បក្សប្រឆាំងសន្យាបំពាក់អាវុធទំនើបៗឲ្យយោធានៅពេលឈ្នះឆ្នោតឡើងកាន់អំណាច

2017-05-29 03:50:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ត្រីគណបក្សសង្គ្រោះជាតិ បានសន្យានៅចំពោះមុខអ្នកគាំទ្ររាប់ម៉ឺននាក់ថា នឹងសន្សំសំចៃថវិកាជាតិបន្ថែម ដើម្បីចាយលើវិស័យយោធាតាមរយៈបំពាក់ឲ្យមានអាវុធសឹកទំនើបៗជាងពេលបច្ចុប្បន្ននេះ ប្រសិនបើខ្លួនឈ្នះការបោះឆ្នោត និងឡើងដឹកនាំប្រទេសជំនួសបក្សកាន់អំណាច។ ការសន្យានេះ បន្ទាប់ពីបក្សប្រឆាំងអះអាងថា នឹងផ្លាស់ប្ដូរតែតំណែងអនុរដ្ឋមន្ត្រី និងរដ្ឋមន្ត្រីប៉ុណ្ណោះ ក្រៅពីនេះ មន្ត្រីប៉ូលិស និងទាហានទាំងអស់ដែលជាកងកម្លាំងការពារជាតិ គឺមិនប៉ះពាល់ឡើយ។

នៅមុនចាប់ផ្ដើមដង្ហែក្បួនឃោសនាបោះឆ្នោតឃុំ-សង្កាត់ដ៏ធំជាលើកទីពីរនៅរាជធានីភ្នំពេញ ដែលមានអ្នកគាំទ្ររាប់ម៉ឺននាក់ចូលរួម នៅថ្ងៃទី២៨ ឧសភា និងបន្ទាប់ពីថ្លែងរិះគន់ទាក់ទងនឹងអំពើអយុត្តិធម៌ជាច្រើននៅក្នុងសង្គម ដូចជាការអភិវឌ្ឍរឹតតែធ្វើឲ្យរាស្ដ្ររងទុក្ខវេទនាកាន់តែខ្លាំង ការវាយដំតំណាងរាស្ត្រនៅខាងមុខរដ្ឋសភា និងការសម្លាប់អ្នកដែលមានមតិជំទាស់ ហើយតុលាការមិនរកយុត្តិធម៌នោះ។ គណបក្សប្រឆាំងក៏បានក្រើនរំឭកជាថ្មីទៀតឲ្យពលរដ្ឋចេញទៅបោះឆ្នោតឲ្យបានគ្រប់ៗគ្នា តាមឆន្ទៈ និងមិនត្រូវខ្លាចសារគំរាមសង្គ្រាមឡើយ ព្រោះព្រះមហាក្សត្របានធានាចំពោះសន្តិភាពដែលកំពុងមានសព្វថ្ងៃនេះ។

មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ (កាន់ក្បាលមេក្រូ) ថ្លែងទៅកាន់អ្នកគាំទ្រនៅខាងមុខវត្តចាស់ នាសង្កាត់ជ្រោយចង្វារ រាជធានីភ្នំពេញ មុននឹងដង្ហែក្បួនឃោសនាបោះឆ្នោតឃុំ-សង្កាត់នៅថ្ងៃទី២៨ ខែឧសភា ឆ្នាំ២០១៧។

មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ បានបន្ថែមទៀតថា ក្រៅពីគោលនយោបាយទម្លាក់លុយ ៥០ម៉ឺនដុល្លារសហរដ្ឋអាមេរិកក្នុងមួយឃុំ-សង្កាត់នៅពេលឈ្នះ គណបក្សក៏នឹងសន្សំថវិកាផ្សេងទៀតដើម្បីបំពាក់អាវុធទំនើបៗឲ្យយោធាដែរ៖ «គណបក្សសង្គ្រោះជាតិ អត់មានទាហានទេ កងយោធពលខេមរភូមិន្ទយើង គឺកងទ័ពរបស់ជាតិ ជាកងទ័ពបម្រើជាតិ។ យើងនឹងហ្វឹកហ្វឺនទាហានយើងឲ្យខ្លាំង។ យើងនឹងសន្សំលុយទិញអាវុធយុទ្ធភណ្ឌទំនើបៗឲ្យទាហានយើង ដើម្បីការពារប្រទេសជាតិ»។

ការប្រកាសពីមន្ត្រីបក្សប្រឆាំងនេះ បានកើតឡើងស្របពេលលោកនាយករដ្ឋមន្ត្រី ហ៊ុន សែន និងរដ្ឋមន្ត្រីការពារជាតិ លោក ទៀ បាញ់ បានព្រមាននៅមុនការបោះឆ្នោតឃុំ-សង្កាត់ថា នឹងប្រើប្រាស់កងកម្លាំងទ័ពទាហាន ចេញបង្ក្រាបក្រុមណាដែលហ៊ានងើបតវ៉ារឿងលទ្ធផលបោះឆ្នោត និងព្រមានសារសង្គ្រាមផ្ទុះឡើងវិញនៅកម្ពុជា ប្រសិនបើគណបក្សកាន់អំណាចរបស់លោក ដែលដឹកនាំប្រទេសជិត ៤០ឆ្នាំ ចាញ់ការបោះឆ្នោតឃុំ-សង្កាត់នៅឆ្នាំ២០១៧ និងការបោះឆ្នោតជាតិនៅឆ្នាំ២០១៨។

ពាក់ព័ន្ធនឹងការសន្យារកលុយជួយពង្រឹងវិស័យយោធាពីមន្ត្រីបក្សប្រឆាំងនេះ ត្រូវបានមន្ត្រីនាំពាក្យគណបក្សប្រជាជនកម្ពុជា លោក សុខ ឥសាន ឆ្លើយតបថា ប្រសិនបើគណបក្សរបស់លោកហ៊ានសន្យាដូចគ្នានេះ ប្រហែលជាត្រូវរងការរិះគន់ថាគំរាមកំហែង។ ប៉ុន្តែលោកថា ការលើកឡើងនោះគ្រាន់តែជាសារស្រមើស្រមៃខុសពីការពិតប៉ុណ្ណោះ ព្រោះបក្សប្រឆាំងនឹងមិនអាចយកជ័យជម្នះក្នុងការបោះឆ្នោតខាងមុខឡើយ៖ «គាត់គ្មានប្រាកដនិយមគួរឲ្យជឿជាក់ទេ ព្រោះម្ដងថាអ៊ីចេះអ៊ីចុះ ម្ដងឆ្វេង ម្ដងស្ដាំ»៕

ប្រភព៖ Radio Free Asia ប្រែសម្រួល៖ សំភី