តុលាការមិនទាន់ចោទប្រកាន់លោក ឡាយ វណ្ណៈ ពាក់ព័ន្ធនឹងករណីឃាតកម្ម១នៅឡើយ

2018-04-02 11:54:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់ថា មកដល់ល្ងាចថ្ងៃទី០២ ខែមេសា ឆ្នាំ២០១៨ លោកសៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នៅពុំទាន់សម្រេចបែបណានៅឡើយទេ ជុំវិញសំណុំរឿងលោក ឡាយ វណ្ណៈ អតីតអភិបាលខេត្តតាកែវ និងជនសង្ស័យ៥នាក់ផ្សេងទៀត លើករណីឃាតកម្មអ្នកស្រី ចេវ សុវឌ្ឍនា។

លោក លី សុផាណា ឲ្យដឹងថា អយ្យការកំពុងសួរចម្លើយលោក ឡាយ វណ្ណៈ និងពិនិត្យឯកសារ ភស្តុតាងនៅក្នុងសំណុំរឿងនេះ។

សូមជម្រាបថា លោក ឡាយ វណ្ណៈ ត្រូវបានសមត្ថកិច្ចបញ្ជូនខ្លួនទៅសាលាដំបូងរាជធានីភ្នំពេញ កាលពីរសៀលថ្ងៃទី០២ ខែមេសា ឆ្នាំ២០១៨ ដើម្បីឲ្យព្រះរាជអាជ្ញា ធ្វើការសាកសួរពាក់ព័ន្ធនឹងការស្លាប់របស់អ្នកស្រី ចេវ សុវឌ្ឍនា នៅក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨។

ចំណែកជនសង្ស័យទាំង៥នាក់ផ្សេងទៀត ក្នុងនោះមានលោក ឡាយ ណារិទ្ធ អតីតស្នងការរងនគរបាលខេត្តតាកែវ ក៏ស្ថិតនៅក្រោមការសាកសួររបស់លោក សៀង សុខ ផងដែរ។

លោក ឡាយ វណ្ណៈ គឺជាជនទី៦ ដែលត្រូវបានកម្លាំងនគរបាលព្រហ្មទណ្ឌនៃក្រសួងមហាផ្ទៃ ចាប់ខ្លួននៅមុខវិទ្យាល័យ ជា ស៊ីម តាកែវ ស្ថិតក្នុងសង្កាត់រកាក្នុង ក្រុងដូនកែវ កាលពីរសៀលថ្ងៃទី១ ខែមេសា ឆ្នាំ២០១៨ ក្នុងពេលលោកកំពុងតែធ្វើដំណើរតាមរថយន្ត ក្រោយបញ្ចប់ការផ្ទេរមុខតំណែងប្រធានគណបក្សប្រជាជនខេត្តតាកែវ ទៅឲ្យលោក អ៊ូច ភា អភិបាលខេត្តតាកែវថ្មីវិញ៕