សមាជិកក្រុមចម្រៀង Smallworld Smallband នាំមេដាយស៊ីហ្គេម ជូនជាតិជាថ្មី

2017-08-18 10:58:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រិយមិត្តមួយចំនួន ប្រហែលជាដឹងត្រឹមថា រៀម សុខភីរម្យ ជាសមាជិកក្រុមចម្រៀង Smallworld Smallband (SWSB) ប៉ុន្តែមិនបានដឹងទេថា ភីរម្យ គឺជាអត្តពលិកជម្រើសជាតិកម្ពុជានោះទេ។

រៀម សុខភីរម្យ ជាសមាជិកមួយរូប នៃក្រុមសីប៉ាក់តាក្រ (សីដក់) ជម្រើសជាតិកម្ពុជា ដែលចូលរួមប្រកួតប្រជែងក្នុងព្រឹត្តិការណ៍កីឡាស៊ីហ្គេម លើកទី២៩ នៅប្រទេសម៉ាឡេស៊ី ហើយបានឈ្នះមេដាយសំរឹទ្ធ ចំនួន ២។

ភីរម្យ បានបញ្ជាក់ប្រាប់ ខ្លីៗ ពីម៉ាឡេស៊ី ថា៖ "ឆ្នាំនេះយើងធ្វើមិនសូវបានល្អ ដោយសារយើងមិនអាចការពារតំណែងជើងឯក (មេដាយមាស) បាន ប៉ុន្តែយើងបានព្យាយាមអស់ពីសមត្ថភាព។ វិញ្ញាសាដែលយើងធ្លាប់ឈ្នះមេដាយមាសកាលពីឆ្នាំ២០១៥ ត្រូវបានគណៈកម្មាធិការរៀបចំការប្រកួតផ្លាស់ប្ដូរ ឲ្យយើងប្រកួតវិញ្ញាសាផ្សេងវិញ ប៉ុន្តែយើងបានប្រឹងប្រែងហ្វឹកហាត់ រហូតទទួលបានមេដាយសំរឹទ្ធ ២"។

រៀម សុខភីរម្យ (ជួរមុខ ទី២ រាប់ពីឆ្វេង) ពេលទទួលមេដាយជាមួយមិត្តរួមក្រុម

ដូចគ្នានេះដែរ លោក ទូច សុភៈ ប្រធានក្រុមដឹកនាំកីឡាករ និងជាអគ្គលេខាធិការសហព័ន្ធកីឡាសីដក់ និងឈិនឡូនកម្ពុជា ក៏បានលើកឡើងដូចគ្នានេះដែរ។ លោកថា ដំបូងឡើយ ក្រុមរបស់លោកព្យាយាមហ្វឹកហាត់លើវិញ្ញាសាដែលត្រូវការពារតំណែងមេដាយមាស ប៉ុន្តែក្រោយមកទៀតគេបញ្ជាក់ថាឆ្នាំនេះមិនមានវិញ្ញាសានោះទេ ទើបតម្រូវឱ្យក្រុមលោកហាត់ផ្សេងវិញ។

គួរបញ្ជាក់ថា វិញ្ញាសា ដែលរៀម សុខភីរម្យ និងក្រុមសីដក់កម្ពុជា បានឈ្នះមេដាយសំរឹទ្ធ ២ គឺវិញ្ញាសាសីឈិនឡូន។ ក្រុមសីប៉ាក់តាក្រកម្ពុជា មិនទាន់អស់ភារកិច្ចនៅស៊ីហ្គេមនោះទេ ពោលគឺត្រូវប្រកួតលើវិញ្ញាសាផ្សេងទៀត (សីដក់ ២នាក់ ទល់ ២នាក់ និង ៣នាក់ ទល់ ៣នាក់) ចាប់ពីថ្ងៃទី២៥ ដល់ ២៧ ខែសីហា។

រៀម សុខភិរម្យ ធ្លាប់ចូលរួមប្រកួតស៊ីហ្គេមនៅឆ្នាំ ២០០៧, ២០០៩, ២០១៣, ២០១៥ ដែលក្នុងនោះ ឆ្នាំ២០១៣ នៅមីយ៉ាន់ម៉ា បានមេដាយប្រាក់ ២ សំរឹទ្ធ២, ឆ្នាំ២០១៥ នៅសិង្ហបុរី បានមេដាយមាស ១ សំរឹទ្ធ ១។ ក្រៅពីនៅស៊ីហ្គេម ភីរម្យ និងក្រុមសីប៉ាក់តាក្រកម្ពុជា ក៏បានទទួលមេដាយជារៀងរាល់ឆ្នាំផងដែរ ក្នុងពានរង្វាន់ King's Cup Sepaktakraw World Championship នៅប្រទេសថៃ៕