ចង់ទៅលេងប្រាសាទព្រះវិហារឲ្យសប្បាយ គួរដឹង ៤ចំណុចនេះ
- 2017-09-20 08:50:00
- ចំនួនមតិ 0 | ចំនួនចែករំលែក 0
ចង់ទៅលេងប្រាសាទព្រះវិហារឲ្យសប្បាយ គួរដឹង ៤ចំណុចនេះ
ចន្លោះមិនឃើញ
ប្រាសាទព្រះវិហារ ស្ថិតក្នុងភូមិស្វាយជ្រំ ឃុំកន្ទួត ស្រុកជាំខ្សាន្ត ខេត្តព្រះវិហារ នៅលើខ្នងភ្នំដងរែក មានចម្ងាយ ៤០៥គីទ្បូមែត្រ ពីរាជធានីភ្នំពេញ។ ភ្នំនេះមានលក្ខណៈចោទខ្លាំងពីខាងប្រទេសកម្ពុជា និងជម្រាលពីខាងប្រទេសថៃ។
មួយវិញទៀត ប្រាសាទព្រះវិហារគឺជាតំបន់ប្រវត្តិសាស្ត្រមួយដែលមានឈ្មោះថា សេការីស្វារៈ ដែលមានន័យថា អំណាចនៃភ្នំ ហើយត្រូវបានសាងសង់ឡើងនៅក្នុងអំឡុងចុងសតវត្សទី៩ និងដើមសតវត្សទី១០។ ដោយមានព្រះមហាក្សត្រ៤អង្គជាអ្នកសាងសង់ ព្រះនាម៖ ព្រះបាទយសោវរ្ម័នទី១ (សាងសង់ក្នុងគ.ស ៨៨៩-៩១០) ព្រះបាទសូរ្យវរ្ម័នទី១ (សាងសង់ក្នុងគ.ស ១០០២-១០៥០) ព្រះបាទសូរ្យវរ្ម័នទី២ (សាងសង់ក្នុងគ.ស ១១១៣-១១៥០) និងព្រះបាទជ័យវរ្ម័នទី៦ (សាងសង់ក្នុងគ.ស ១០៨០-១១០៩)។
ខាងក្រោមនេះជាវិធីខ្លះៗ ដើម្បីឱ្យប្រិយមិត្តដែលចង់ទៅលេងប្រាសាទព្រះវិហារ អាចធ្វើដំណើរបានយ៉ាងងាយស្រួល និងមានសុវត្ថិភាពខ្ពស់៖
១. មធ្យោបាយធ្វើដំណើរ
បើតាមលោក ចាន់ ឆន អាជ្ញាធរនៅតំបន់ប្រាសាទព្រះវិហារបានបញ្ជាក់ថា ចំពោះអ្នកទេសចរទាំងអស់អាចមកលេងនៅលើប្រាសាទព្រះវិហារនេះបាន ដោយមិនចាំបាច់ខ្លាចអ្វីនោះទេ។ ដោយការធ្វើដំណើរឡើងប្រាសាទ គឺមានឡានសម្រាប់ជួលរួចជាស្រេច។
នៅជើងប្រាសាទមានកន្លែងលក់សំបុត្រមួយ (សំបុត្រលក់មិនយកប្រាក់ទេ) ហើយបន្ទាប់ពីទិញសំបុត្រហើយ ប្រិយមិត្តអាចជួលឡាននៅទីនោះ ដើម្បីធ្វើដំណើរឡើងប្រាសាទ ដោយឡានមួយមានតម្លៃ ១០ម៉ឺនរៀល។ ឡាននេះអាចដឹកមនុស្សឡើងត្រឹមតែចង្កេះភ្នំប៉ុណ្ណោះ ដោយប្រិយមិត្តអាចធ្វើដំណើរឡើងទៅកំពូលប្រាសាទដោយថ្មើរជើងរយៈចម្ងាយប្រមាណ ១គីឡូម៉ែត្រទៀត។
សម្រាប់អ្នកមិនចង់ដើរទេ អាចជួលម៉ូតូនៅលើនោះបាន ដោយម៉ូតូមួយមានតម្លៃ ២ម៉ឺនរៀល ទាំងឡើងនិងចុះ។
២ ពេលវេលា
សម្រាប់ពេលវេលាវិញ ប្រាសាទព្រះវិហារបើកឱ្យអ្នកទេសចរឡើងនៅម៉ោង ៧:៣០នាទីព្រឹក ឡើងចុះមកវិញនៅម៉ោង ៤:៣០នាទីល្ងាច។
៣. ដើរលេងនៅលើកំពូលប្រាសាទ
នៅលើកំពូលប្រាសាទ មានអាជ្ញាធរព្រះវិហារជាច្រើននៅទីនោះ ដូច្នេះប្រសិនបើចង់ដឹងរឿង និងកន្លែងផ្សេងៗ អាចសួរនាំពួកគាត់បាន ប្រសើរជាងដើរដោយខ្លួនឯង។
៤. តំបន់ដែលគេនិយមទៅថតរូបលេង
នៅកំពូលប្រាសាទ មានរ៉ូងមួយដែលត្រូវបានគេដឹងថា ជាកន្លែងសក្ការបូជា ហើយអ្នកដែលឡើងទៅលើកំពូលប្រាសាទនេះ មិនដែលរំលងឡើយ។ មួយវិញទៀត នៅក្បែរកន្លែងបូជានោះ ក៏មានកន្លែងមួយសម្រាប់ឱ្យអ្នកចូលចិត្តថតរូប ថតលេងកម្សាន្តផងដែរ ប៉ុន្តែឡើងម្ដងបានតែគ្នា៣ទៅ៤នាក់ប៉ុណ្ណោះ។ នៅលើកំពូលភ្នំ ក៏មានកែវយឹតមួយសម្រាប់អ្នកដែលចង់មើលទៅកន្លែងឆ្ងាយៗ ឆ្លុះមើលលេងដែរ៕