទដោយប្រើប្រាស់គ្រឹះផ្អែកលើការចាក់ខ្សាច់ជាទម្រសំខាន់ ដោយផ្ទុយពីសំណង់សម័យថ្មី ផ្អែកលើស៊ីម៉ងត៍ និងសរសៃដែក។ បុព្វបុរសខ្មែរប្រើប្រាស់ខ្សាច់ និងរចនាសម្ព័ន្ធមួយចំនួន ធ្វើឲ្យប្រាសាទអាចលំនឹងរាប់ពាន់ឆ្នាំ ហើយបើមានការថែទាំថែមទៀតកាន់តែមានអាយុកាលយូរ ដូចជាប្រាសាទបាយ័ន បានសាងសង់ខ្ពស់ជាដើម។
ក្រៅពីភាពរឹងមាំនៃការចាក់គ្រឹះប្រាសាទ ការរៀបប្រាសាទដោយបន្តុបគ្មានស៊ីម៉ងត៍ គឺបុព្វបុរសខ្មែរ បានរៀបចំប្រាសាទគិតគូរស៊ីជម្រៅ អំពីអាកាសធាតុ (រដូវក្ដៅ៦ខែ រដូវវស្សា៦ខែ) ច្បាស់លាស់ ស្របតាមជីវភាពរស់នៅ ជំនឿសាសនា និងតំបន់ផងដែរ។
តាមរយៈអ្នកបកប្រែ លោកបណ្ឌិត បានរៀបរាប់ថា ប្រាសាទនិមួយៗ មានចំណុចពិសេសត្រង់មានអង្កត់ផ្ចិតច្បាស់លាស់ ពីប្រាសាទមួយទៅប្រាសាទមួយ ហើយមានរឿងរ៉ាវតគ្នា ពីប្រាសាទមួយទៅប្រាសាទមួយ ដែលអាចឲ្យក្មេងជំនាន់ក្រោយសិក្សាស្វែងយល់អំពីប្រវត្តិសាស្ត្របាន។
«រាប់ពីប្រាសាទបឹងមាលា មកប្រាសាទព្រះខណ្ឌ អ័ក្ខត្រង់។ អង្គរវត្ត ទៅកោះកែរ ស្ថិតនៅខេត្តព្រះវិហារ ហើយភ្ជាប់មកតំបន់សំបូរព្រៃគុក រកឃើញថាមានបន្ទាត់កែង ៩០ដឺក្រេតែម្ដង។ អ្វីដែលចម្លែកនោះនៅត្រង់ថា សម័យឥលូវគេពឹងផ្អែកលើ ជីភីអេស (GPS) ប៉ុន្តែសម័យមុនគេផ្អែកលើតារាសាស្ត្រ ដូចជានៅអេស៊ីបជាដើម។ តើកម្ពុជាបានគិតដូចម្ដេចអំពីទីតាំង»? នេះជាអ្វីដែលអ្នកបកប្រែដកស្រង់សម្ដី របស់លោកបណ្ឌិត តាកេស៊ី ណាកាហ្គាវ៉ា។
សូមជម្រាបជូនថា លោកបណ្ឌិត ណាកាហ្គាវ៉ា បានចូលរួមចំណែកជំរុញការផ្លាស់ប្ដូរក្នុងផ្នែកអប់រំរវាងប្រទេសជប៉ុន និងកម្ពុជាតាមរយៈការជួសជុល និងស្ដារឡើងវិញនៃអង្គរ ជាពិសេសប្រាសាទបាយ័ន ក្នុងនាមលោកជាប្រធានក្រុម រដ្ឋាភិបាលជប៉ុនសម្រាប់ការថែរក្សាការពារប្រាសាទអង្គរ (JSA) ចាប់តាំងពីបង្កើតឡើងនៅឆ្នាំ ១៩៩៤ និងក្នុងនាមជាប្រធាន នៃគម្រោងជប៉ុន-អប្សរាការពារប្រាសាទអង្គរ ចាប់ពីឆ្នាំ ២០០៥ ព្រមទាំងបណ្ដុះបណ្ដាលអ្នកជំនាញបច្ចេកទេសកម្ពុជាជាច្រើនរូបសម្រាប់គម្រោងអង្គរជាង ២៥ឆ្នាំមកនេះ។
លោកបណ្ឌិត ណាកាហ្គាវ៉ា ក៏បានចូលរួមចំណែកលើការថែរក្សាការស្ដារឡើងវិញ និងសកម្មភាពស្រាវជ្រាវប្រាសាទព្រះវិហារ និងសំបូរព្រៃគុក ដែលជាបេតិកភណ្ឌពិភពលោក នៃអង្គការយូណេស្កូ របស់កម្ពុជាក្នុងនាមលោកជាប្រធានក្រុម នៃសាកលវិទ្យាល័យវ៉ាសេដា។
អស់រយៈពេល ២៥ឆ្នាំ ដែលលោកបណ្ឌិតបានសិក្សាស្រាវជ្រាវ និងការចូលរួមជួសជុលប្រាសាទខ្មែរ បានកត់សម្គាល់ឃើញថា ប្រទេសកម្ពុជាមានឥទ្ធិពលពីឥណ្ឌា ប៉ុន្ដែកម្ពុជាមិនបានចម្លងផ្ទាល់នោះទេ ប៉ុន្ដែកម្ពុជាចម្លងត្រឹមតែទស្សនៈ ហើយច្នៃធ្វើជារបស់ខ្លួនឯង ដែលទៅប្រទេសដើមមិនមាននោះទេ។ «ឥណ្ឌាមានឥទ្ធិពលមកក្នុងតំបន់អាស៊ីអាគ្នេយ៍ ហើយចិនផ្សព្វផ្សាយអរិយធម៌ទៅតំបន់ភាគខាងកើត។ ប្រាសាទខ្មែរបានធ្វើឲ្យស៊ីគ្នាតាមរយៈតំបន់ផង និងមានភាពជាម្ចាស់ខ្លួនឯងផង»។
ក្រុមរដ្ឋាភិបាលជប៉ុន សម្រាប់ការថែរក្សាការពារប្រាសាទ (JSA) ត្រូវបានបង្កើតឡើងនៅឆ្នាំ ១៩៩៤ ដោយរដ្ឋាភិបាលជប៉ុនក្រោមការឧបត្ថម្ភគាំទ្រពីអង្គការ UNESCO និងមូលនិធិរបស់ប្រទេសជប៉ុនសម្រាប់ការអភិរក្សបេតិកភណ្ឌវប្បធម៌ពិភពលោក។ ចាប់ពីដំណាក់កាលទី៣ គម្រោង JSA បានអនុវត្តន៍ការងាររួមគ្នាជាមួយអាជ្ញាធរជាតិអប្សរា និងបានផ្ទេរសកម្មភាពដឹកនាំការងារដល់បុគ្គលិកកម្ពុជាដោយប្ដូរឈ្មោះទៅជាគម្រោងជប៉ុន-អប្សរាការពារប្រាសាទអង្គរ (JASA)។
ការជួសជុលឡើងវិញត្រូវបានអនុវត្តន៍នៅប្រាសាទបាយ័នប្រាសាទអង្គរវត្ត និងប្រាសាទសួព្រ័ត្រ។ អ្នកឯកទេសជនជាតិជប៉ុនច្រើនជាង ១ ១០០ នាក់ មកពីស្ថាប័នសិក្សាស្រាវជ្រាវនានា ត្រូវបានបញ្ជូនឲ្យចូលរួមក្នុងសកម្មភាពអភិរក្សប្រាសាទមួយអ្នកជំនាញ និងសិប្បករកម្ពុជាជាង ៣៥០នាក់។ ការគាំទ្ររបស់ជប៉ុនចំពោះប្រាសាទអង្គរ គឺជាទស្សនមួយដើម្បីជំរុញឲ្យប្រជាជនកម្ពុជាអាចដឹកនាំសកម្មភាពការងារជួសជុលប្រាសាទដោយខ្លួនឯង។ រាល់កំណត់ត្រាទាំងឡាយស្ដីពីសកម្មភាពការងារអភិរក្ស និងជួសជុលប្រាសាទបានបើកចំហជាសាធារណៈសម្រាប់ការស្រាវជ្រាវដើម្បីផ្លាស់ប្ដូរ នូវគំនិតយោបល់ និងព័ត៌មានផ្សេងៗ៕