ផ្សិតកញ្ចូរ ជាអាហារពិសេសមានតម្លៃខ្ពស់នៅខេត្តមណ្ឌលគិរី

2018-05-24 06:03:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងរដូវវស្សានេះ ពោលគឺក្នុងខែឧសភា ផ្សិតកញ្ជោរត្រូវគេឃើញថា កំពុងដុះជាបន្តបន្ទាប់ ហើយនៅតាមផ្ទះប្រជាពលរដ្ឋមួយចំនួន ក្នុងស្រុកកែវសីមា ខេត្តមណ្ឌលគិរី ក៏គេសង្កេតឃើញមានការយកផ្សិតប្រភេទនេះ មកធ្វើការកែច្នៃជាម្ហូបអាហារច្រើនគួរសមដែរ។ ដោយឡែកតាមបណ្តាទីផ្សារ ក្នុងស្រុកមួយនេះ បែរជាពុំសូវសម្បូរផ្សិតកញ្ចូរលក់ទៅវិញ។

អ្នកយកព័ត៌មាន នៃទីភ្នាក់ងារសារព័ត៌មានកម្ពុជា បានជួបបងប្អូនប្រជាពលរដ្ឋរស់នៅស្រុកកែវសីមា ដោយពួកគាត់បានលើកឡើងថា ផ្សិតកញ្ជោរនេះមានសណ្ឋានស្រដៀងគ្នានិងផ្សិតចំបើង ប៉ុន្តែផ្សិតប្រភេទនេះមានដើមធំជាង គិតចាប់ពីផ្នែកខាងគល់រាងធំ ស្តួចទៅលើរាងតូច។ ឆត្ររបស់វា ឬផ្នែកខាងលើបំផុតមានពណ៌ប្រផេះស្រាល។ ចំពោះរសជាតិវិញ ពេលចម្អិនរួច វាស្រដៀងនិងសាច់មាន់ស្រែ។

ស្ត្រីវ័យកណ្តាលម្នាក់ឈ្មោះ នីម បានលើកឡើងថា អ្នកស្រីតែងតែយកផ្សិតកញ្ជោរមកធ្វើម្ហូបក្នុង ១ឆ្នាំបាន ៤ទៅ ៥ដងដែរ គ្រាដែលវាបានដុះក្នុងដីចម្ការរបស់អ្នកស្រី។ អ្នកស្រីបន្តថា ផ្សិតកញ្ជោរ សម្រាប់អ្នកស្រីនិយមយកមកធ្វើម្ហូបដូចជាស្ងោរជាមួយសាច់ជ្រូក សាច់មាន់ ឬត្រី ហើយបើឆារវិញអាចប្រើសាច់អ្វីឆាជាមួយក៏បាន តាមតម្រូវការ។ អ្នកស្រីបញ្ជាក់ថា វាអាចធ្វើម្ហូបបានច្រើនមុខណាស់ ពោលគឺអាចចំហុយ ស្លរប្រហើរ សន្លក់ និយាយរួមមុខម្ហូបខ្មែរអាចធ្វើបានច្រើនមុខតាមតែចូលចិត្ត។ លើសពីនេះ ផ្សិតកញ្ជោរអាចយកទៅបបរគ្រឿងបានយ៉ាងឆ្ងាញ់ថែមទៀត។

ឆ្លើយតបទៅនឹងសំណួរដែលសួរថាតើហេតុអ្វីបានជាពុំសូវមានផ្សិតប្រភេទនេះលក់តាមទីផ្សារទៅវិញ ដែលខែនេះជារដូវផ្សិតកញ្ជោរ ដុះនោះ? អ្នកស្រីបញ្ជាក់ថា មកពីផ្សិតនេះមានរសជាតិឆ្ងាញ់ ហើយដុះតែម្តងក្នុង ១ឆ្នាំ ទើបពេលដែលគេដកបាន ពុំសូវលក់ទេ សុខចិត្តទុកហូបខ្លួនឯងវិញប្រសើរជាង តែបើលក់វិញក៏មានតម្លៃថ្លៃដែរ។ ចំណែកតម្លៃវិញ ផ្សិតកញ្ជោរក្នុង១គីឡូក្រាម អាចលក់បានរហូតចន្លោះដល់ ៤ទៅ៦ម៉ឺនរៀលឯណោះ៕