ក្រុម​អ្នក​ស្រាវជ្រាវជប៉ុនមកពី​សាកលវិទ្យាល័យ Kanazawa បាន​អះអាងថា ទឹក​ដែល​មាន​នៅលើភព​អង្គារ កាលពី ៣,៥ពាន់លានឆ្នាំមុន គឺមានផ្ទុក​អំបិល និង​ជាតិរ៉ែ ដែល​ផ្តល់​នូវលក្ខខណ្ឌ​សមស្រប​សម្រាប់​ជីវិតរស់នៅ។ នេះ​បើតាមការ​ចុះផ្សាយរបស់​ Japan Times នៅថ្ងៃទី២៨ ខែតុលា ឆ្នាំ​២០១៩។

ការអះអាងខាង​លើ បន្ទាប់ពី​អ្នកវិទ្យាសាស្រ្ត​បាន​វិភាគទិន្ន័យលើ​រូបសំណាក​ដែលប្រមូលដោយ​យាន Curiosity របស់​អាមេរិក នៅលើ​ភពអង្គារ។ គេបាន​រកឃើញ​ភស្តុតាង​ថា ធ្លាប់​មានទឹក​នៅ​តំបន់រណ្តៅ Gale Crater លើភព​ក្រហម​នេះ។

តាម​ការវិភាគ​បង្ហាញ​ថា ទឹក​នៅលើ​ភពអង្គារ មាន​ចំណុះអំបិល ប្រហែល​១ភាគ៣ នៃ​កម្រិតទឹក​សមុទ្រ​លើផែនដី។ វាក៏មានផ្ទុកជាតិរ៉ែ​ច្រើនផងដែរ ដូចជា ម៉ាញេស្យូម​ជាដើម។

សូម​ជម្រាប​ថា យាន Curiosity របស់​អង្គការ NASA បាន​ចុះចត​ដំបូងគេ​បង្អស់​លើ​ផ្ទៃដីភពអង្គារ កាលពីថ្ងៃទី​៦ ខែសីហា ឆ្នាំ​២០១២។ ក្នុងរយៈពេល​ជាង ៧ឆ្នាំ​មកនេះ យាន Curiosity បាន​ធ្វើដំណើរ​លើផ្ទៃដីភពអង្គារ ២១គីឡូម៉ែត្រហើយ (ឡើងទួល ៣២៨ម៉ែត្រ) ពី​កន្លែងដែល​បានចុះចត។ ក្នុងនោះ​វាបាន​រកឃើញ​ថា ភពអង្គារមាន​លក្ខខណ្ឌ​ដែល​អាច​ទ្រទ្រង់​ដល់ជីវិត​អតិសុខុមប្រាណ កាលពី​អតីតកាល។

ទន្ទឹមនឹងនេះដែរ Curiosity កំពុង​ស្ថិតក្នុង​ដំណើរទៅតំបន់មួយ​ដែល​អ្នកវិទ្យាសាស្រ្ត​ហៅថា «The clay-bearing unit» ពោលគឺ​តំបន់នេះគឺជាអូរ និង​បឹង កាលពី​រាប់​ពាន់​លាន​ឆ្នាំមុន។ តំបន់នេះ ត្រូវបាន​អ្នកវិទ្យាសាស្រ្តអង្គការ​ណាសា​អង្កេត​ឃើញតាមរយៈយានអវកាស Mars Reconnaissance Orbiter (MRO) ជាងពីរបីឆ្នាំមុន​ការបាញ់បង្ហោះយាន Curiosity៕