កម្ពុជា នៅតែសង្ឃឹមទទួលបានការអនុគ្រោះពន្ធពីសហភាពអឺរ៉ុប បន្តទៀត

2018-07-13 13:07:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានថ្លែងនៅថ្ងៃទី១៣កក្កដានេះថា ជំហររបស់កម្ពុជា នៅតែមានសុទិដ្ឋិនិយមថា កម្ពុជានៅតែទទួលបានគម្រោងអនុគ្រោះពន្ធពីសហភាពអឺរ៉ុបបន្តទៀត ដើម្បីជួយពង្រឹងជីវភាពប្រជាពលរដ្ឋប្រមាណ៣លាននាក់ឱ្យមានចីរភាពបានយូរ។

លោកបន្ថែមថា កម្ពុជាអនុវត្តបានច្រើន តាមគោលការណ៍នៃកិច្ចព្រមព្រៀងជាមួយសហភាពអឺរ៉ុបនាពេលកន្លងមកផងដែរ។

លោក ផៃ ស៊ីផាន ថ្លែងក្នុងសិក្ខាសាលាមួយ នាពេលកន្លងមក

ទាក់ទងនឹងការពិចារណាដកកម្ពុជាចេញពីគម្រោងអនុគ្រោះពន្ធ លោក ផៃ ស៊ីផាន កត់សម្គាល់ឃើញថា គ្រាន់តែជាការពិចារណាលើរបាយការណ៍នៃបេសកកម្ម ដើម្បីវាយតម្លៃសហភាពអឺរ៉ុបប៉ុណ្ណោះ ហើយរាជរដ្ឋាភិបាលកំពុងតែព្យាយាមពន្យល់ សហភាពអឺរ៉ុបឱ្យយល់ពីស្ថានភាពជាក់ស្តែងរបស់កម្ពុជា។ ចំណែករបាយការណ៍របស់សហភាពអឺរ៉ុប ដែលទទួលបានពីសង្គមស៊ីវិលផ្សេងៗនាពេលកន្លងទៅ ជារបាយការណ៍ មិនឆ្លើយតបនឹងស្ថានភាពជាក់ស្តែងរបស់កម្ពុជាឡើយ។

ការលើកឡើងរបស់មន្រ្តីរាជរដ្ឋាភិបាលខាងលើនេះ គឺបន្ទាប់ពីគណៈកម្មាធិការពាណិជ្ជកម្មសហភាពអឺរ៉ុប បានចេញសេក្តីប្រកាសព័ត៌មានកាលពីថ្ងៃទី១២កក្កដាម្សិលមិញ ដោយព្រមានដកប្រព័ន្ធអនុគ្រោះពន្ធ អ្វីៗទាំងអស់លើកលែងតែអាវុធ (EBA, Everything But Arms) ពីកម្ពុជា។ ការចេញសេចក្តីប្រកាសព័ត៌មាននេះ ធ្វើឡើងស្របពេលដែលគណៈប្រតិភូបេសកកម្មស្វែងរកការពិតរបស់សហភាពអឺរ៉ុប កំពុងចាប់ផ្ដើមធ្វើការវាយតម្លៃស្ថានភាពពិតប្រាកដ ក្រោយបិទបញ្ចប់បេសកកម្មរយៈពេល ៧ថ្ងៃ របស់ខ្លួននៅកម្ពុជា ចាប់ពីថ្ងៃទី៥ ដល់ថ្ងៃទី១១ កក្កដា ឆ្នាំ២០១៨ ពាក់ព័ន្ធនឹងដំណើរវិវឌ្ឍវិស័យសិទ្ធិមនុស្ស និងវិស័យការងារ ក្នុងរយៈពេលចុងក្រោយនេះ។

សេចក្តីប្រកាសព័ត៌មាននេះ មានខ្លឹមសារយ៉ាងដូច្នេះថា៖ «បន្ទាប់ពីបេសកកម្មស្វែងរកការណ៍ពិតនេះ យើងនឹងវិភាគការពិតដោយលម្អិតនិងពិចារណាពីវិធានការបន្ទាប់ទៀត។ ការដកកម្ពុជាចេញពីប្រព័ន្ធអនុគ្រោះពន្ធនេះ គឺជាជម្រើសចុងក្រោយ ប្រសិនបើកិច្ចខិតខំប្រឹងប្រែងរបស់យើងបានបរាជ័យ ដើម្បីដោះស្រាយការព្រួយបារម្ភទាំងនេះ»។

សូមរំលឹកថា កិច្ចព្រមព្រៀងប្រព័ន្ធអនុគ្រោះពន្ធរបស់សហភាពអឺរ៉ុប បានអនុញ្ញាតឱ្យកម្ពុជា នាំចូលដោយរួចពន្ធទៅសហភាពអឺរ៉ុប ក្នុងឋានៈជាប្រទេសកំពុងអភិវឌ្ឍន៍។ កិច្ចព្រមព្រៀងនេះ បានផ្តល់ផលប្រយោជន៍ជាច្រើនដល់កម្ពុជា ក្នុងការនាំចេញផលិតផលពីកម្ពុជាទៅអឺរ៉ុបដោយមិនយកពន្ធ។ដូច្នេះ ប្រសិនបើសហភាពអឺរ៉ុប លុបចោលប្រព័ន្ធអនុគ្រោះពន្ធនេះមែន នឹងធ្វើឱ្យកម្ពុជា ខាតបង់ជាង ៦០០លានដុល្លារ។ នេះបើតាមការអះអាងរបស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីឆ្នាំ២០១៧៕

ប្រភព៖ Vayo Fm ប្រែសម្រួល៖ សំភី