ស្វែងយល់ពីតួនាទីរបស់សន្តិសុខក្នុងថ្ងៃបោះឆ្នោត

2018-07-27 06:44:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គ.ជ.ប បានចេញសៀវភៅណែនាំថា នៅថ្ងៃបោះឆ្នោត ភ្នាក់ងារសន្តិសុខបោះឆ្នោតចំនួន ៣នាក់ ដែលនៅការពារការិយាល័យបោះឆ្នោត និង ការិយាល័យរាប់សន្លឹកឆ្នោតនីមួយៗ ត្រូវស្លៀកពាក់ឯកសណ្ឋានកងកម្លាំងឱ្យបានត្រឹមត្រូវ និង ពាក់ប្រឡង់ដៃសន្តិសុខរបស់ គ.ជ.ប រហូតដល់ចប់ភារកិច្ច។

ភ្នាក់ងារសន្តិសុខបោះឆ្នោត មានភារកិច្ចការពារកុំឱ្យមានការរំខាន អុកឡុក ការបំភិតបំភ័យ និង ការគំរាមកំហែង ឬហេតុការណ៍ផ្សេងៗដែលនឹងអាចកើតមាន និង ត្រូវហាមជនគ្រប់រូបយកអាវុធ ជាតិផ្ទុះ និង វត្ថុប្រកបដោយគ្រោះថ្នាក់ផ្សេងៗ ចូលក្នុងបរិវេណខាងក្រៅ (ចម្ងាយ១០០ម៉ែត្រជុំវិញការិយាល័យបោះឆ្នោត) បរិវេណខាងក្នុង(ចម្ងាយ១៥ម៉ែត្រជុំវិញការិយាល័យបោះឆ្នោត) និងក្នុងការិយាល័យបោះឆ្នោត និងរាប់សន្លឹកឆ្នោត។

គ.ជ.ប បានបន្តណែនាំ ដល់ភ្នាក់ងារសន្តិសុខបោះឆ្នោតដូចតទៅ៖

ភ្នាក់ងារសន្តិសុខបោះឆ្នោត ១នាក់ ត្រូវចល័តការពារជុំវិញបរិវេណខាងក្នុង នៃការិយាល័យបោះឆ្នោត និងរាប់សន្លឹកឆ្នោត ដែលមានកាំយ៉ាងតិច ១៥ម៉ែត្រពីការិយាល័យបោះឆ្នោត និង មិនចាំបាច់ប្រើប្រាស់អាវុធ។
ភ្នាក់ងារសន្តិសុខបោះឆ្នោត ២នាក់ទៀត ត្រូវចល័តការពារជុំវិញបរិវេណខាងក្រៅ នៃការិយាល័យបោះឆ្នោត និងរាប់សន្លឹកឆ្នោត ដោយត្រូវស្ថិតនៅចម្ងាយពី ១០០ម៉ែត្រ ឬទម្រង់ផ្សេង ឬមានកាំតូចជាង ស្របទៅតាមស្ថានភាពជាក់ស្តែងនៃបរិវេណខាងក្រៅ របស់ការិយាល័យនីមួយៗ និងអាចប្រើប្រាស់អាវុធវែង ១ដើម ដែលមានគ្រាប់ច្រើនជាង៣០គ្រាប់។
ក្នុងករណីការិយាល័យបោះឆ្នោត និង ការិយាល័យរាប់សន្លឹកឆ្នោតច្រើន ប្រមូលផ្តុំក្នុងបរិវេណ ឬអគារតែមួយ ចំនួនភ្នាក់ងារសន្តិសុខបោះឆ្នោតសម្រាប់ការិយាល័យនីមួយៗ ត្រូវសមស្របនឹងស្ថានភាពជាក់ស្តែង ប៉ុន្តែមិនត្រូវឱ្យលើសពី ៣នាក់ក្នុងមួយការិយាល័យ។
ប៉ុន្តែ ភ្នាក់ងារសន្តិសុខបោះឆ្នោត ឬ/និងភ្នាក់ងារសង្គ្រោះ អាចចូលធ្វើអន្តរាគមន៍នៅក្នុងការិយាល័យបោះឆ្នោត និងរាប់សន្លឹកឆ្នោត ក្នុងករណីមានសំណូមពរចាំបាច់ពីប្រធាន គ.ជ.ប ប្រធាន គធ.បខ ប្រធានគឃ.សប ឬប្រធាន គ.ក.ប/គ.ក.រ ៕

( ដកស្រង់ និងធ្វើសេចក្តីសង្ខេបចេញពីសៀវភៅណែនាំ គ.ក.ប/គ.ក.រ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ ២០១៨)

អត្ថបទ៖ ឃុត សុខឿន