សាលា​ដំបូង​រាជធានី​ភ្នំពេញ បានសម្រេច​ចោទ​ប្រកាន់​​លោកឡាយ វណ្ណៈ អតីត​អភិបាល​ខេត្ត​តាកែវ និង​លោក​ឡាយ ណារិទ្ធ អតីត​ស្នងការ​រង​ខេត្ត​តាកែវ ពីបទឃាតកម្ម។ ការ​ចោទ​ប្រកាន់នេះ បាន​ធ្វើ​ឡើង​នៅរសៀល​ថ្ងៃទី៣ ខែ​មេសា ឆ្នាំ២០១៨ នេះ បន្ទាប់​ពីព្រះរាជ​អាជ្ញា និង​ចៅក្រម​ស៊ើបសួរបាន​បញ្ចប់​ការ​សាកសួរ។

ចំណែកឈ្មោះ ជឹម វុធ និង​ឈ្មោះ មេន សម័យ អ្នកបើកឡានឲ្យលោកឡាយ វណ្ណៈ ត្រូវ​ចោទប្រកាន់ពីបទលាក់បាំងបទល្មើស។ រី​ឯ​ឈ្មោះចាន់ រី ភេទស្រី អ្នក​បម្រើ​នៅ​ផ្ទះអ្នក​ស្រី ចេវ សុវឌ្ឍនា និងឈ្មោះ តាក់ រតនា ជាអ្នកបើកឡានឲ្យលោកឡាយ ណារិទ្ធ ត្រូវ​បាន​អនុញ្ញាត​ឲ្យត្រឡប់​ទៅផ្ទះ​វិញ។

លោកលី សុផាណា អ្នកនាំពាក្យ​សាលាដំបូង​រាជធានីភ្នំពេញ បាន​ឲ្យដឹងថា អយ្យការបានសម្រេច​ចោទប្រកាន់ទៅលើឈ្មោះ ឡាយ វណ្ណៈ និងឈ្មោះ ឡាយ ណារិទ្ធ ពីបទ​ឃាតកម្ម តាមមាត្រា១៩៩ នៃក្រមព្រហ្មទណ្ឌ ហើយចោទប្រកាន់ទៅលើឈ្មោះ ម៉េន សម័យ និងឈ្មោះ ជឹម វុធ ពីបទ​លាក់បាំងតម្រុយ តាមមាត្រា ៥៣២ នៃក្រមព្រហ្មទណ្ឌ។ សំណុំរឿងនេះ នឹង​ត្រូវ​បញ្ជូន​ទៅចៅក្រមស៊ើបសួរដើម្បីចាត់ការបន្តតាមនីតិវិធី។

សូម​បញ្ជាក់ថា យោង​តាម​មាត្រា ១៩៩ នៃក្រមព្រហ្មទណ្ឌ ចែង​ថា​បទ​ឃាតកម្ម ត្រូវ​ផ្តន្ទាទោស​​ដាក់​ពន្ធ​នាគារ​ពី​១០ ទៅ​១៥​ឆ្នាំ។ ចំណែក​មាត្រា៥៣២ ចែង​ថា បទ​លាក់​បាំង​តម្រុយ ត្រូវ​ផ្តន្ទា​ទោសដាក់​ពន្ធនាគារ​ពីមួយឆ្នាំ ទៅបី​ឆ្នាំ និង​ពិន័យ​ជា​ប្រាក់​ ពីរ​លាន​រៀល​ទៅប្រាំមួយ​លាន​រៀល៕