ស្ថាប័ន ៣ បញ្ជាក់ពីភាពខុសច្បាប់នៃការទូទាត់កាសប្រាក់អេឡិចត្រូនិច

2018-06-20 02:59:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ធនាគារជាតិនៃកម្ពុជា គណៈកម្មការមូលបត្រកម្ពុជា និងអគ្គស្នងការដ្ឋាននគរបាលជាតិ បានចេញសេចក្តីថ្លែងការណ៍រួម ដោយបញ្ជាក់ថា ការផ្សព្វផ្សាយ ការចរាចរ ទិញ លក់ ជួញដូរ ទូទាត់កាសអេឡិចត្រូនិកនៅកម្ពុជា ដែលមិនមានអាជ្ញាប័ណ្ណពីអាជ្ញាធរមានសមត្ថកិច្ច គឺជាសកម្មភាពខុសច្បាប់។ សេចក្ដីថ្លែងការណ៍រួមនោះ បានបញ្ជាក់ថា កាសអេឡិចត្រូនិកទាំងនោះ មានដូចជា KH Coin, Suncoin, K coin, One-coin និង Forex coin ជាដើម។

សេចក្តីថ្លែងការណ៍ដដែល ក៏បានបង្ហាញដែរថា ការផ្សព្វផ្សាយ ចរាចរ ទិញ លក់ ជួញដូរ ទូទាត់ កាសអេឡិចត្រូនិកដែលមិនមានការគ្រប់គ្រងពីអាជ្ញាធរមានសមត្ថកិច្ច នឹងបង្កហានិភ័យធ្ងន់ធ្ងរដល់សាធារណជន និងសង្គមទាំងមូល ដូចជា៖

ចេញផ្សាយដោយពុំមានវត្ថុធានាសងត្រលប់មកវិញនោះឡើយ
ទទួលរងការខាតបង់លើការវិនិយោគ ដោយសារតែតម្លៃចារឹករបស់កាសអេឡិចត្រូនិកប្រែប្រួលគ្មានមូលដ្ឋានច្បាស់លាស់
ប្រឈមនឹងឧក្រិដ្ឋកម្មបច្ចេកវិទ្យា និងធ្វើឲ្យបាត់បង់មូលនិធិ ដោយសារការលួចចូលទៅក្នុងប្រព័ន្ធ
ពុំមានយន្តការការពារផលប្រយោជន៍អតិថិជន អ្នកប្រើប្រាស់កាសអេឡិចត្រូនិកជាជនអនាមិក ពុំមានការសម្គាល់អត្តសញ្ញាណ ឬសាវតារបស់អ្នកប្រើប្រាស់បានច្បាស់លាស់ គឺជាហានិភ័យក្នុងការសម្អាតប្រាក់ និងហិរញ្ញប្បទានភេរវកម្ម។

នៅក្នុងសេចក្ដីថ្លែងការណ៍រួមនោះ ក៏ប្រកាសអំពាវនាវដល់សាធារណជនទាំងអស់ ប្រុងប្រយ័ត្នចំពោះការឃោសនាផ្សព្វផ្សាយកៀរគរប្រមូលមូលនិធិ និងធ្វើប្រតិបត្តិការ ទិញ លក់ ជួញដូរ ទូទាត់ កាសអេឡិចត្រូនិក ដែលមិនមានអាជ្ញាប័ណ្ណពីអាជ្ញាធរមានសមត្ថកិច្ច។

សេចក្តីថ្លែងការណ៍រួម បានគូសបញ្ជាក់ថា “បុគ្គល ឬនីតិបុគ្គលណា ដែលធ្វើការឃោសនាផ្សព្វផ្សាយ កៀរគរប្រមូលមូលនិធិ ធ្វើប្រតិបត្តិការ ទិញ លក់ ជួញដូរ ទូទាត់កាសអេឡិចត្រូនិក ដោយមិនមានអាជ្ញាប័ណ្ណពីអាជ្ញាធរមានសមត្ថកិច្ច នឹងត្រូវផ្តន្ទាទោសតាមផ្លូវច្បាប់ជាធរមាន”។

គួររំលឹកផងដែរថា បន្ថែមលើសេចក្តីថ្លែងការណ៍រួមខាងលើនេះ កាលពីថ្ងៃទី៥ ខែធ្នូ ឆ្នាំ២០១៧ លោក ស្រី ជា សិរី អគ្គនាយកធនាគារជាតិនៃកម្ពុជា ក៏បានប្រកាសឲ្យសាធារណជនប្រុងប្រយ័ត្នចំពោះការឆបោក ក្នុងទម្រង់បែបថ្មី តាមរយៈការចាយវាយរូបិយបណ្ណអេឡិចត្រូនិកជាបណ្ដាញ ឬកាសអេឡិចត្រូនិកដូចខាងលើផងដែរ។ លោកស្រីបញ្ជាក់ថា ការប្រាស់លុយអេឡិចត្រូនិកទាំងនោះ មិនមានការទទួលស្គាល់ពីរដ្ឋាភិបាលនោះទេ៕

ចុចអាន៖ ស្វែងយល់ពីប្រាក់អេឡិចត្រូនិច Bitcoin ដែលកំពុងល្បីតគ្នា

ប្រភព៖ រស្មីកម្ពុជា ប្រែសម្រួល៖ សុខ សុវត្ថិ