FIFA ជ្រើសយកកម្ពុជា ជាម្ចាស់ផ្ទះនៃកិច្ចប្រជុំកំពូលរបស់ខ្លួន ដោយសារមូលហេតុ ២

2018-02-08 13:22:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហព័ន្ធបាល់ទាត់ពិភពលោក FIFA បានរៀបចំកិច្ចប្រជុំកំពូលរបស់ខ្លួន នៅលើទឹកដីនៃព្រះរាជាណាចក្រកម្ពុជា នាថ្ងៃទី៨ និង៩ ខែកុម្ភៈ ដោយមានការចូលរួមដោយផ្ទាល់ពីលោក Gianni Infantino ប្រធាន FIFA រួមទាំងមន្រ្ដីជាន់ខ្ពស់ជាច្រើនរូបរបស់ FIFA និងប្រធានសហព័ន្ធបាល់ទាត់នៃបណ្ដាប្រទេសជាង ២០ផ្សេងទៀត។

លោក Gianni Infantino ប្រធាន FIFA ក្នុងកិច្ចប្រជុំនៅកម្ពុជា ថ្ងៃនេះ

**តើហេតុអ្វី FIFA ជ្រើសយកកម្ពុជា ជាម្ចាស់ផ្ទះនៃកិច្ចប្រជុំដ៏ធំនេះ?**

លោកខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា បានថ្លែងប្រាប់ឲ្យដឹង នៅក្រោយកិច្ចប្រជុំក្នុងថ្ងៃដំបូង នាថ្ងៃទី៨ ខែកុម្ភៈនេះថា មានមូលហេតុ២ ដែលធ្វើឲ្យសហព័ន្ធកីឡាបាល់ទាត់ពិភពលោក មកប្រជុំនៅកម្ពុជា គឺដោយសារកម្ពុជា ជាប្រទេសមានសុខសុវត្ថិភាព និងដោយសារសហព័ន្ធកីឡាបាល់ទាត់កម្ពុជា (FFC) មានទំនាក់ទំនងល្អជាមួយ FIFA។

លោក ខៀវ សាម៉េត បញ្ជាក់ថា មានប្រទេសច្រើនណាស់ ដែលចង់ធ្វើជាម្ចាស់ផ្ទះនៃកិច្ចប្រជុំនេះ ព្រោះជាកិត្តិយសដ៏ធំរបស់ប្រទេសនីមួយៗ។ លោកថា កម្ពុជា ជាប្រទេសទី២ នៅអាស៊ាន បន្ទាប់ពីសិង្ហបុរី ដែលធ្វើជាម្ចាស់ផ្ទះនៃកិច្ចប្រជុំដូចគ្នានេះ កាលពីឆ្នាំ២០១៦។

លោក ខៀវ សាម៉េត អនុប្រធាន FFC ក្នុងកិច្ចប្រជុំថ្ងៃនេះ

តើកិច្ចប្រជុំនេះ ផ្ដោតទៅលើបញ្ហាអ្វី?

លោក ខៀវ សាម៉េត បានបញ្ជាក់យ៉ាងខ្លីថា កិច្ចប្រជុំរបស់ FIFA នេះ គឺផ្ដោតជាចម្បងលើការអភិវឌ្ឍបាល់ទាត់។ លោកការអភិវឌ្ឍបាល់ទាត់ គឺជាអ្វីដែលកម្ពុជាត្រូវការ ដោយ FFC បានបង្កើតសាលាបាល់ទាត់បានទូទាំង ២៥ ខេត្ត-រាជធានីទូទាំងប្រទេស ដែលប្រភពចំណូលដ៏ធំ គឺបានមកពី FIFA។

តើកម្ពុជាទទួលបានអ្វីខ្លះពីកិច្ចប្រជុំនេះ?

លោកអនុប្រធានកីឡាបាល់ទាត់កម្ពុជា បានបញ្ជាក់ថា កម្ពុជា ទទួលបានផលប្រយោជន៍ច្រើនពីកិច្ចប្រជុំនេះ គឺទី១ កម្ពុជា ទទួលបានកិត្តិយស ដែលអាចធ្វើជាម្ចាស់ផ្ទះនៃកិច្ចប្រជុំដ៏ធំបែបនេះ ទី២ គឺ FFC អាចបង្កើតទំនាក់ទំនងជាមួយសហព័ន្ធកីឡាបាល់ទាត់ប្រទេសជាច្រើនទៀត ដែលមិនធ្លាប់ទាក់ទងគ្នាពីមុនមក ដូចជាប្រទេសនៅអាហ្រ្វិក និងប្រទេសនៅឆ្ងាយៗជាច្រើនទៀត។ ផលប្រយោជន៍ធំមួយទៀត គឺ FFC អាចលើកយកបញ្ហាដែលជួបប្រទះកន្លងមក យកមកដោះស្រាយនៅក្នុងកិច្ចប្រជុំ ដែលបន្តនាថ្ងៃទី៩ ខែកុម្ភៈស្អែកនេះ។

ព័ត៌មានផ្សេងទៀតទាក់ទងនឹងកិច្ចប្រជុំនេះ ខ្លីៗ នឹងផ្សាយជូនជាបន្តបន្ទាប់!

រាយការណ៍ដោយ៖ លន ហ្សាឌីណា

អត្ថបទ៖ សុខ សុវត្ថិ