ស្លាប់ ២៤នាក់ ដោយការផ្ទុះគ្រាប់បែកក្នុងថ្ងៃបោះឆ្នោត នៅប៉ាគីស្ថាន

2018-07-25 07:53:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មនុស្សយ៉ាងហោចណាស់ ២៤ នាក់ បានស្លាប់ ក្នុងហេតុការណ៍ផ្ទុះគ្រាប់បែក នៅខាងក្រៅមណ្ឌលបោះឆ្នោត នៅក្នុងទីក្រុង Quetta ប្រទេសប៉ាគីស្ថាន។ ប៉ូលិស ៥ នាក់ និងក្មេង ២ នាក់ បានស្លាប់នៅក្នុងចំណោមមនុស្សទាំង ២៤ នាក់នោះ។ នេះបើតាមការចុះផ្សាយរបស់សារព័ត៌មាន Aljazeera នៅរសៀលថ្ងៃទី ២៥ កក្កដា ឆ្នាំ២០១៨នេះ។

អ្នកនាំពាក្យមន្ទីរពេទ្យក្រុង Quetta លោក Waseem Baig បានឲ្យដឹងថា មនុស្ស ២៨ នាក់ផ្សេងទៀត ក៏បានរងរបួស ដោយសារហេតុការណ៍នេះផងដែរ។

ក្រុមសមត្ថកិច្ច កំពុងប្រមូលផ្ដុំ នៅទីតាំងកើតហេតុ នៅថ្ងៃទី ២៥ កក្កដា ឆ្នាំ២០១៨។ រូបថត៖ Sky news

ការវាយប្រហារនេះ ដែលត្រូវបានគេដឹងថា សំដៅទៅកាន់ក្បួនរថយន្តប៉ូលិស បានកើតឡើង ប៉ុន្មានម៉ោង ក្រោយពីបើកការបោះឆ្នោតថ្នាក់ជាតិ នៅក្នុងប្រទេសប៉ាគីស្ថាន។

ជុំវិញរឿងនេះដែរ នៅមិនទាន់មានក្រុមណា ចេញមុខទទួលខុសត្រូវចំពោះហេតុការណ៍បំផ្ទុះនេះនៅឡើយទេ។

គួរបញ្ជាក់ថា ការបោះឆ្នោតនៅប៉ាគីស្ថាន នឹងត្រូវបិទបញ្ចប់ នៅម៉ោង ៦ ល្ងាច (ម៉ោងក្នុងស្រុក)។ ក្នុង ការបោះឆ្នោតនេះ ប៉ូលិស និងកងយោធា ប្រមាណ ៨០ ម៉ឺននាក់ បានដាក់ការពារតាមមណ្ឌលបោះឆ្នោតចំនួន ៨៥ ០០០ ទីតាំង នៅពាសពេញផ្ទៃប្រទេស៕

ប្រភព៖ Aljazeera ប្រែសម្រួល៖ អឹុម ម៉េងស៊ាង