ទេសចរបរទេស ចង់ឃើញក្រុងបាត់ដំបងត្រូវដាក់ចូលបេតិកភណ្ឌពិភពលោក

2017-06-14 12:36:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងដំណើរទស្សនកិច្ចរបស់ភ្ញៀវទេសចរមកពី ២៦ប្រទេសលើពិភពលោក អមដោយមន្ត្រីតំណាងក្រសួងទេសចរណ៍ ក្រសួងវប្បធម៌ និងអាជ្ញាធរពាក់ព័ន្ធកាលពីថ្ងៃទី១៣មិថុនា ទេសចរជាង ១០០នាក់បានទស្សនាអគារចាស់ៗ និងរមណីយដ្ឋានសំខាន់ៗនៅខេត្តបាត់ដំបង។ អភិបាលក្រុង បានអះអាងថា ក្រុមអ្នកទេសចរនេះមកពិនិត្យមើលតំបន់ទេសចរណ៍ និងជួយផ្ដល់ជាគំនិត ដើម្បីដាក់ទីក្រុងមួយនេះ សម្រាប់ប្រកួតប្រជែងជាសម្បត្តិបេតិកភណ្ឌពិភពលោក នៅពេលខាងមុខ។

លោក សៀងឯម វូនស្ហី មានប្រសាសន៍ថា ដំណើរទស្សនកិច្ចនេះនឹងផ្ដល់ចំណេះដឹងបន្ថែមដល់មន្ត្រីពាក់ព័ន្ធក្នុងខេត្តបាត់ដំបង ដើម្បីត្រៀមខ្លួនរៀបចំដាក់ទីក្រុងបាត់ដំបង សម្រាប់ដាក់បញ្ចូលជាទីក្រុងបេតិកភណ្ឌពិភពលោក៖ «កន្លងមកនេះយើងបានដាក់សំណើក្រុងបាត់ដំបង សុំចូលជាបេក្ខភាពជាទីក្រុងបេតិកភណ្ឌពិភពលោកផងដែរ។ អ៊ីចឹងទេ ថ្ងៃនេះក្រុងបាត់ដំបង បានរៀបចំដោយមានសមត្ថកិច្ចចម្រុះ ដើម្បីរក្សាសន្តិសុខជូនភ្ញៀវអន្តរជាតិក្នុងដំណើរទស្សនកិច្ចនេះ» ។

ភ្ញៀវទេសចរខាងលើភាគច្រើន ជាភ្ញៀវចូលរួមកិច្ចប្រជុំរដ្ឋមន្ត្រីក្រសួងទេសចរណ៍អន្តរជាតិ សម្រាប់ប្រទេសអាស៊ាន នៅខេត្តសៀមរាប។ អ្នកទាំងនោះមកពីប្រទេសអាស៊ានទាំង១០ ប្រទេសបារាំង សហគមន៍អឺរ៉ុប និងប្រទេសមួយចំនួនទៀតលើពិភពលោក។

អភិបាលក្រុងដដែលឲ្យដឹងទៀតថា លោកនឹងទៅធ្វើបទបង្ហាញអំពីការអភិរក្សក្រុងបាត់ដំបង នៅខេត្តសៀមរាប នៅថ្ងៃទី១៤មិថុនា។ ប្រទេសកម្ពុជា បានលើកយកទីក្រុងបីដាក់ជាទីក្រុងបេតិកភណ្ឌពិភពលោក រួមមានក្រុងក្រចេះ ក្រុងកំពត និងក្រុងបាត់ដំបង៕

ប្រភព៖ Radio Free Asia ប្រែសម្រួល៖ លាភ.