ប្រវត្តិ និងសមិទ្ធផលធំៗរបស់ក្លឹប Terrengganu ដែល ធារី ចន្ថាប៊ីន ផ្ទេរទៅថ្មីៗនេះ

2017-12-05 07:07:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្លឹប Terengganu មានមូលដ្ឋាននៅតំបន់ Kuala Nerus រដ្ឋ Terengganu ប្រទេសម៉ាឡេស៊ី ហើយក្លឹបនេះត្រូវបានគេឲ្យរហស្សនាមថា "ក្រុមអណ្ដើក"។ Terengganu ត្រូវបានបង្កើតឡើងក្នុងឆ្នាំ១៩៧២ ដែលគ្រានោះមានឈ្មោះថា Terrengganu Football Association ។ ហើយទើបតែឆ្នាំ២០១៧ បានប្ដូរទៅជា Terengganu Football Club ។

ក្នុងទសវត្សរ៍ ១៩៧០ និង ១៩៨០ ក្លឹប Terengganu មិនសូវទទួលបានជោគជ័យឡើយ ដោយលេងនៅលីគទី៤ ម៉ាឡេស៊ី។ ក្នុងរដូវកាល ១៩៩០ ពួកគេបានក្លាយជាជើងឯកលីគលំដាប់ទី៣ ម៉ាឡេស៊ី ដោយចាញ់តែមួយប្រកួតប៉ុណ្ណោះក្នុងមួយរដូវកាល។

ឡើងទៅលីគទី២ដល់ឆ្នាំ១៩៩៧ Terengganu បានធ្លាក់ទៅលីគទី៣វិញ តែបានក្លាយជាស្ដេចត្រាញ់នៅលីគទី២ ម៉ាឡេស៊ីជាថ្មី នៅឆ្នាំ១៩៩៨។ ទសវត្សរ៍ ២០០០ គឺជាពេលដែល Terengganu ចាប់ផ្ដើមទទួលបានជោគជ័យខ្លាំងបំផុតក្នុងប្រវត្តិសាស្ត្ររបស់ខ្លួន។

ក្លឹបដដែល ធ្លាប់ជាជើងឯករងលីគកំពូលម៉ាឡេស៊ីចំនួន ១លើក (២០០១) ឈ្នះពានរង្វាន់ Malaysia Cup ១លើក (២០០១), FA Cup ម៉ាឡេស៊ី ២លើក (២០០០, ២០១១), Charity Sheild ម៉ាឡេស៊ី ១លើក (២០០១) ជើងឯករងលីគលំដាប់ទី៣ ម៉ាឡេស៊ី ចំនួន ៣លើក (១៩៩០, ១៩៩៨) និង ជើងឯកលីគទី៤ម៉ាឡេស៊ី ១លើក (១៩៦៩) ។

បច្ចុប្បន្ន Terengganu ប្រើប្រាស់កីឡដ្ឋាន Sultan Mizan Zainal Abidin Stadium តាំងពីខែកក្កដា ឆ្នាំ២០០៨។

សូមជម្រាបថា កីឡាករកូនកាត់ខ្មែរបារាំង ធារី ចន្ថាប៊ីន ទើបតែផ្ទេរទៅកាន់ក្លឹប Terengganu នេះ ក្នុងកុងត្រារយៈពេល ២ឆ្នាំ ពោលគឺរដូវកាល ២០១៨ និង ២០១៩។ ទោះត្រូវធ្លាក់ទៅលីគទី២ ក្នុងរដូវកាល២០១៧ កន្លងទៅ ក៏ Terengganu បានបញ្ចប់នៅចំណាត់ថ្នាក់លេខ២ នៅលីគលំដាប់ទី២ និងត្រូវឡើងទៅប្រកួតប្រជែងនៅលីគកំពូលម៉ាឡេស៊ីបន្តទៀតនៅឆ្នាំក្រោយ៕