ទូរទស្សន៍ក្នុងស្រុក តម្រូវឲ្យបង់ពន្ធជូនរដ្ឋបន្ថែម ក្នុងរឿងបរទេស ១ភាគ

2017-11-17 04:20:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ថែមពីលើពន្ធដែលមានស្រាប់ សម្រាប់ខ្សែភាពយន្តភាគនាំចូលពីបរទេស ក្រសួងសេដ្ឋកិច្ច និងហិរញ្ញវត្តុ តាមរយៈ ក្រសួងវប្បធម៌ និងវិចិត្រសិល្បៈ តម្រូវឱ្យគ្រប់បណ្ដាស្ថានីយទូរទស្សន៍ក្នុងស្រុកទាំងអស់ ត្រូវបង់ពន្ធជូនរដ្ឋថែមទៀត លើការនាំចូលភាពយន្តពីបរទេស ដោយក្នុងមួយភាគ ត្រូវបង់ពន្ធ ៤០ម៉ឺនរៀលបន្ថែមទៀត ចាប់ពីឆ្នាំ ២០១៨តទៅ។

រឿងភាគដែលផ្សាយនៅលើទូរទស្សន៍ PNN

បញ្ហានេះបានធ្វើឱ្យតំណាងស្ថានីយទូរទស្សន៍ក្នុងស្រុកនានា ដែលមានជាង ២០ស្ថានីយប្រតិកម្មជាខ្លាំង។ ពួកគេអះអាងថាការធ្វើនេះ នឹងធ្វើឱ្យពួកគេចំណាយកាន់តែខ្លាំងថែមទៀត ខណៈបច្ចុប្បន្នពួកគេអះអាងថា ស្ថានីយភាគតិចប៉ុណ្ណោះអាចរកបានប្រាក់ចំណេញ។

កញ្ញា ទូច បុប្ផា តំណាងមកពីស្ថានីយទូរទស្សន៍ PNN បាននិយាយថា ការកំណត់ពន្ធបន្ថែមលើការនាំចូលរឿងភាគពីបរទេសបែបនេះ អាចនឹងធ្វើឱ្យស្ថានីយទូរទស្សន៍កញ្ញាកាន់តែមានបន្ទុកធ្ងន់ថែមទៀត ខណៈបច្ចុប្បន្នស្ថានីយបានបង់ពន្ធជាច្រើនរួចមក ហើយ ចំណែកការរកចំណូលត្រឡប់មកវិញហាក់មិនមានសមាមាត្រគ្នា។

កញ្ញាបញ្ជាក់ថា ប្រសិនបើច្បាប់នេះតម្រូវឱ្យអនុវត្តចាប់ពីឆ្នាំ២០១៨ ទៅមែន ស្ថានីយទូរទស្សន៍របស់ខ្លួន នឹងត្រូវចំណាយពន្ធបន្ថែមលើរឿងភាគនេះមិនក្រោម ១៤០០០ ដុល្លារទៅ ១៥០០០ដុល្លារ បន្ថែមទៀតក្នុងមួយខែនោះឡើយ ព្រោះបច្ចុប្បន្ន PNN បានចាក់រឿងបរទេស មិនក្រោម ៧ទៅ ៨ម៉ោងនោះទេក្នុងមួយថ្ងៃៗ។

ដោយឡែកលោក អ៊ឹង ឆៃងួន អគ្គនាយកទូរទស្សន៍ ហង្សមាសក៏បានលើកឡើងថា ការយកពន្ធដ៏ច្រើនបែបនេះ ធ្វើឱ្យគ្រប់ស្ថានីយទូរទស្សន៍ ក្នុងស្រុកទាំងអស់ កាន់តែមានការលំបាក ព្រោះបច្ចុប្បន្នស្ទើរគ្រប់ស្ថានីយបាក់ពឹងពាក់ខ្លាំងលើការនាំចូលភាពយន្តបរទេសនេះ ដើម្បីរកចំណូល ខណៈការរកចំណូលពីរឿងភាគក្នុងស្រុកហាក់ខុសគ្នាឆ្ងាយ។

លោកស្នើក្រសួងអាចពន្យា ឬក៏បន្ថយការយកពន្ធនេះ ឱ្យថោកជាងនេះ ដើម្បីឱ្យគ្រប់ស្ថានីយទាំងអស់មានទឹកចិត្តបន្ត និងផ្សព្វផ្សាយកម្មវិធី និងរឿងភាគទាំងក្នុងស្រុក និងក្រៅស្រុក។

ទីប្រឹក្សាក្រសួងវប្បធម៌ និងវិចិត្រសិល្បៈលោក ស៊ិន ចន្ទសាយ៉ា និយាយថា ការដាក់ចេញគោលការណ៍ ដោយតម្រូវឱ្យគ្រប់ស្ថានីយទូរទស្សន៍ត្រូវបង់ពន្ធបន្ថែម ៤០ម៉ឺនរៀល លើរឿងភាគនាំចូលពីបរទេស គឺជាគោលការណ៍របស់ក្រសួងសេដ្ឋកិច្ច និងរាជរដ្ឋាភិបាល ដើម្បីប្រមូលពន្ធតាមផែនការ។

លោក ស៊ិន ចន្ទសាយ៉ា ថ្លែងក្នុងបទសម្ភាសន៍១ នាពេលកន្លងមក

លោកបញ្ជាក់ថា ប្រសិនបើតំណាងស្ថានីយទាំងអស់ប្រតិកម្មបែបនេះ លោកនឹងយកសំណើទាំងនេះដាក់ជូនរដ្ឋមន្ត្រី ដើម្បីពិចារណាថែម។ ក៏ប៉ុន្តែលោកអះអាងថា លទ្ធផលយ៉ាងនោះ អាស្រ័យលើការសម្រេចរបស់អន្តរក្រសួង ដែលបានសម្រេចនាពេលកន្លងមក។

សូមបញ្ជាក់ថា ប្រសិនបើគ្មានការប្រែប្រួលទេ ចាប់ពីដើមឆ្នាំ២០១៨តទៅ គ្រប់បណ្ដាស្ថានីយទូរទស្សន៍ទាំងអស់ នឹងត្រូវបង់ពន្ធលើការនាំចូលរឿងភាគមកពីបរទេស ចំនួន ៤០ម៉ឺនរៀលថែមទៀត ក្នុងមួយភាគ ដែលមានរយៈពេល ១ម៉ោង៕

អត្ថបទ៖ ចរិយា