ក្រសួងព្រមានដកហូតអំបិលដែលមិនបញ្ចូលជាតិអ៊ីយ៉ូត
- 2020-01-22 03:36:36
- ចំនួនមតិ 0 | ចំនួនចែករំលែក 0
ក្រសួងព្រមានដកហូតអំបិលដែលមិនបញ្ចូលជាតិអ៊ីយ៉ូត
ចន្លោះមិនឃើញ
សិក្ខាសាលាពិគ្រោះយោបល់ ស្តីពីការរៀបចំផែនការផលិតកម្មអំបិល និងការបញ្ចូលជាតិអ៊ីយ៉ូតក្នុងអំបិលសម្រាប់ឆ្នាំ២០២០ ក្រោមអធិបតីភាព លោក ចម ប្រសិទ្ធ ទេសរដ្ឋមន្រី្តរដ្ឋមន្ត្រីក្រសួងឧស្សាហកម្ម និងសិប្បកម្ម ធ្វើឡើងនៅព្រឹកថ្ងៃទី ២០ ខែមករា ឆ្នាំ២០២០ នៅទីស្តីការក្រសួង ។
លោកបណ្ឌិត ចម ប្រសិទ្ បានបញ្ជាក់ថា អំបិលមានសារ:ប្រយោជន៍សម្រាប់មនុស្ស សត្វ និងរុក្ខជាតិទាំងអស់ដើម្បីទ្រទ្រង់រីកលូតលាស់នៃសរីរាង្គ ដោយគ្រាន់តែសេចក្តីត្រូវការនោះអាស្រ័យទៅតាមសភាវ:រៀងៗខ្លួន ។ បើយោងតាមស្តង់ដារ CS 548:2017 បរិមាណសារធាតុអ៊ីយ៉ូត មានប្រមាណពី៣០ ទៅ ៤០ មីក្រូក្រាម ក្នុងមួយគីឡូក្រាមអំបិល និងមនុស្សម្នាក់ត្រូវបរិភោគក្នុងរង្វង់ប្រមាណជា១០ ក្រាម ដើម្បីទ្រទ្រង់ដល់រាងកាយដូចជា ជួយបង្កើនការចងចាំ និងឆ្លាតវៃ ជួយការពារជំងឺពកករ ការពារជំងឺក្រិនក្រេះ និងជំងឺស្លេកស្លាំងរបស់មាតា និងទារកជាដើម។
លោក បានសង្កត់ធ្ងន់ថា អំបិលជាស្បៀងអាហារមានលក្ខណ:យុទ្ធសាស្ត្រ ដូច្នេះការថែរក្សាផ្ទៃក្រឡាធ្វើស្រែអំបិលជាការចាំបាច់មួយត្រូវគិតគូ។ ក្នុងនោះ ការផលិត ការកែច្នៃនិងការវេចខ្ចប់អំបិលត្រូវគោរពតាមស្តង់ដារគុណភាព អនាម័យត្រឹមត្រូវ និយាយដោយខ្លីអំបិលទាំងអស់ មិនថាអំបិលសម្រាប់បរិភោគ ឬ អំបិលសម្រាប់ឧស្សាហកម្ម សិប្បកម្ម ត្រូវចាប់បង្ខំឲ្យបញ្ចូលជាតិអ៊ីយ៉ូតចាប់ពីចុងខែមិថុនាឆ្នាំនេះតទៅ។
ក្នុងនោះការនាំចូលអំបិលនិងការចរាចរអំបិលលើទីផ្សារ ត្រូវមានការត្រួតពិនិត្យតឹងរឹង ហើយបើពិនិត្យឃើញថា អំបិលមិនមានបញ្ចូលជាតិអ៊ីយ៉ូត បញ្ចូលមិនគ្រប់តាមស្តង់ដារ ឬ អំបិលមិនមានស្លាកសញ្ញាបញ្ចូលជាតិអ៊ីយ៉ូតដែលទទួលស្គាល់ដោយក្រសួងឧស្សាហកម្មនិងសិប្បកម្ម ត្រូវណែនាំ ដកហូត រឺពិន័យតាមច្បាប់និងអនុក្រឹត្យ ដែលបានកំណត់រួចហើយ។
សូមបញ្ជាក់ថា ក្នុងឱកាសនោះ ក៏មានការពិភាក្សាលើកឡើងពីភាពប្រឈមនៃការផលិតអំបិលផងដែរ បើទោះបីតាមរយ:ក្រសួងឧស្សាហកម្មនិងសិប្បកម្ម រាជរដ្ឋាភិបាលបានចេញគោលនយោបាយលកទឹកចិត្តលើវិស័យផលិតអំបិលនេះជាច្រើនយ៉ាងណាក៏ដោយ៕