មេរោគមួយ កំពុងវាយលុកកុំព្យូទ័រ ជិត១០០ប្រទេស
- 2017-05-13 02:46:49
- ចំនួនមតិ 0 | ចំនួនចែករំលែក 0
មេរោគមួយ កំពុងវាយលុកកុំព្យូទ័រ ជិត១០០ប្រទេស
ចន្លោះមិនឃើញ
ថ្មីៗនេះ ការវាយប្រហារទ្រង់ទ្រាយធំមួយតាមប្រព័ន្ធអ៊ីនធឺណិត ដែលត្រូវបានគេសង្ស័យថា ធ្លាប់អភិវឌ្ឍឡើងដោយភ្នាក់ងារសន្តិសុខជាតិរបស់សហអាមេរិក (NSA) បាននិងកំពុងវាយលុកទៅលើអង្គការស្ថាប័នជាច្រើននៅជុំវិញពិភពលោក។ កុំព្យូទ័ររាប់ពាន់គ្រឿង ត្រូវបានរារាំងមិនអាចចូលបាន ដោយសារមេរោគកម្មវិធីមួយ ឈ្មោះ WannaCry ដែលតម្រូវឲ្យពួកគេបង់លុយឲ្យក្រុម Hacker ចំនួន ៣០០ដុល្លារតាមរយៈ Bitcoin។
ប្រទេសចំនួន ៩៩ បានរាយការណ៍អំពីការឆ្លងមេរោគខាងលើ ក្នុងនោះមាន ចក្រភពអង់គ្លេស សហរដ្ឋអាមេរិក ចិន រុស្ស៊ី អេស្ប៉ាញ អ៊ីតាលី និងកោះតៃវ៉ាន់ ផងដែរ។ ក្រុមហ៊ុនបង្កើតកម្មវិធីកម្ចាត់មេរោគ Avast បានប្រកាសពីការរកឃើញរបស់ខ្លួនថា មេរោគខាងលើចំនួន ៧៥០០០ ករណី បានកើតមាននៅជុំវិញពិភពលោក។
អ្នកជំនាញមួយចំនួន អះអាងដូចគ្នាថា ការវាយប្រហារនេះត្រូវបានបង្កើតឡើងដើម្បីទាញយកផលចំណេញពីភាពទន់ខ្សោយនៅក្នុងប្រព័ន្ធរបស់ Microsoft ដែលរកឃើញដោយ NSA ដែលពួកគេហៅវាថា EternalBlue។ ខុសពីមេរោគដទៃទៀត WannaCry មានសមត្ថភាពអាចឆ្លងតាមរយៈ Network ដោយខ្លួនឯង និងការក្លែងបន្លំដើម្បីឲ្យអ្នកប្រើប្រាស់ចុចលើ Link ដែលមានបង្កប់កូដសម្រាប់វាយប្រហារ៕