អាមេរិក ប្រកាសដកជំនួយ និងចោទប៉ាគីស្ថាន ថា "ខ្លួនមួយចង់ជិះទូក២"

2018-01-03 01:48:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហរដ្ឋអាមេរិក បានប្រកាសជាផ្លូវការថា នឹងកាត់បន្ថយជំនួយចំនួន ២៥៥លានដុល្លារ ពីប្រទេសប៉ាគីស្ថាន។ នេះជាការលើកឡើងរបស់លោកស្រី Nikki Haley ឯកអគ្គរដ្ឋទូតអាមេរិកប្រចាំអង្គការសហប្រជាជាតិ កាលពីថ្ងៃអង្គារ ទី២ មករា ២០១៨។

លោកស្រី Nikki Haley

លោកស្រី Nikki បញ្ជាក់ថា មូលហេតុនៃការដកជំនួយនេះ ព្រោះតែភាគីខាងប៉ាគីស្ថានមិនអាចធ្វើកិច្ចសហការពេញលេញជាមួយអាមេរិក ដើម្បីប្រឆាំងនឹងអំពើភេរវកម្ម។ មួយវិញទៀត ប៉ាគីស្ថាន បានលេងល្បែង "ខ្លួនមួយចង់ជិះទូក២" ដោយពេលខ្លះធ្វើជាសហការជាមួយអាមេរិក តែពេលខ្លះទៀតបែរជាលួចផ្គត់ផ្គង់ទៅឲ្យក្រុមភេរវករ ដើម្បីវាយប្រហារអាមេរិកទៅវិញ។

ពាក់ព័ន្ធនឹងបញ្ហានេះ លោក ដូណាល់ ត្រាំ បានបង្ហោះសារនៅលើ Twitter ថា ប៉ាគីស្ថាន គ្មានបានផ្ដល់ផលប្រយោជន៍អ្វីសោះឡើយឲ្យអាមេរិក ក្រៅពីពាក្យកុហក និងការបោកបញ្ឆោត។ លោកប្រធានាធិបតីអាមេរិក បានឲ្យដឹងទៀតថា ក្នុងរយៈពេល១៥ឆ្នាំកន្លងមក អាមេរិកផ្ដល់ជំនួយឲ្យប៉ាគីស្ថានអស់ប្រមាណជា ៣៣ពាន់លានដុល្លារ។

មេដឹកនាំយោធា និងស៊ីវិលកំពូលរបស់ប៉ាគីស្ថាន បានបង្ហាញសេចក្ដីខកចិត្តជាខ្លាំងចំពោះការប្រកាសនេះ ហើយបានច្រានចោលនូវការចោទប្រកាន់របស់អាមេរិកថា គ្មានមូលដ្ឋានត្រឹមត្រូវ។ ប៉ាគីស្ថាន បញ្ជាក់ថា ខ្លួននឹងនៅតែប្ដេជ្ញាដើរក្នុងតួនាទីយ៉ាងសំខាន់ដដែល ដើម្បីដឹកនាំប្រទេសឲ្យស្ថិតនៅក្នុងដំណើរការសន្តិភាព៕

ប្រភព៖ CGTN ប្រែសម្រួល៖ ឈាង.