សម្តេច ហ៊ុន សែន ស្នើឲ្យអាស៊ាន និងអូស្ត្រាលី ពិចារណាកំណត់ទិសដៅអនាគត ៤ចំណុច

2018-03-18 06:58:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កិច្ចប្រជុំកំពូលពេញអង្គអាស៊ាន-អូស្ត្រាលី នាព្រឹកថ្ងៃទី១៨ ខែមីនា ឆ្នាំ២០១៨ នៅមជ្ឈមណ្ឌលសន្និសីទអន្តរជាតិស៊ីដនី ប្រទេសអូស្ត្រាលី សម្តេចនាយករដ្ឋមន្រ្តី ហ៊ុន សែន បានថ្លែងដោយស្នើឲ្យអាស៊ាន និងអូស្ត្រាលី គួរពិចារណាកំណត់ទិសដៅអនាគតចំនួន ៤ចំណុច។

ទី១. សន្ដិភាព សន្ដិសុខ និងស្ថិរភាព គឺជាចំណុចស្នូលសម្រាប់ទំនាក់ទំនងអាស៊ាន-អូស្រ្តាលី ព្រោះនេះគឺជាមូលដ្ឋានគ្រឹះនៃការរីកចម្រើន និងវិបុលភាព នៅក្នុងតំបន់ទាំងមូល។

ទី២. ត្រូវជំរុញថែមទៀត នូវកិច្ចសហប្រតិបត្តិការក្នុងវិស័យអប់រំ។ អូស្ដ្រាលី បានដាក់ទុនក្នុងតំបន់អាស៊ីអាគ្នេយ៍ អស់ពេលច្រើនទស្សវត្សរ៍មកហើយ តាមរយៈការផ្ដល់អាហារូបករណ៍ដល់និស្សិតឲ្យធ្វើការសិក្សា និងបណ្ដុះបណ្ដាលជំនាញវិជ្ជាជីវៈ នៅអូស្ដ្រាលី និងដាក់ចេញនូវផែនការកូឡុំបូថ្មីរបស់អូស្ដ្រាលី។ ជាលទ្ធផល មានបញ្ញវន្ដជាច្រើន ដែលបានបញ្ចប់ការសិក្សានៅអូស្ដ្រាលី ហើយកំពុងតែចូលរួមចំណែកយ៉ាងសកម្ម នៅក្នុងដំណើរការអភិវឌ្ឍប្រទេសរៀងៗខ្លួន ទាំងក្នុងផ្នែករដ្ឋ និងឯកជន។ កម្ពុជាសូមថ្លែងអំណរគុណយ៉ាងជ្រាលជ្រៅ និងស្វាគមន៍ ចំពោះការពង្រឹងនូវផែនការកូឡុំបូថ្មីរបស់អូស្ដ្រាលីដល់ប្រទេសជាសមាជិកអាស៊ានទាំងអស់ ដើម្បីជំរុញការតភ្ជាប់រវាងប្រជាជន និងប្រជាជន ឲ្យកាន់តែប្រសើរ ដោយគាំទ្រដល់សិស្ស-និស្សិតអូស្ដ្រាលី ទៅសិក្សា និងអនុវត្តការងារ នៅក្នុងបណ្ដាប្រទេសសមាជិកអាស៊ាន។

ទី៣. នៅក្នុងការប្រជុំថ្នាក់ដឹកនាំនៃភាពជាដៃគូសេដ្ឋកិច្ចគ្រប់ជ្រុងជ្រោយនៃតំបន់ (RCEP) នៅទីក្រុងម៉ានីលកន្លងទៅ ថ្នាក់ដឹកនាំទាំងអស់បានប្ដេជ្ញាចិត្តបញ្ចប់ការចរចា RCEP នៅឆ្នាំ២០១៨នេះ។ កម្ពុជាសូមស្នើឲ្យអាស៊ាន-អូស្ដ្រាលី និងប្រទេសដៃគូដទៃទៀត បញ្ចប់ការចរចា RCEP ទៅតាមពេលវេលាដែលបានកំណត់។

ទី៤. កម្ពុជាសូមលើកទឹកចិត្តអូស្ដ្រាលី ឲ្យបន្ដគាំទ្រតួនាទីស្នូលរបស់អាស៊ានក្នុងតំបន់ ជាពិសេសតាមរយៈយន្ដការកិច្ចប្រជុំកំពូលអាស៊ីបូព៌ា ដើម្បីឆ្លើយតបប្រកបដោយប្រសិទ្ធភាពខ្ពស់ទៅនឹងបញ្ហាប្រឈមសន្ដិសុខមិនប្រពៃណីនានា ដូចជា បញ្ហាភេរវកម្ម គ្រោះមហន្ដរាយធម្មជាតិ ការប្រែប្រួលអាកាសធាតុ អន្ដោប្រវេសន៍អន្ដរជាតិ និងជំងឺរាតត្បាតជាដើម ដើម្បីធានានូវសុខដុមរមនា ជូនប្រជាជនក្នុងតំបន់អាស៊ីបូព៌ា។

សម្តេចនាយករដ្ឋមន្ត្រី បានថ្លែងបន្តថា ក្នុងអាស៊ាន និងកម្ពុជា សហគ្រាសធុនតូច និងមធ្យម រួមទាំងសហគ្រាសមីក្រូផង គឺជាមូលដ្ឋានដ៏សំខាន់ នៅក្នុងការអភិវឌ្ឍសេដ្ឋកិច្ច និងលើកស្ទួយកំណើននៃបណ្ដាប្រទេសសមាជិក ដែលបានស្រូបយកកម្លាំងពលកម្មយ៉ាងច្រើន៕

អត្ថបទ៖ សំភី