រំកិលលិង្គព្រះឥសូរ យកទៅតម្កល់ទុកនៅក្នុងសារមន្ទីរជាតិ
- 2017-09-14 06:33:25
- ចំនួនមតិ 0 | ចំនួនចែករំលែក 0
រំកិលលិង្គព្រះឥសូរ យកទៅតម្កល់ទុកនៅក្នុងសារមន្ទីរជាតិ
ចន្លោះមិនឃើញ
នៅជណ្ដើរខាងជើងប្រាសាទព្រះវិហារមានរៀបចំពិធីក្រុងពាលីរំកិលលិង្គព្រះឥសូរយកទៅរក្សាទុកនៅក្នុងសារមន្ទីរជាតិ ស្ថិតក្នុងភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ កាលពីរសៀលថ្ងៃទី១៣កញ្ញាម្សិលមិញ។
លោក គឹម សេតតារា អគ្គនាយកអាជ្ញាធរជាតិប្រាសាទព្រះវិហារ បានឲ្យដឹងថា លិង្គព្រះឥសូរនេះបានប្រទះឃើញនៅលើថ្មកម្រាលខឿនខាងក្រោម នៃជណ្ដើរបុរាណខាងជើងប្រាសាទព្រះវិហារ កាលពីថ្ងៃទី២០ ខែមេសា ឆ្នាំ២០១៧។ ក្រោយប្រទះឃើញ ក៏មានការសម្រេចធ្វើកំណាយបុរាណវិទ្យានៅថ្ងៃទី២៤ និងថ្ងៃទី២៥ ខែមេសា ឆ្នាំ២០១៧ ដើម្បីសិក្សាលម្អិតអំពីប្រភព និងមូលហេតុដេលមានលិង្គព្រះឥសូរនៅទីតាំងនោះ។
ប្រភពដដែល បញ្ជាក់ទៀតថា លិង្គព្រះឥសូរសាងអំពីថ្មភក់ ប្រវែង២,១៥ម៉ែត្រ ផ្នែកខាងក្រោម ឬខាងគល់ឆ្លាក់រាងបួនជ្រុងមានប្រវែង ១,២២ម៉ែត្រ និងកម្រាស់ ០,៣១ម៉ែត្រ។ ផ្នែកកណ្ដាលរាងប្រាំបីជ្រុងមានប្រវែង ០,៤៦ម៉ែត្រ និងផ្នែកខាងលើ ឬខាងចុង ឆ្លាក់រាងមូលប្រវែង ០,៤៦ម៉ែត្រ និងមានអង្កត់ផ្ចិត ០,២៥ម៉ែត្រ។ នៅក្នុងរណ្ដៅកំណាយជាមួយលិង្គព្រះឥសូរនេះ ក៏បានប្រទះឃើញផងដែរនូវបំបែកឧបករណ៍ថ្មកិនថ្នាំបុរាណចំនួន១ដុំ បំណែកកុលាលភាជន៍ដុតក្នុងសីតុណ្ហភាពមធ្យម បំណែកភាជន៍ដុតក្នុងសីតុណ្ហភាពទាប បំណែកភាជន៍ព័រសឺឡែន និងបំណែកក្បឿងដែលជាផលិតផលនៅសម័យអង្គរ។
លោក គឹម សេតតារា បន្តថា តាមការសន្និដ្ឋានរបស់ក្រុមបុរាណវិទ្យានៃអាជ្ញាធរជាតិព្រះវិហារឲ្យដឹងថា លិង្គព្រះឥសូរនេះគឺឆ្លាក់នៅដំណាក់កាលណាមួយនៃពេលសាងសង់ប្រាសាទព្រះវិហារអំឡុងសតវត្សទី១១ និងទី១២ ពោលគឺក្រោយពេលសង់ជណ្ដើរខាងជើងរួចរាល់។ លិង្គព្រះឥសូរនេះមិនមែនដាក់តម្កល់នៅទីតាំងប្រទះឃើញនេះទេ គឺប្រហែលគេឆ្លាក់នៅកន្លែងនេះមុនយកទៅតម្កល់នៅកន្លែងណាមួយក្នុងប្រាសាទ ឬក៏លិង្គព្រះឥសូរនេះប្រហែលយកចេញពីក្នុងប្រាសាទដោយចេតនាបំផ្លាញ៕