សមត្ថកិច្ចចាប់ខ្លួនរដ្ឋមន្ត្រីក្រសួងកសិកម្មនៃរដ្ឋាភិបាលនិរទេសរបស់លោក សម សេរី
- 2019-10-31 01:18:32
- ចំនួនមតិ 0 | ចំនួនចែករំលែក 0
សមត្ថកិច្ចចាប់ខ្លួនរដ្ឋមន្ត្រីក្រសួងកសិកម្មនៃរដ្ឋាភិបាលនិរទេសរបស់លោក សម សេរី
ចន្លោះមិនឃើញ
ជនសង្ស័យ ឈ្មោះធុយ វី ហៅ ធុយ ឬទ្ធី រដ្ឋមន្ត្រីក្រសួងកសិកម្មនៃរដ្ឋាភិបាលនិរទេសរបស់លោកសម សេរី ត្រូវបានប៉េអឹមក្រុងចាប់ខ្លួនកាលពីថ្ងៃទី២៩ ខែតុលា ឆ្នាំ២០១៩ ។ ជនសង្ស័យដែលចាប់ខ្លួនឈ្មោះ ធុយ វី ហៅ ធុយ ឬទ្ធី ភេទប្រុស អាយុ៣០ឆ្នាំ មានស្រុកកំណើតនៅភូមិព្រៃទទឹង ឃុំភ្នំតូច ស្រុកមង្គលបុរី ខេត្តបន្ទាយមានជ័យ។
ជនសង្ស័យត្រូវបានបញ្ជូនទៅតុលាការកាលពីរសៀលថ្ងៃទី៣០ ខែតុលា ឆ្នាំ២០១៩។
លោកឧត្តមសេនីយ៍ឯក រ័ត្ន ស្រ៊ាង បានមានប្រសាសន៍ថា ដោយអនុវត្តតាមបទបញ្ជាដ៏ម៉ឹងម៉ាត់ របស់លោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស កម្លាំងកងរាជអាវុធហត្ថរាជធានីភ្នំពេញ បានយកចិត្តទុកដាក់ស្រាវជ្រាវករណីខាងលើ រហូតឈានដល់ការបង្ក្រាបបានជាក់ស្តែង។
ជនសង្ស័យអាយុ៣០ឆ្នាំរូបនេះ មានស្រុកកំណើតនៅភូមិព្រៃទទឹង ឃុំភ្នំតូចស្រុកមង្គលបុរី ខេត្តបន្ទាយមានជ័យ ត្រូវកម្លាំងជំនាញនៃកងរាជអាវុធហត្ថរាជធានីភ្នំពេញស្រាវជ្រាវរហូតឈានដល់ធ្វើការឃាត់ខ្លួនកាលពីថ្ងៃទី ២៩ ខែតុលា ឆ្នាំ២០១៩ តាមដីកាបញ្ជាឲ្យចូលខ្លួនរបស់តំណាងអយ្យការអមសាលាដំបូងរាជធានីភ្នំពេញ។
ជនសង្ស័យឈ្មោះ ធុយ វី ឬ ធុយ ឬទ្ធី នេះ បានចាកចេញទៅប្រទេសថៃ ដោយមានការផ្តូចផ្តើមពីឈ្មោះសម សេរី ជាមេចលនា រណសិរ្សរំដោះជាតិខ្មែរ និង ជានាយករដ្ឋមន្ត្រីនៃរដ្ឋាភិបាលនិរទេសជាតិខ្មែរខុសច្បាប់ ហើយឈ្មោះ ធុយ វី ធ្លាប់ត្រូវបានតែងតាំង ជាអ្នកនាំពាក្យរបស់រណសិរ្សរំដោះជាតិខ្មែរ និងជារដ្ឋមន្រ្តីក្រសួងកសិកម្មក្នុងរដ្ឋាភិបាលនិរទេសខុសច្បាប់របស់ សម សេរី ផងដែរ ។ .នៅក្នុងឆ្នាំ២០១៩ ឈ្មោះធុយ វី ត្រូវបាន សម សេរី តែងតាំងទៅជាអនុរដ្ឋមន្ត្រីក្រសួងវប្បធម៌ និងសាសនា វិញ។
ឈ្មោះ ធុយ វី បានបញ្ជាក់ថា រូបគេពិតជាបានចូលរួមក្នុងសកម្មភាពរួមគំនិតក្បត់ជាមួយ ក្រុមឧទ្ទាម សម សេរី និងក្រុម អតីត CNRP ពិតប្រាកដមែន ក្នុងនោះរូបគេបានចូលរួមក្នុងការប្រជុំទទួលផែនការនានា, រៀបចំឯកសារនិងសៀវភៅដែលមានខ្លឹមសារញុះញង់បង្កឲ្យមានចលាចលក្នុងសង្គម និងបានធ្វើការផ្សព្វផ្សាយខ្លឹមសារ នយោបាយ និង ស្ថានភាពនៅក្នុងស្រុកខ្មែរ ដោយផ្តោតលើ ការរិះគន់វាយប្រហារដល់រដ្ឋាភិបាលកម្ពុជាបច្ចុប្បន្ន តាមរយៈប្រព័ន្ធបណ្តាញសង្គមហ្វេសប៊ុក។
នៅប្រទេសថៃ ឈ្មោះ ធុយ វី និងសកម្មជននៃរណសិរ្សរំដោះជាតិខ្មែរចំនួន ៦៦នាក់ រួមនិងសកម្មជនអតីត CNRP ប្រមាណ៥០០នាក់ មានទាំងមេដឹកនាំអតីត CNRP ប្រចាំនៅខេត្តសមុទ្រប្រាកានប្រទេសថៃបានជួបជុំគ្នាដើម្បីរៀបចំផែនការ និងចាត់តាំងធ្វើសកមម្មភាព ដោយរួមទាំងការប្រមូលមូលនិធិរួមគ្នាជួយដល់ការធ្វេីដំណេីរវិលចូលស្រុករបស់ សម រង្ស៊ី នៅថ្ងៃទី៩ ខែវិច្ឆិកា ឆ្នាំ២០១៩ ដើម្បីអនុវត្តផែនការធ្វើរដ្ឋប្រហារ។ ឈ្មោះ ធុយ វី បានឆ្លើយបន្ថែមថា ចំពោះគូកននិងបក្ខពួករបស់ខ្លួន គឺនៅប្រទេសថៃទាំងអស់ មិនមាននៅកម្ពុជានោះទេ ហើយរូបគេតែងលួចចេញចូលមកប្រទេសកម្ពុជា តាមស្ថានភាពជាក់ស្តែងដែលអាចចូលបាន នៅពេលដែលមានកិច្ចការត្រូវធ្វេី ដេីម្បីយកទៅរាយការឱ្យ សម សេរី មុនពេលបង្ហោះតាមបណ្តាញសង្គម៕