Zoomer X តៃវ៉ាន់ និងម៉ូតូហ្ស៊ីន អាចសម្គាល់លក្ខណៈខុសគ្នាដូចម្ដេចខ្លះ?

2017-12-25 09:09:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជាធម្មតា ម៉ូតូ Zoomer X ហ្ស៊ីនដែលផលិតមកពីប្រទេសជប៉ុន ឬថៃ និង Zoomer X ផលិតមកពីតៃវ៉ាន់ មានរូបរាងខាងក្រៅស្ទើរតែដូចគ្នាបេះបិទ ប៉ុន្តែគុណភាពខុសគ្នាដាច់។ ដូចនេះ មកមើលការប្រៀបធៀបគ្នារវាងម៉ូតូទាំងពីរខុសគ្នាត្រង់ណាខ្លះ?

ម៉ូតជប៉ុន ឬថៃ

តែម៖ មានតែម Zoomer X ច្បាស់លាស់តាមស៊េរី មិនឆាប់ស្លកពណ៌
ស្តុបនិងចង្កៀង៖ ភ្លឺច្បាស់ មិនស្រអាប់
តួម៉ាស៊ីន៖ មានលេខសម្គាល់ពីរោងចក្រ Honda
តួខ្លួន៖ ប្រើគ្រោងដែកមិនច្រេះ ព័ទ្ធជុំវិញកែប
កម្លាំងម៉ាស៊ីន៖ ១១០ សេសេ អាចបរបានលើសពី ៩០ គ.ម/ម៉
សម្លេង៖ ការដេរបញ្ជោះមានសំឡេងស្ងាត់(មិនលាន់ខ្លាំង)
កុងទ័រ៖ ប្រភេទ Digital (អេឡិចត្រូនិក)បង្ហាញទិន្នន័យបានជាក់លាក់ដូចជាល្បឿន កម្រិតប្រេងឥន្ធនៈ និងរយៈចម្ងាយដែលបានបើកបរ
បច្ចេកវិទ្យា៖ ប្រើប្រព័ន្ធពន្លត់ម៉ាស៊ីនដោយស្វ័យប្រវត្តិ (Idling Stop System) ម៉ាស៊ីនប្រើប៊ិចប្រភេទPGM-FI ស៊ីសាំងតិច (១លីត្រជិះបានចម្ងាយប្រមាណ ៦២,៣គ.ម)
ការតម្លើង៖ ដោយដៃខ្លះ និងប្រើគ្រឿងចក្រខ្លះពីរោងចក្រ - តម្លៃ៖ ២ ០០០ ដុល្លារ ឬលើសនេះ

ម៉ូតូតៃវ៉ាន់

តែម៖ មិនច្បាស់លាស់ ឬគ្មានតែមតែម្តង
សម្លេង៖ លាន់ខ្លាំង ឆាប់ធ្លាក់កម្លាំងម៉ាសុីន
ស្ដុបនិងចង្កៀង៖ ឆាប់ស្រអាប់ពណ៌ ឯអាវឆាប់រលុងពេលជិះបាន ១ឆ្នាំឡើង
តួម៉ាស៊ីន៖ គ្មានលេខសម្គាល់ម៉ាស៊ីនត្រឹមត្រូវ ឬដាក់ឲ្យតែមាន
កុងទ័រ៖ ធម្មតា គ្មានបំពាក់បច្ចេកវិទ្យាកុងទ័រអេឡិចត្រូនិក
ការតម្លើង៖ ដោយដៃ ឬប្រើឧបករណ៍ជំនួយតិចតួច
ប្រភេទម៉ាស៊ីន៖ ប្រើបេនសាំងធម្មតា គ្មានបច្ចេកវិទ្យាប្រើប៊ិចប្រភេទ PGM-FI
បច្ចេកវិទ្យា៖ គ្មានប្រព័ន្ធពន្លត់ម៉ាស៊ីនដោយស្វ័យប្រវត្តិ (Idling Stop System)
កម្លាំងម៉ាស៊ីន៖ ១១០ សេសេ ល្បឿនបរលឿនបំផុតត្រឹម ៨០ គ.ម/ម៉ - តម្លៃ៖ ១០៥០ ដុល្លារ ឬទាបជាងនេះ

ម៉ូតូផលិតផលរបស់តៃវ៉ាន់

ហេតុអ្វីបានគេឲ្យតម្លៃទៅលើផលិតថៃ ឬជប៉ុនល្អជាង?

ចំណុចនេះ ប្រិយមិត្តដែលប្រើប្រាស់គ្រឿងអេឡិចត្រូនិកច្រើន ប្រាកដជាបានដឹង រាល់ផលិតផលអេឡិចត្រូចនិកដែលចេញពីប្រទេសទាំង ២ នេះដូចជា ម៉ូតូ ឬរថយន្តជាដើម តែងទទួលបានទំនុកចិត្តខ្ពស់ពីអ្នកប្រើ ដោយហេតុថា មានការធានារយៈពេលប្រើត្រឹមត្រូវ មានការណែនាំការប្រើប្រាស់ច្បាស់លាស់ ផលិតផលមានស្ដង់ដារ ប្រើយូរឆ្នាំគុណភាពនៅតែដដែលទោះការថែទាំតិចតួចក្ដី។ មិនមែនគ្រប់ផលិតផលគ្រឿងអេឡិចត្រូនិករបស់តៃវ៉ាន់គ្មានគុណភាពនោះទេ នៅមានផលិតដែលគេផលិតសម្រាប់នាំចេញទៅក្រៅប្រទេស និងរបស់ប្រើក្នុងស្រុកមួយចំនួន មានគុណភាពអាចទទួលយកបានមិនចាញ់ជប៉ុន ឬ ថៃនោះទេ គ្រាន់តែថា ឈ្មួញកណ្ដាលតែងចង់បានចំណេញ ដូចនេះការនាំយកផលិតផលដែលអាចបន្លំភ្នែកបាន ឬស្រដៀងគ្នាហើយយកមកលក់បានចំណេញច្រើនផងនោះ តើអ្នកណាទៅទ្រាំលក់របស់ថ្លៃ តែគ្មានអ្នកទិញ?

ទោះជាយ៉ាងនេះក្ដី ត្រឡប់មកការប្រៀបធៀបខាងលើវិញ ក៏មិនប្រាកដថាម៉ូតូតៃវ៉ាន់ជិះមិនកើតដែរ គ្រាន់តែថា ចំពោះអ្នកដែលមានជីវភាពមធ្យម ប្រាកដជាគ្មានលទ្ធភាពទៅទិញម៉ូតតម្លៃរាប់ពាន់ដុល្លារនោះទេ ទោះដឹងថាវាមិនសូវធន់ មិនអាចប្រើបានយូរឆ្នាំដូចម៉ូតូដែលមានធានាច្បាស់លាស់ក្តី តែវាអាចជំនួសកម្លាំងពលកម្មបានមួយផ្នែកធំដែរដូចជា អ្នកប្រកបរបរដាំដុះបន្លែ បង្ការនៅជនបទជាដើម ដូចនេះប្រិយមិត្តអាចពិចារណាដោយខ្លួនឯង និងកត់ចំណាំចំណុចខាងលើនេះបាន។ រីឯរបៀបនៃការការតំឡើងម៉ូតូតៃវ៉ាន់ ក្រុមការងារនឹងចេញផ្សាយនៅពេលឆាប់ៗនេះ៕

អត្ថបទ៖ រក្សា