សត្វទាព្រៃស្លាប ស មួយក្បាល ត្រូវបានព្រលែងឱ្យរស់នៅក្នុងដែនជម្រកសត្វព្រៃគូលែន ព្រហ្មទេព

2018-07-19 06:44:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អង្គការសមាគមអភិរក្សសត្វព្រៃ WCS បានឱ្យដឹងនៅថ្ងៃទី១៩កក្កដានេះថា សត្វទាព្រៃស្លាប ស ឈ្មោលមួយក្បាល ត្រូវបានព្រលែងឱ្យទៅរស់នៅក្នុងព្រៃនៃដែនជម្រកសត្វព្រៃគូលែន ព្រហ្មទេព ក្នុងខេត្តព្រះវិហារ។ ការព្រលែងនេះ ធ្វើឡើងកាលពីថ្ងៃទី២២ ខែមិថុនា ឆ្នាំ២០១៨ ក្រោមកិច្ចសហការរវាង អង្គការ WCS មន្ទីរបរិស្ថានខេត្តព្រះវិហារ និងមជ្ឈមណ្ឌលអង្គរសម្រាប់ការអភិរក្សជីវចម្រុះខេត្តសៀមរាប។

សត្វទាព្រៃស្លាប ស ឈ្មោលមួយក្បាលនេះ ត្រូវបានព្រលែងចូលទៅក្នុងត្រពាំងធម្មជាតិមួយកន្លែង ស្ថិតនៅក្នុងភូមិតែល នៃដែនជម្រកសត្វព្រៃគូលែ ព្រហ្មទេព។ សត្វកម្រនេះ ត្រូវបានគេជួយសង្គ្រោះពីតំបន់នេះ កាលពីថ្ងៃទី២ ខែវិច្ឆិកា ឆ្នាំ២០១៧ បន្ទាប់ពីសមាជិកសហគមន៍បានរកឃើញវានៅលើដី ប្រឈមនឹងការវាយប្រហារដោយសត្វឆ្កែក្នុងស្រុក។

អង្គការ WCS និងមន្ទីរបរិស្ថានខេត្ត បានផ្តល់ដំណឹងនេះភ្លាមៗទៅក្រុមការងាររបស់មជ្ឈមណ្ឌលអង្គរសម្រាប់ការអភិរក្ស ជីវចម្រុះខេត្តសៀមរាប ដើម្បីជួយសង្គ្រោះ និងទទួលយកទៅថែរក្សាបន្តនៅមជ្ឈមណ្ឌលរបស់ខ្លួននៅឧទ្យានជាតិភ្នំគូលែន (ខេត្តសៀមរាប)។ ក្រោយការត្រួតពិនិត្យ និងមើលថែទាំយ៉ាងយកចិត្តទុកដាក់រយៈពេលពីរខែមក សត្វនេះមានសុខភាពល្អ ហើយអាចនឹងលែងវាទៅក្នុងព្រៃវិញបាន។ ប៉ុន្តែ ការព្រលែងត្រូវបានពន្យារពេលរហូតដល់ខែវស្សា ដើម្បីធានាថា វាមានចំណីគ្រប់គ្រាន់សម្រាប់ចិញ្ចឹមជីវិត។

សត្វទាព្រៃស្លាប ស ដែលត្រូវបានព្រលែងទៅក្នុង ព្រៃនៃដែនជម្រកសត្វព្រៃគូលែន ព្រហ្មទេព ក្នុងខេត្តព្រះវិហារ។ រូបថត៖ អង្គការ WCS

បើតាមអង្គការ WCS យ៉ាងហោចណាស់ សត្វទាព្រៃស្លាប ស ចំនួន ១៩ក្បាល ត្រូវបានគេដឹងថា កំពុងរស់នៅក្នុងដែនជម្រកសត្វព្រៃគូលែន ព្រហ្មទេព និងឆែប ហើយសកម្មភាពព្រលែងសត្វទាព្រៃស្លាប ស ឈ្មោលនេះ គឺជាការចូលរួមចំណែកយ៉ាងសំខាន់ ក្នុងការថែរក្សាប្រភេទសត្វស្លាប ដ៏កម្រនេះ ឱ្យនៅស្ថិតស្ថេរបានយូរអង្វែង។

សត្វទាព្រៃស្លាប ស ត្រូវបានចាត់ទុកជាសត្វកម្រ ដោយសារចំនួនរបស់ពួកវា បន្តធ្លាក់ចុះយ៉ាងខ្លាំង តាមរយៈការរំខាន និងការបាត់បង់ទីជម្រកនៅតាមដងព្រែកជាដើម។ បច្ចុប្បន្ននេះ ទាព្រៃស្លាប ស ស្ថិតនៅក្នុងបញ្ជីក្រហមរបស់អង្គការ IUCN ដែលត្រូវបានចាត់ទុកជាប្រភេទសត្វដែលជិតផុតពូជ និងមានចំនួននៅសេសសល់តិចតួចបំផុតប្រមាណ ១ពាន់ក្បាល ប៉ុណ្ណោះនៅលើសាកលលោក។ ប្រភេទសត្វទាំងនេះត្រូវបានគេប្រទះឃើញនៅតាមបណ្តាប្រទេសមួយចំនួនដូចជា ឥណ្ឌា ប៊ូតាន បង់ក្លាដេស មីយ៉ាន់ម៉ា ឥណ្ឌូណេស៊ី ឡាវ ថៃ វៀតណាម និងកម្ពុជា (ប្រហែល ១០០ក្បាល)។

ទាព្រៃស្លាប ស អាចរស់នៅបានដោយពឹងផ្អែកលើទីជម្រកនៅតាមដងព្រែកដែលពុំមានការរំខាន និងការធ្វើសំបុកក្នុងរន្ធឬប្រហោងដើមឈើ ខ្ពស់ៗដែលជារឿយៗ ត្រូវបានកាប់បំផ្លាញតាមរយៈការជួញដូរឈើខុសច្បាប់៕

អត្ថបទ៖ សំភី