បុគ្គលិកវិទ្យុអាស៊ីសេរី ដែលត្រូវឃាត់ខ្លួន ប្រឈមនឹងការជាប់ពន្ធនាគារពី ៧ ទៅ ១៥ ឆ្នាំ
- 2017-11-18 06:10:12
- ចំនួនមតិ 0 | ចំនួនចែករំលែក 0
បុគ្គលិកវិទ្យុអាស៊ីសេរី ដែលត្រូវឃាត់ខ្លួន ប្រឈមនឹងការជាប់ពន្ធនាគារពី ៧ ទៅ ១៥ ឆ្នាំ
ចន្លោះមិនឃើញ
លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចោទប្រកាន់លើ លោក អ៊ួន ឈិន និងលោកយាង សុជាមេត្តា អតីតបុគ្គលិកវិទ្យុអាស៊ីសេរីពីបទ "ប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តររាយការការពារជាតិ" តាមមាត្រា៤៤៥ នៃក្រមព្រហ្មទណ្ឌ។ ហើយបានបញ្ជូនទៅចៅក្រមស៊ើបសួរចាត់ការបន្តតាមនីតិវិធី។ ការសម្រេចចោទប្រកាន់នេះ បានធ្វើឡើងនៅព្រឹកថ្ងៃទី១៨ ខែវិច្ឆិកា ឆ្នាំ២០១៧ នេះ។
សូមជម្រាបថា បទល្មើសនេះចែងថា "បទប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចធ្វើឱ្យអន្តររាយការការពារជាតិ អំពើប្រគល់ ឬធ្វើឱ្យងាយស្រួលធ្លាក់ដល់ដៃរដ្ឋបរទេស ឬភ្នាក់ងារបរទេសនូវព័ត៌មានវិធី វត្ថុ ឯកសារ ទិន្នន័យព័ត៌មានវិទ្យា ឬសលាកបត្រ ដែលអាចធ្វើឱ្យអន្តរាយការការពារជាតិ ត្រូវផ្ដន្ទាទោសជាប់ពន្ធនាគារពី ៧ឆ្នាំ ទៅ ១៥ឆ្នាំ"។
បុគ្គលិកវិទ្យុអាស៊ីសេរី ចំនួនពីរនាក់ដដែល ត្រូវបានសមត្ថកិច្ចឃាត់ខ្លួននៅក្នុងផ្ទះសំណាក់ម៉ារ៉ាឌី ស្ថិតនៅជិតគល់ស្ពានស្ទឹងមានជ័យ សង្កាត់ស្ទឹងមានជ័យ កាលពីម៉ោងប្រមាណ៧ យប់ថ្ងៃទី១៤ ខែវិច្ឆិកា ឆ្នាំ២០១៧។ ការឃាត់ខ្លួននេះ គឺខណៈពេលដែលអាជ្ញាធរខណ្ឌមានជ័យចុះធ្វើរដ្ឋបាល។
សូមរំឭកថា វិទ្យុអាស៊ីសេរី បានបិទការិយាល័យរបស់ខ្លួននៅភ្នំពេញ កាលពីថ្ងៃទី១២ ខែកញ្ញា ឆ្នាំ២០១៧។ ការបិទនេះ គឺដោយសារតែគ្មានច្បាប់អនុញ្ញាតពីក្រសួងព័ត៌មាន៕