Fox Sports Asia៖ ចាន់ វឌ្ឍនាកា គួរតែចាកចេញពីជប៉ុន ទៅលេងនៅថៃ
- 2017-09-11 03:55:17
- ចំនួនមតិ 0 | ចំនួនចែករំលែក 0
Fox Sports Asia៖ ចាន់ វឌ្ឍនាកា គួរតែចាកចេញពីជប៉ុន ទៅលេងនៅថៃ
ចន្លោះមិនឃើញ
សារព័ត៌មាន Fox Sports Asia បានចុះផ្សាយពីតារាបាល់ឆ្នើមកម្ពុជា ចាន់ វឌ្ឍនាកា ដែលបានស៊ុតបញ្ចូលទី ១គ្រាប់ទៅលើក្រុមវៀតណាម ក្នុងការប្រកួតវគ្គសន្សំពិន្ទុ ជម្រុះពានរង្វាន់ AFC Asian Cup 2019 កាលពីសប្ដាហ៍មុន។ ប្រភពដដែល បានជំរុញឲ្យកីឡាករដែលមានប្រភពពីខេត្តកំពត បោះបង់ប្រទេសជប៉ុន ដើម្បីឈោងចាប់យកអាជីពថ្មីនៅជាមួយក្លឹបណាមួយនៅប្រទេសថៃ។
ឆ្លងកាត់ជំនួបទល់នឹងក្រុមវៀតណាម ដែលកម្ពុជាចាញ់ដោយលទ្ធផល ២-១ នោះ ចាន់ វឌ្ឍនាកា ការបង្ហាញឲ្យឃើញថា រូបគេមានសមត្ថភាពអាចធ្វើបានល្អដដែល។ ប៉ុន្តែ Fox Sports Asia បានលើកឡើងថា ប្រសិនបើ កីឡាកររហស្សនាម CV11 មិនអាចបង្ហាញខ្លួនជាប់ ជាជម្រើស១១នាក់ដំបូងជាមួយក្រុម Fujieda MYFC នៃលីគលំដាប់ទីបីជប៉ុនបានទេនោះ គេក៏មិនអាចមានឱកាសក្នុងការឡើងទៅលេងឲ្យក្រុមផ្សេងៗ ដែលស្ថិតនៅលីគលំដាប់ខ្ពស់ជាងនេះបានដែរ។
ប្រភពដដែលបានបន្តថា ម៉ាឡេស៊ី និងសិង្ហបុរី កំពុងតាមដានលើ CV11 ហើយរូបគេនឹងលេចធ្លោនៅលីគទាំងនេះ តែតាមរយៈសមត្ថភាពរបស់គេ គួរតែសម្លឹងមើលខ្ពស់ជាងនេះ ពោលគឺប្រទេសថៃ ដែលស្ថិតនៅកម្រិតល្អមួយនៅក្នុងតំបន់អាស៊ីអាគ្នេយ៍។
នៅរដូវកាលក្រោយ សហព័ន្ធកីឡាបាល់ទាត់ថៃ នឹងអនុញ្ញាតឲ្យក្លឹបនីមួយៗ ទិញកីឡាករម្នាក់ពីតំបន់អាស៊ាន។ ដូច្នេះ វឌ្ឍនាកា ជាជម្រើសដ៏ល្អមួយសម្រាប់ក្លឹបទាំងនោះ ដោយមិនធ្វើឲ្យពួកគេខកបំណងឡើយ។ នៅទីនោះ រូបគេក៏អាចទទួលបានការផ្ដល់ឱកាសលេងគ្រប់គ្រាន់ ដើម្បីទទួលយកបទពិសោធន៍សម្រាប់ខ្លួនឯងផងដែរ៕