លោក ប្រាក់ សុវណ្ណារ៉ា ពេញចិត្តនឹងលទ្ធផលកម្ពុជាទទួលបាន យប់មិញ

2017-11-15 03:46:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងសន្និសីទក្រោយបញ្ចប់ការប្រកួត គ្រូបង្វឹកក្រុមជម្រើសជាតិកម្ពុជា លោក ប្រាក់ សុវណ្ណារ៉ា បានបង្ហាញការពេញចិត្ត នឹងលទ្ធផលដែលកូនក្រុមរបស់លោកធ្វើបាន ក្នុងការប្រកួតជាមួយក្រុមហ្សកដានី ដែលចាញ់ត្រឹមតែ ១គ្រាប់ កាលពីយប់មិញ ក្នុងវគ្គជម្រុះ ពូល C ដើម្បីឈានទៅព្រឹត្តិការណ៍ AFC Asian Cup 2019 ។

លោក ប្រាក់ សុវណ្ណារ៉ា

គ្រូបង្វឹកដែលត្រូវតែងតាំងឲ្យដឹកនាំក្រុមជម្រើសជាតិកម្ពុជាបណ្ដោះអាសន្នបន្ទាប់ពីអតីតគ្រូបង្វឹកលោក Leonardo Vitorino បានឲ្យដឹងថា៖ ***«ខ្ញុំសូមអរគុណ និងកោតសរសើរចំពោះកីឡាកររបស់យើងដែលយើងបានជជែកគ្នា តាំងចិត្តដូចគ្នា មានន័យថា បើសូន្យទល់នឹងសូន្យ គឺមិនត្រូវឲ្យគេស៊ីមួយ បើគេស៊ីមួយ គឺកុំឲ្យគេស៊ីពីរ។ នេះជាឆន្ទៈរបស់ពួកយើងដែលត្រូវធ្វើឲ្យបាន។ ពួកយើងធ្វើបានល្អ ទោះបីជាលទ្ធផលចាញ់ក៏ដោយ។ ខ្ញុំសប្បាយរីករាយនឹងទទួលយកលទ្ធផលនេះ»***។

ទិដ្ឋភាពការប្រកួតរវាងកម្ពុជា និង ហ្សកដានី ថ្ងៃទី១៤ វិច្ឆិកា ឆ្នាំ២០១៧

ការលើកឡើងរបស់លោក ប្រាក់ សុវណ្ណរ៉ា គឺបន្ទាប់ពីក្រុមជម្រើសជាតិកម្ពុជា បានប្រកួតចាញ់ក្រុមហ្សកដានី រហូតដល់ទៅ ៧-០ កាលពីជើងទីមួយ។ ពាក់ព័ន្ធនឹងប្រព័ន្ធលេងយប់មិញ លោកទទួលស្គាល់ថា ជាការលេងដែលមិនល្អមើលសម្រាប់ទស្សនិកជននោះទេ ព្រោះលោកបានប្រើប្រាស់ការលេងរបៀបការពារច្រើន ព្រោះមិនចង់ឲ្យហ្សកដានី ដែលជាក្រុមខ្លាំង ស៊ុតចូលច្រើនគ្រាប់មកលើកម្ពុជា។

ទិដ្ឋភាពការប្រកួតរវាងកម្ពុជា និង ហ្សកដានី ថ្ងៃទី១៤ វិច្ឆិកា ឆ្នាំ២០១៧

គួរបញ្ជាក់ថា ក្នុងពូល C កម្ពុជា និងអាហ្វហ្គានីស្ថាន បានអស់ឱកាសក្នុងការឡើងទៅវគ្គបន្តហើយ ខណៈហ្សកដានី និងវៀតណាម បានកក់សំបុត្រយន្តហោះទៅកាន់ប្រទេសអារ៉ាប់រួម រួចជាស្រេច៕

អត្ថបទ៖ លាភ.