NASA រកឃើញសារធាតុសរីរាង្គ នៅលើភពអង្គារហើយ

2018-06-11 09:18:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យាន Curiosity របស់ទីភ្នាក់ងារអវកាស NASA បានរកឃើញភស្តុតាងដែលគេសង្ស័យថា ជាប្រភពនៃការបង្កជីវិត នៅភពអង្គារ។ ភស្តុតាងទាំងនោះ មានដូចជាប្រភពសារធាតុសរីរាង្គ នៅក្នុងរណ្ដៅមួយកន្លែង។ នេះជាការប្រកាសរបស់ NASA ក្នុងសន្និសីទសារព័ត៌មានមួយ កាលពីសប្ដាហ៍មុន។

រូបភាពដែលត្រូវបានបង្កើតឡើងពីកុំព្យូទ័រ បង្ហាញពីរណ្ដៅ Gale Grater ដែលអាចជាអតីតបឹងមួយនៅភពអង្គារ (រូបថត៖ NASA)

លោកស្រី Jennifer L. Eigenbrode តារាវិទូរបស់ NASA បានឲ្យដឹងថា យាន Curiosity បានរកឃើញម៉ូលេគុលដែលអាចបង្កជីវិត ពីសំណាកគំរូនៅទីតាំងខាងលើ ក្នុងថ្មភក់ដែលរាយប៉ាយនៅតំបន់ទីទូល Mojave and Confidence ក្នុងរណ្ដៅ Gale Grater ។ ថ្មភក់ទាំងនោះ ត្រូវគេជឿជាក់ថា មានអាយុកាលប្រហែល ៣ពាន់លានឆ្នាំមកហើយ។ ពួកវាមានផ្ទុកម៉ូលេគុល ដែលស្រដៀងនឹងម៉ូលេគុលបង្កជីវិតក្នុងថ្ម នៅលើផែនដី។

យ៉ាងណាក៏ដោយ លោកស្រី Eigenbrode បញ្ជាក់ថា ម៉ូលេគុលទាំងនោះក៏អាចបន្សល់ពីប្រភពដែលមិនមែនជាជីវិតផងដែរ ដូចជា អាចម៍ផ្កាយជាដើម។ អ្នកវិទ្យាសាស្ត្រដដែលបន្ថែមថា ទោះបីជារបកគំហើញចុងក្រោយនេះមិនទាន់រកឃើញភស្តុតាងនៃជីវិតនៅលើភពអង្គារក៏ដោយ ក៏វាជាការបោះជំហានទៅមុខថ្មីមួយទៀត មុនបេសកកម្មបន្ទាប់នៅលើភពអង្គារ និងជាសញ្ញាវិជ្ជមានអំពីភាពដែលអាចទ្រទ្រង់ជីវិតបានកាលពីពេលដ៏យូរលង់របស់ភពពណ៌ក្រហមមួយនេះ។

យាន Curiosity (រូបថត៖ NASA)

សូមបញ្ជាក់ថា យាន Curiousity ត្រូវបានបញ្ជូនចេញពីផែនដី កាលពីថ្ងៃទី២៦ ខែវិច្ឆិកា ឆ្នាំ២០១១ ដោយត្រូវធ្វើដំណើរក្នុងចម្ងាយផ្លូវ ៥៦០លានគីឡូម៉ែត្រ។ យានដែលមានតម្លៃ ២,៥ពាន់លានដុល្លារនេះ បានចុះចតនៅលើភពអង្គារ កាលពីថ្ងៃទី៦ ខែសីហា ឆ្នាំ២០១២។ មកទល់ពេលបច្ចុប្បន្ន វាបានធ្វើដំណើរនៅលើភពនេះ បានចម្ងាយ ១៨គីឡូម៉ែត្រ៕

ប្រភព៖ Dailymail ប្រែសម្រួល៖ លាភ.