រឿងផ្លូវជាតិលេខ៣ ហុយខ្លាំង! រដ្ឋមន្រ្តីសាធារណការ បញ្ជាក់បែបនេះ
- 2019-10-28 03:13:48
- ចំនួនមតិ 0 | ចំនួនចែករំលែក 0
រឿងផ្លូវជាតិលេខ៣ ហុយខ្លាំង! រដ្ឋមន្រ្តីសាធារណការ បញ្ជាក់បែបនេះ
ចន្លោះមិនឃើញ
លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីសាធារណការ និងដឹកជញ្ជូន បានបញ្ជាក់ថា ចំពោះផ្លូវជាតិលេខ៣ ដែលកំពុងមានការហុយដីខ្លាំង គឺលោកបានជំរុញឱ្យក្រុមហ៊ុនសាងសង់ ស្រោចទឹកឱ្យបានញឹកញាប់ ដើម្បីកាត់បន្ថយការហ៊ុយ។ ការថ្លែងនេះ ធ្វើឡើងក្នុងពេលលោកចុះត្រួតពិនិត្យស្ថានភាពកំណាត់ផ្លូវជាតិលេខ៣ កាលពីថ្ងៃទី២៧ ខែតុលា ឆ្នាំ២០១៩។
លោកទេសរដ្ឋមន្រ្តី បានមានប្រសាសន៍ទៅកាន់អ្នកសារព័ត៌មានយ៉ាងដូច្នេះថា៖ «ធម្មតាតែធ្វើផ្លូវ វាត្រូវហុយហើយ ប៉ុន្តែយើងឱ្យក្រុមហ៊ុនស្រោចទឹកឱ្យបានញឹកញាប់ទៅ វាកាត់បន្ថយការហុយរបស់យើងដែរ»។
កំណាត់ផ្លូវជាតិលេខ៣ (ភ្នំពេញ-កំពត) មានប្រវែងសរុប១៣៤,៧៩៦គីឡូម៉ែត្រ ដោយក្នុងនោះប្រវែង៦៩គីឡូម៉ែត្រ ចាប់ពីចោមចៅ ដល់បែកគុស ត្រូវសាងសង់ជាផ្លូវ ៤គន្លង និងចាប់ពីបែកគុស ដល់ទីរួមខេត្តកំពត ប្រវែង ៦៥,៧៩៦ គីឡូម៉ែត្រ ត្រូវសាងសង់ជាផ្លូវ ២គន្លង។
គម្រោងនេះគ្រោងចំណាយថវិកាសរុបប្រមាណ ២១៩,៩១១ លានដុល្លារសហអាមេរិក ជាហិរញ្ញប្បទានសម្បទានពីសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សាងសង់ដោយក្រុមហ៊ុនសាជីវកម្មស្ពាន ថ្នល់ចិន ត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសសំណង់ ក្វាងចូវ វ៉ានអាន និងប្រើរយៈពេល៤៨ខែ៕
រូបថត៖ ក្រសួងសាធារណការ និងដឹកជញ្ជូន