ក្រុមហ៊ុនប្រេង KrisEnergy ប្រកាសសម្រេចចិត្តចុងក្រោយហើយលើការស្វែងរកប្រេងនៅកម្ពុជា

2017-10-20 06:27:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនប្រេង KrisEnergy បានប្រកាសនៅថ្ងៃទី ២០តុលានេះថា ខ្លួនបានធ្វើការសម្រេចចិត្តជាចុងក្រោយហើយ ក្នុងការវិនិយោគដើម្បីដំណើរការដំណាក់កាលដំបូងនៃការអភិវឌ្ឍប្លុកប្រេងឈ្មោះអប្សរា ដែលជាគម្រោងអភិវឌ្ឍន៍ដំបូងនៅកម្ពុជា។

មានទីតាំងនៅកម្ពុជា ប្លុកA នៅក្នុងឈូងសមុទ្រថៃនោះ ដំណាក់កាលទី១A នៃការអភិវឌ្ឈឈ្មោះអប្សរា គឺត្រូវការកន្លែងមួយ និងកប៉ាល់ដែលមានសមត្ថភាពអាចដំណើរការទាញយកសារធាតុរាវចំនួន៣ម៉ឺនធុងក្នុងមួយថ្ងៃដោយមានកន្លែងបំបែកសារជាតិឧស្ម័ន ប្រេង និងទឹកពីគ្នានៅលើកប៉ាល់តែម្តង។

ទីតាំងបូមប្រេងមួយកន្លែងរបស់ក្រុមហ៊ុន KrisEnergy

ក្នុងសេចក្តីជូនដំណឹងរបស់ក្រុមហ៊ុន KrisEnergy ឲ្យដឹងថា ប្រេងនឹងត្រូវបានបញ្ជូនតាមរយៈបំពង់បង្ហូរប្រេងដែលមានប្រវែង ១,៥ គីឡូម៉ែត្រសម្រាប់ការផ្ទុកទៅកន្លែងអណ្តែតអចិន្រ្តៃយ៍លើនាវាផ្ទុកមួយ។

លោក Kelvin Tang អគ្គនាយកក្រុមហ៊ុនKrisEnergy បាននិយាយក្នុងសេចក្តីប្រកាសនោះថា «ការសម្រេចចិត្តវិនិយោគចុងក្រោយនេះគឺជាជំហានមួយទៀតនៃការរីកចម្រើនការអភិវឌ្ឍតំបន់អប្សរាបន្ទាប់ពីការចុះហត្ថលេខាជាផ្លូវការនៃកិច្ចព្រមព្រៀងប្រេងកាតកាលពីចុងខែសីហាកន្លងទៅ។»

ក្រុមហ៊ុន KrisEnergy គឺជាអ្នកប្រតិបត្តិករនៃប្លុក A និងមានភាគហ៊ុន ៩៥% ចំណែកក្រសួងសេដ្ឋកិច្ច និងហិរញ្ញវត្ថុរបស់កម្ពុជាមាន ៥%។ តំបន់ប្លុកAដែលបានចុះកិច្ចសន្យាមានទំហំ ៣,០៨៣ គីឡូម៉ែត្រក្រឡា និងមានជម្រៅទឹកពី៥០ម៉ែត្រទៅ៨០ម៉ែត្រ។

ក្នុងពិធីចុះហត្ថលេខាកាលពីខែសីហានោះ លោក Kelvin Tang អគ្គនាយកក្រុមហ៊ុន KrisEnergy បាននិយាយថា កម្ពុជានឹងទទួលបានចំណូលចំនួន ៥០០លានដុល្លាបន្ថែមពីកិច្ចព្រមព្រៀងសម្រាប់ការអភិវឌ្ឍអណ្តូងប្រេងកាតនេះ។ ការប៉ាន់ប្រមាណនេះគឺសម្រាប់រយ:ពេល ១អាយុកាលរបស់គម្រោងទាំងមូលដែលសំដៅទៅចំណូលពីពន្ធដារគ្រប់ប្រភេទ ថ្លៃសេវាផ្សេងៗ និងកម្រៃជើងសារផងដែរ។ ទឹកលុយ ៥០០លានដុល្លារនេះមិនរាប់បញ្ចូលនឹងចំនួន ៥% ដែលរដ្ឋាភិបាលមានជាភាគហ៊ុននៅក្នុងកិច្ចព្រមព្រៀងជាមួយក្រុមហ៊ុន KrisEnergy Groupនោះទេ៕

អត្ថបទ៖ ជ័យ ជំនោរ